NAMBAR 22 - Pathien Lekhabu Inthieng (BSI)

Balakin Balaam ko dingin mi a tir

¹ Chun, Israel thlahai chu an fe pei a, Jeriko zâwn Jordan râl Moab phaihaia chun umhmun an khuor a.

² Chun, Zippor naupa Balak chun Israel mihaiin Amor mihai an thaw dân po po chu a hriet a.

³ Chun, Moab mihai chun mihai chu an ṭi hle el a, an tam hle sih a; Israel thlahai lei chun Moab mihai chu an lunginzîng tah a.

⁴ Chuongchun, Moab mihai chun Midian mi upahai kuomah, “Hieng mipuihai hin bâwngin hlohna an pet zo angin ei vêla mi po po an pet zo ding annâwm,” an ta. Chuong lai chun Zippor naupa Balak chu Moab lal a nih.

⁵ Ama chun Amaw rama Euphrates vadung panga Pethora Beor naupa Balaam kuomah mi a tir a, “Ngai ta, hnam pakhat Aiguptaa inthawka hung suok an um a, leihnuoi a dâpin an hung dâp a, keia mi dep tâwtah an um a;

⁶ lunginsiettakin hung la, hieng mihai hi ṭawngsie mi vân phur pêk ta khai; keia ta ding chun an hrât taluo a nih, kan that theiin, kan hne theiin, kan rama inthawk hi kan hnawt suok thei khiet rawi mawh; mal i sâwm taphawthai chu malsâwmin an um a; ṭawngsie în phur taphawthai chu ṭawngsephurin an um ti ka hriet sih a,” tiin a vân ko tir a.

⁷ Chuongchun, Moab upahai le Midian upahai chu aisân man ding chawiin an suok tah a; Balaam kuom chu an va tlung a, Balak thu incha chu an hril a.

⁸ Ama chun an kuomah, “Vawizân chu hitaka hin riek unla, LALPAIN a mi hril ang angin in kuomah thu hung intlun ka tih,” a ta: chuongchun, Moab mi lienhai chu Balaam kuoma chun an riek tah a.

⁹ Balaam kuoma chun Pathien a hung a, “I kuoma mihai hi tuhai am an na?” a ta.

¹⁰ Balaam chun Pathien kuomah, “Zippor naupa Moab lal Balak chun ka kuomah mi a hung tir a,

¹¹ ‘Ngai ta, Aigupta rama in- thawka hung hnam chun leihnuoi an hung dâp a; hung la ṭawngsie mi vân phurpêk rawh, ka do theiin ka hnawt suok thei khiet rawi mawh,’ tiin,” a ta.

¹² Pathien chun Balaam kuomah, “An kuoma chun i fe ding a ni nawh. Chuong mihai chu ṭawngsie în phur ding a ni nawh, mi hamṭha an nih,” a ta.

¹³ Chuongchun, Balaam chu zîngkâr a tho a, Balak mi lienhai kuoma chun, “In rama chun fe nâwk ta ro khai, LALPAIN in kuoma fe dinga suok a phal naw a nih,” a ta.

¹⁴ Chuongchun, Moab mi lienhai chu an tho a, Balak kuoma chun an feh a, “Balaam chun keini a mi hung zui nuom nawh,” an ta.

¹⁵ Balak chun mi lien tam nâwk zuol, anni nêka ropui lem a tir nâwk a.

¹⁶ Balaam kuom chu an va tlung a, a kuomah, “Zippor naupa Balak chun hieng hin a ti a nih, ‘Ka kuoma i hung hi iengkhawmin hluo naw raw se.

¹⁷ Mi ropuitakah siem ka ti cheh a, ka kuoma i hril taphawt chu thaw pei ka tih; chuleiin, hung hrâm la, hieng mihai hi ṭawngsie mi vân phurpêk hrâm ta khai,’ a tih a,” an ta.

¹⁸ Balaam ruok chun Balak mihai chu a dawn a, an kuomah, “Balak chun a in tangka le rângkachak sip hi mi pe ding ni sienkhawm, ieng ieng- khawm LALPA ka Pathien thu bawsein ka thaw thei nawh.

¹⁹ Chuleiin, LALPAIN ka kuomah iengtin am a hril nâwk ding hrim, vawizân khawm hitaka hin riek nâwk phawt ta u khai,” a ta.

²⁰ Chun, zâna chun Pathien chu Balaam kuoma chun a hung a, a kuomah, “Hieng mihai hi nanga koa hung an ni chun tho la, anni zui rawh, amiruokchu, i kuoma ka hril chau che hi i thaw ding a nih,” a ta.

