NAMBAR 23 - Pathien Lekhabu Inthieng (BSI)

¹ Chun, Balaam chun Balak kuoma chun, “Hitaka hin mâi- châm pasari mi siempêk la, bâwng- chal pasari le berâmchal pasari mi buotsaipêk raw khai,” a ta.

² Balak chun Balaam hril ang chun a thawh a; chun, Balak le Balaam chun mâichâm tina chun bâwngchal pakhat le berâmchal pakhat an inhlân a.

³ Balaam chun Balak kuomah, “I pumrawhmang thilinhlân bula hin lo ngîr zing la, kei chu hang fe tum ka ta, LALPA chu mi be dingin a hung el khawm a ni thei a; chun, a mi hril taphawt chu hril ka ti che,” a ta. Chuongchun, tlâng kawl vel vula hin a hang fe tah a.

Balaamin Israel mal a sâwm

⁴ Pathien chun Balaam chu a lo intuokpui a; Balaam chun a kuomah, “Mâichâm pasari chu ka siem tah a; mâichâm tina chun bâwngchal pakhat le berâmchal pakhat kân hlân seng a,” a ta.

⁵ LALPAIN Balaam baua chun thu a sieh a, “Balak kuoma chun kîr nâwk ta la, va hril sâwng rawh,” a ta.

⁶ Chuongchun, a kuoma chun a kîr nâwk tah a; chun, ngai ta, Balak chu a pumrawhmang thilinhlân bula chun Moab mi lienhai po po leh a lo ngîr zing a.

⁷ Chun thu chu a hril tah a, “Aram rama inthawkin Balak chun a mi ṭhuoi a, Saktieng tlânga Moab lal chun; ‘La hung la, Jakob rawihai ṭawngsie mîn phurpêk rawh, Hung la Israelhai hi mi hung vaukhâwngpêk ta!’

⁸ Iengtin am Pathien ṭawngsie inphur naw chu inphur thei ka ta?

⁹ Iengtin am Pathien vaukhâwng lo chu vaukhâwng ka ta? Lungpui chunga inthawk dâmin anni chu ka hmu sih a, Tlânga inthawk dâmin anni chu ka hmuh a; Ngai ta, hnam a tuma um det sa a nih, Hnam danghai le angkhata inngai ngai lo.

¹⁰ Jakobrawi pilvut chu tuin am tiem thei a ta? Israelhai hmun lia ṭhea hmun khat chu tuin am tiem thei a ta? Mi fel thi angin thi ve thei lang, Ka tâwpna chu a tâwpna ang ni sien,” a ta.

¹¹ Chun, Balak chun Balaam kuomah, “I mi thaw dân hi iengtizie am a na? Ka hmêlmahai ṭawngsie inphur dingin ka ṭhuoi che a, mal i sâwm lem ta hlau el hi!” a ta.

¹² Ama chun a dawn a, “LALPAIN ka bâua a sie chu ka hril ngei ding a ni naw am a nih?” a tih a.

¹³ Chun, Balak chun a kuomah, “Hmun dangah fe nâwk ei tih khai; chutaka inthawk chu hmu thei tâwl i ta; a hmatâwng pâwl tak hai chu hmûng i ta, an rêng ruok chun hmu vawng kher naw ti nih a; chutaka inthawk chun ṭawngsie mîn phurpêk rawh,” a ta.

¹⁴ Chuongchun, Zophimhai umna Pisga sîpa chun a hang ṭhuoi a, mâi- châm pasari a siem a, mâichâm tina chun bâwngchal pakhat le berâmchal pakhat ân hlân a.

¹⁵ Chun, Balak kuoma chun, “Saw laia LALPA ka va biek kâr i pum- rawhmang thilinhlân bula hin lo ngîr zing rawh,” a ta.

¹⁶ Chun, LALPAIN Balaam chu a lo intuokpui a, a bâua chun thu a sie a, Balak kuoma chun kîr nâwk ta la, a kuomah va hril sâwng rawh, a ta.

¹⁷ Chun, a kuoma chun a va feh a, ngai ta, a pumrawhmang thilinhlân bula chun a lo ngir zing a, Moab milienhai khawm a kuomah chun an um veh a. Balak chun a kuomah, “LALPAIN ieng am a lo hril a?” a ta.

¹⁸ Chuongchun, Balaam chun thu chu a hril tah a, “Tho la, Balak, ngai ta; Zippor naupa, ka thu ngai rawh:

¹⁹ Pathien chu khêl inhlip mihriem el a ni nawh, Inkîr hmang mihriem naupa a ni bawk nawh a, A hril ta chu a thaw naw ding am a nih? A lo hril ta chu a sukpuitling naw ding am a nih?

²⁰ Ngai ta, mal sâwm dingin thu ka hmuh a, Mal a sâwm tah a, ka sukdanglam thei nawh.

²¹ Jakobrawi rîtlona hrim a hmu nawh a, Israel mihai lai chun kâwmâwna a hmu bawk nawh. LALPA an Pathien chu an kuomah a um a, Anni lai chun Lal chawimawina ri chu a um a.

²² Aigupta rama inthawkin Pathien chun a ṭhuoi suok tâwl a. Ramsiel tha ang el an put a.

²³ Jakobrawi chungah dawi invêtna a um nawh a. Israelhai chungah dawi invêtna a um bawk nawh. Jakobrawi le Israelhai chunga Pathien thilthaw chu suklang pei a nih.

²⁴ Ngai ta, mipuihai chu sakeibakneipui angin an tho a, Sakeibaknei angin an inchâwm tho a: An sase an fâk hma chun zâl naw ni hai a. An sase thisen chu an dâwn hma chun,” a ta.

²⁵ Chun, Balak chun Balaam kuomah, “Ṭawngsie inphur naw la, mal khawm sâwm naw rawh,” a ta.

²⁶ Nisienlakhawm, Balaam chun a dawn a, Balak kuomah, “LALPAIN a hril po po chu ka thaw ngei ding a nih, tiin ka hril che a ni naw am a nih?” a ta.

²⁷ Chun, Balak chun Balaam kuomah, “Hung ta, hmun dangah ṭhuoi phawt ka ti che. Chutaka inthawk chun ṭawngsie i mîn phûr- pêk Pathien chun a phal khiet rawi mawh,” a ta.

²⁸ Chuongchun, Balak chun Balaam chu thlalêr zuk suk en Peor sipah a ṭhuoi a.

²⁹ Chun, Balaam chun Balak kuomah, “Hitaka hin mâichâm pasari mi siempêk la, bâwngchal pasari le berâmchal pasari mi buotsaipêk rawh,” a ta.

³⁰ Chun, Balak chun Balaam hril ang chun a thawh a, mâichâm tina chun bâwngchal pakhat le berâmchal pakhat ân hlân a.