NAMBAR 16 - Pathien Lekhabu Inthieng (BSI)

Kora le Dathan le Abiram helna

¹ Levi naupa Kohath, chu naupa Izhar, chu naupa Kora chun Eliab naupasalhai Dathan le Abiram le Peleth naupa On, Reuben thlahai leh mihai an ṭhuoi a.

² Israel thlahai, mi inlâr deu deu mipui laia hotu, rorêltu thlanghai laia mi za hni le sâwmngahai leh Mosie hmaah an va feh a.

³ Mosie le Aron chu sawisêlin an pungkhâwm a, an kuomah, “In insukngêng êm el, mipuihai chu an inthieng seng sih a; LALPA khawm anni lai a um sih a; iengdinga LALPA mipui pungkhâwmhai chunga hin in insie chunghnung bîk am a na?” an ta.

⁴ Chu chu Mosien a hang hriet chun a bawkkhup a.

⁵ Kora le a pâwlhai po po kuoma chun, “Zingah zîngkâr LALPAIN a tahai le ân thienghai chu suklangin ama va hnai dingin hung tîng a ta, a thlanghai ngei chu ama va hnai dingin tîng a tih.

⁶ Hieng ang hin thaw ro, Kora le a pâwl po po hai;

⁷ zingah meilâkna dâm chawi unla, chutaka chun mei sie unla, LALPA hmaah riminhnik phul ro; chun, LALPAIN a thlang taphawt chu inthieng el a tih. Levi nauhai, in insukngêng êm el,” tiin a hril a.

⁸ Chun, Mosien Kora kuomah, “Nangni Levi nauhai, ngai ta u,

⁹ LALPA biekbûka rawngbâwla, mipuihai hmaa an rawngbâwla ngîr dinga Israelhai Pathienin ama hnai dinga Israel mipuihai laia inthawka a suktum cheu a,

¹⁰ Levi naupasal in unauhai po po le ama hnai dinga ân umtir cheu hi thil chînah in ngai a ni maw? Thiempu nina khawm in la zawng sa rawp a ni maw?

¹¹ Chuleiin, nang le i pâwlhai po po chu LALPA chu kalin in pung- khâwm a nih. Aron khawm hin ieng am a thawa a chunga hi chier in ni leh?” a ta.

¹² Chun, Mosie chun Eliab nâupa Dathan le Abiram ân kotir a, anni chun, “Hung naw ning ungah!

¹³ Thlalêra mi sukhlum dingin nênetui le khuoizu luongna rama inthawkin i mi ṭhuoi suok hi thil chîn am a ni hrim luoh a? Kan chungah lalin în sie nâwk nghâl a.

¹⁴ Nênetui luongna ramah i mi ṭhuoi lût nawh a, lo le grêp huon ro ding i mi pêk bawk nawh; mi hlêm i tum a, hung naw ning ungah,” an ta.

¹⁵ Chuongchun, Mosie chu a lung a sen hle el tah a; LALPA kuomah, “An thilinhlân chu pawm naw rawh, an sabengtung chu pakhat khawm ka lâk nawh a, tukhawm ka sukna bawk nawh,” a ta.

¹⁶ Chun, Mosie chun Kora kuom- a chun, “Zîngah nang le i mi pungkhâwmhai nang leh, anni leh, Aron leh LALPA hmaah hung um ro, an mei lâkna chawi seng hai sienla,

¹⁷ riminhnik phul hai sienla, LALPA hmaa mei lâkna seng, mei- lâkna za hni le sâwmnga chu hung chawi raw hai se; nang le Aron khawmin in mei lâkna chawi ve ve ro,” a ta.

¹⁸ Chuongchun, mi tin chun an mei lâkna chu an chawi a, mei an sieh a, riminhnik an phul a; Mosie le Aron leh intuokna puon in kawtkhâra chun an va ngîr a.

¹⁹ Chun, Kora chun mipui po po chu anni kalin intuokna puon in kawtkhâra chun ân umkhâwmtir a; chun, mipuihai po po chunga chun LALPA ropuina a hung inlang a.

²⁰ Chuongchun, LALPAIN Mosie le Aron a biek a,

²¹ “Hieng mipuihai laia inthawk hin insiekieng ro; ka hung sukbo- hmang thut theina dingin,” tiin.

²² Chuongchun, anni chu an bawk- khup a, “Aw Pathien, tisa po pohai thlarau Pathien, mi pakhat suol leiin mipui po po chungah i lunginsen ding am a nih?” an tih a.

²³ Chun, LALPAIN Mosie a biek a,

²⁴ “Mipuihai kuoma chun, ‘Kora hai, Dathan hai, Abiram hai bûka inthawk hin inkiengsan vawng ro,’ tiin hril rawh,” a ta.

²⁵ Chuongchun, Mosie chu a tho a, Dathan le Abiram kuoma chun a va feh a; Israel upahai chun an zui a.