Vântirko le Balaam a Sabengtung chu

²¹ Chuongchun, Balaam chu zîng- kâr a tho a, sabengtung a siemrêl a, Moab mi lienhai chu a zui tah a.

²² Chun, a fe lei chun Pathien lung chu a hung chawk tah a, chun, LAL- PA vântirko chu a lo dang dingin lampuia chun a lo ngîr a. A sabeng- tung chunga chuong a na, a sie- hlawhai pahni a kuomah an um veh a.

²³ Sabengtung chun LALPA vân- tirko, kâwlhnâm chawia lampuia ngîr chu a hmuh a, chuongchun, sabeng- tung chu lampuia inthawk chu a pêt a, ramhnuoia chun a fe tah a. Balaam chun sabengtung chu lampuia infe kîrtir tum chun a vuok a.

²⁴ Chun, LALPA vântirko chu grêp huon pal le pal inkâr lam inchêpnaah a ngîr a.

²⁵ Chun, sabengtung chun LALPA vântirko chu a hmuh a, pal chu a va hneng a, Balaam ke chu pala chun a hneng deh a; chuongchun, Balaam chun a vuok nâwk a.

²⁶ Chun, LALPA vântirko chu a khêl hreta chun a feh a, hmun in chêp tak, changtieng amanih vawitieng amanih pêtna um nawna lai taka chun a ngîr tah a.

²⁷ Chun, sabengtung chun LALPA vântirko chu a hmuh a, Balaam chu a bawkpui tah a; chuongchun, Balaam a lung chu a hung sen tah a, a hmawlin sabengtung chu a vuok a.

²⁸ Chuongchun, LALPAIN sabeng- tung chu ân ṭawngtir a. Balaam kuoma chun, “Ieng am ka law che a, hienga vawi thum zet mi vaw am i na?” a ta.

²⁹ Balaam chun sabengtung kuoma chun, “I mi suknawmna leiin a nih; kâwlhnâm lem chu chawi lang chu sukhlum hiel tâng ka ti che,” a ta.

³⁰ Sabengtung chun Balaam kuoma chun, “Tu chena i chuong rawpna i sabengtung ka ni an naw am a nih? Hieng ang hin ka thaw hlak luo che am a nih?” a ta. Ama chun, “Thaw ngai lo e,” a ta.

³¹ Chun, LALPAIN Balaam mit chu a sukvarpêk a, chuongchun, LALPA vântirko kâwlhnâm chawia lampuia ngîr chu a hmu tah a, a kûn a, a hmaia hnuoi sikin a bawkkhup a.

³² Chun, LALPA vântirko chun a kuomah, “Iengdinga hienga vawi thum rau i sabengtung i vuok am? Ngai ta, i thaw dân chu ka mithmua hin sietna a ni leiin lo dang ding chein ka hung suok a nih;

³³ chun, sabengtung chun a mi hmuh a, ka hmaa chun vawi thum a pêt a ni kha, pêt naw sienla chu ama chu sukhlum si loin, nang sukhlum hiel naw ning che,” a ta.

³⁴ Balaam chun LALPA vântirko kuomah, “Ka lo suol a ni ta chu, mi dang dingin lampuiah i ngîr ti ka hriet si nawh a; chuleiin, i lâwm naw chun kîr nâwk el ka tih,” a ta.

³⁵ Chun, LALPA vântirko chun Balaam kuomah chun, “Hieng mihai hi zui pei la, amiruokchu, i kuomah ka thu hril ding che chau hi i hril ding a nih,” a ta. Chuongchun, Balaam chun Balak mi lienhai chu a zui ta pei a.

Balaam le Balak

³⁶ Balakin Balaam a hung ti a hriet chun Arnon tienga an ramri chenin a va tuok a.

³⁷ Balak chun Balaam kuomah, “Ṭhahnemngaitakin ko ding chein mi ka hung tir a ni naw am a nih? Ieng dinga ka kuomah hung nuom lo am i na? Mi ropui takah ka siem thei che a ni naw am a nih?” a ta.

³⁸ Balaam chun Balak kuomah, “Ngai ta, hi ka hung tah a, nuom nuom hril theina ka nei am a nih? Pathienin ka bâua thu a sie chau ka hril ding a nih,” a ta.

³⁹ Chuongchun, Balaam chu Balak kuoma chun a fe tah a; Kiriath-buzoth an va tlung tah a.

⁴⁰ Chun, Balak chu bâwng le be- râmin ân thâwi a, a sa chu Balaam le a kuoma mi lien umhai chu a thawn a.

⁴¹ Chun, a zinga chun Balak chun Balaam chu a ṭhuoi a; Baal hmun insâng haia chun a hang fe pui a, chutaka inthawk chun, Israel mipui po po a hmu phâk a.