NAMBAR 34 - Pathien Lekhabu Inthieng (BSI)

¹ Chun, LALPAIN Mosie a biek a,

² “Israel thlahai chu thu pe la, an kuomah, ‘Kanaan ram in tlung pha chun, (Kanaan rama ramri izir ang peia in hluo ding ram chu) simtienga in hluo ding chin chu Zin thlalêra inthawka Edom ram hrûl peiah nîng a tih;

³ saktieng ramri chu Tuisuoriet Al tâwpa inthawkin saktieng pang nîng a ta;

⁴ chun, in ramri chu Akrabim hang fena simtieng pangah kâwi a ta, Zinah fe thleng a ta, chun, a hung suokna chu Kades-barnea simtiengah nîng a tih, chun, Hazar-addarah fêng a ta, Azmonah fe pei a tih.

⁵ Chun, ramri chu Azmona in- thawk chun Aigupta vadung chenin kâwi a ta, a suokna chu tuisuorietah nîng a tih.

⁶ Thlangtieng panga chun Tui- suoriet Lien chu a ramri dingin chang i ta, hi hi thlangtienga in ramri nîng a tih.

⁷ Chun, hi hmârtienga in ramri nîng a tih; Tuisuoriet Liena inthawka Hor tlâng huomin siem i ta.

⁸ Hor tlânga inthawka Hamath lûtna chenin siem i tih; ramri suokna chu Zedadah nîng a tih;

⁹ chun, ramri chu Ziphronah fe pei a ta, chun, a suokna chu Hazar- enanah nîng a tih; hi hi hmartienga in ramri chu nîng a tih.

¹⁰ Saktienga in ramri chu Hazar- enana inthawkin Sepham chenin siem in ta;

¹¹ chu ramri chu Sephama inthawk Ribla chenin Ain saktieng pangah fe thlâng a tih; chuongchun, ramri chu fe thla pei a ta, Kinnereth tuisuoriet saktieng pang zuk sun a ta;

¹² chun, ramri chu Jordanah fe thlâng a ta, chun, a suokna chu Tuisuoriet Alah nîng a tih; hi hi a vêla ramri fe dân ang hin in ram nîng a tih,’ ti rawh,” tiin.

¹³ Chuongchun, Mosie chun Israel thlahai chu thu a pêk a, “Hi hi LALPAIN hnam kuo le a zâtve hai pêk dinga thu a pêk, aisâna in hluo ding ram chu a nih;

¹⁴ Reuben thlahaiin an pahnam izir pei le Gad thlahaiin an pa- hnamhai izir pei le, Manasse hnam zâtve khawmin an ram hluo ding chu an chang ta sih a.

¹⁵ Hnam hni le hnam zâtvehai chun an ram hluo ding chu nisa suokna tieng Jeriko zâwn Jordan râl saktiengah an chang tah a,” tiin.

¹⁶ LALPAIN Mosie a biek a,

¹⁷ “Hluo dinga ram ṭhenawi pui- tuhai hming chu hieng hi a nih: thiempu Eleazar le Nun naupa Josua hai.

¹⁸ Ram ṭhetu ding chun hnam tin laia ṭhuoitu pakhat seng i thlang ding a nih,” tiin.

¹⁹ Chuong mihai hming chu hieng hi a nih: Juda hnama Jephunne naupa Kaleb;

²⁰ Simeon thlahai hnama Ammihud naupa Semuel;

²¹ Benjamin hnama mi Kislon naupa Elidad;

²² Dan thlahai hnama ṭhuoitu Jogli naupa Bukki;

²³ Josef thlahai laia Manasse thla- hai hnama ṭhuoitu Ephod naupa Hanniel:

²⁴ Ephraim thlahai hnama ṭhuoi- tu Siphtan naupa Kemuel.

²⁵ Zebulun thlahai hnama ṭhuoitu Parnak naupa Elizaphan.

²⁶ Issakar thlahai hnama ṭhuoitu Azan naupa Paltiel.

²⁷ Aser thlahai hnama ṭhuoitu Selomi naupa Ahihud.

²⁸ Naphtali thlahai hnama ṭhuoi- tu Ammihud naupa Pedahel.

²⁹ Hienghi Kanaan rama Israel thla ram hluo ding sem dinga LALPAIN thu a pêkhai chu an nih.