²⁶ Chun, pungkhâwmhai kuoma chun, “Hieng mi suolhai puon ina inthawk dâm hin suok ro khai; an iengkhawm hi tâwk naw ro, chuong naw chun chu an suolna po poa hin ṭhang ve rawi in tih,” tiin a hril a.

²⁷ Chuongchun, Kora hai, Dathan hai, Abiram hai bûka inthawkhai chun an suok ta dur dur el a; chun, Dathan le Abiram chu an puon ina inthawk chun an hung suok a, an puonin kawtkhâra chun an nuhmei- hai, an naupasalhai, an naunuhmei- hai le chun an ngir a.

²⁸ Chun, Mosien, “Keia lungril puoksuoka thaw a ni nawh a, hieng thil thaw ding hin LALPAIN a mi tir a nih ti hienga hin hrieng in tih.

²⁹ Hieng mihai po po hi mi dang thi dân ang bawkin an thi a, mi po po hrem ang bawka hrem an ni chun Pathienin a mi tir naw nîng a ta.

³⁰ LALPAIN thil thar a siem a, hnuoiin a bâu a ka a, anni le an ta po po a lem a, Seolah a hringa an lût ruok chun hieng mihai hin LALPA an lo ngainêp a nih ti hrieng in tih,” a ta.

³¹ Chuong thu po po chu a hril zo chun, an hnuoi leihnuoi chu a hung kak ta phut el a,

³² chuongchun, leihnuoi chun a bâu chu a kah a, an sûngkuoin, Kora mihai po po, an thuomhnaw po po leh a lem zo vawng tâwl tah a.

³³ Chuongchun, anni le an ta po po chu a hringin Seola chun an tlum ta vawng a, leihnuoi chun a bâu ân chîp nel a, pungkhâwm laia inthawk chu an bohmang tah a.

³⁴ Chuongchun, an vêla Israel mi po pohai chu an khêk ria chun an tlân dar a, “Hnuoiin mi lem ve hlau rawi a tih,” an tih a.

³⁵ Chun, LALPA kuoma inthawkin mei a hung suok a, riminhnik inhlântu mi za hni le sâwmnga hai chu a hung kâng hlum tah a.

³⁶ Chun, LALPAIN Mosie a biek a,

³⁷ “Thiempu Aron naupa Eleazar chu meia inthawka mei lâknahai chu la suok dingin hril la, sukdar neng raw se, thil inthieng a ni sih a,

³⁸ mei lâknahai chu hieng thilsuol thawtuhaiin thi pha hiela an inhlân a ni sih a. Chuleiin, mâichâm inkhum- na phêk dinga sut ni raw se. LALPA hmaa inhlân an na, chuleiin, an inthieng a nih; chu chu Israel thlahai ta dinga inchikna nîng a tih,” tiin.

³⁹ Chuongchun, thiempu Eleazar chun a kânghai dârsen mei lâknahai chu a lâk a, mâichâm inkhumnahai sut a ni tah a;

⁴⁰ Mosie hmanga a kuoma LAL- PAIN a lo hril ta ang chun, Aron thla ni lo hnam dang hrim hrim LALPA hmaa riminhnik raw dinga an fe hnai nawna ding le, Kora le a pâwlhai anga an hung um nawna dingin.

⁴¹ Nisienlakhawm, a zînga chun, “LALPA mihai in sukhlum a nih,” tiin Israel thla pungkhâwm po po chu Mosie le Aron chunga chun an chier a.

⁴² Chun, Mosie le Aron chunga mi- pui an pungkhâwm lai chun intuokna puon in tieng an nghah a; sûmin a hung inkhum le LALPA ropuina hung inlang chu an hmuh a.

⁴³ Chun, Mosie le Aron chu intuok- na puon in tuola chun an va feh a.

⁴⁴ Chun, LALPAIN Mosie a biek a,

⁴⁵ “Hieng mipuihaia inthawk hin insiekieng ro, ka hung sukbohmang thut theina dingin,” tiin. Chun, anni chu an bawkkhup a.

⁴⁶ Mosie chun Aron kuomah, “I mei lâkna chawi la, mâichâma inthawkin mei sie la, riminhnik phul la, mipui- hai lai chun fepui vat la, an ta dingin inremna siem rawh. LALPA kuoma inthawkin lunginsenna a hung suok a nih, hri ân lêng ṭan mêk a nih,” a ta.

⁴⁷ Aron chun Mosie hril ang chun a chawi a, pungkhâwmhai laia chun a tlân lût tah a, hri chu mipui lai ân lêng ṭan tah ti a hmuh a, riminhnik chu a phul a, mipui ta ding chun inremna chu a siem a.

⁴⁸ Mithi le mi hring inkâra chun a ngîr a, hri chu ân kieng tah a.

⁴⁹ Chuongchun, Kora chungchâng thua thihai tiem loin hria thi po po chu sîng khat sâng li le za sari an nih.

⁵⁰ Chun, Aron chu intuokna puon in kawtkhâra Mosie kuoma chun a kîr nâwk a, chuongchun, hri chu ân kieng tah a.