NAMBAR 17 - Pathien Lekhabu Inthieng (BSI)

Aron hmawl

¹ LALPA chun Mosie a biek a,

² “Israel thlahai hril la, an sûngkuo tin puolah hmawl pakhat pei, an sûngkuo izir peia an ṭhuoi- tuhai po po zât hmawl sâwm le pahni la la, chun, an hmawla chun an hming seng ziek rawh.

³ Levi hmawla chun Aron hming ziek la, an sûngkuo tina dingin hmawl pakhat pei a ni ding a nih.

⁴ Chun, ei inbiekna, intuokna puon in, thu inhriettirna hmaa chun i sie ding a nih.

⁵ Chun, ka mi thlang ding hmawl chu hung inder a ta, chuongchun, Israel thlahai chierna, i chunga an chierna hi ka sukre ding a nih,” tiin.

⁶ Chuongchun, Mosie chun Israel thlahai chu a biek a, an ṭhuoituhai po po chun an sûngkuo tin puolah ṭhuoi- tu tinin hmawl pakhat pei, hmawl sâwm pahni an pêk a; Aron hmawl khawm chu an hmawlhai lai chun a ṭhang ve a.

⁷ Mosie chun thu inhriettirna puon ina chun LALPA hmaah hmawlhai chu a sieh a.

⁸ A zînga chun Mosie chu thu inhriettirna puon ina chun a va feh a; ngai ta, Levi sûngkuo puola Aron hmawl lo inder chu a hmuh a, a pâr a, almondin a ra a.

⁹ Mosie chun LALPA hmaa in- thawka hmawl po po chu Israelhai kuoma chun a lâk suok a, an lo en a, anni hmawl seng chu an lâk a.

¹⁰ Chun, LALPAIN Mosie kuom- ah, “Helhmang nauhai an nih ti inhriettirna dingin Aron hmawl chu thu inhriettirna bula chun sie nâwk rawh; chuongchun, ka chunga an helna hi sukrepêk thei i tih, an thi nawna dingin,” a ta.

¹¹ Chuong ang chun Mosie chun a thawh a, LALPAIN thu a pêk ang chun a thawh a.

¹² Chun, Israel thlahai chun Mosie kuomah, “Ngai ta, kan bohmang a ni annâwm, kan se zo tah, kan se zo vawng tah annâwm.

¹³ LALPA biekbûk hung hnai ta- phawt chu an thi pei a; kan bohmang vawng el ding nîng a ti maw?” an tih a.