NAMBAR 12 - Pathien Lekhabu Inthieng (BSI)

Miriam le Aronin Mosie an hrilsiet

¹ Miriam le Aron chun Mosien Kus mi nuhmeia a nei leiin an hrilsiet a; Kus mi chu a nei ngei sih a.

² Anni chun, “Mosie kuoma chau hin am a nih LALPAIN thu a hril bîk? Keini kâwla khawm hin a hril naw am a nih?” an tih a. Chu chu LAL- PAIN a lo hriet a.

³ Mosie chu hnuoi chunga mihriem po poa zainêm tak a na.

⁴ Chun, Mosie le Aron le Miriam kuomah LALPAIN, “In pathumin hung suok unla, intuokna puon inah hung ro,” a ti ta thut el a. Chuong- chun, an pathum chun an va feh a.

⁵ Puon in kawtkhârah a lo ngir a, Aron le Miriam chu a ko a, an pahni chun an hung suok a.

⁶ Ama chun, “Ka thu hi ngai ro, nangni lai hin zâwlnei in um chun ama chu kei LALPA hi inlârnain inhriettir ka ta, mang tieng bieng ka tih.

⁷ Ka siehlaw Mosie hi chu chuong ang chu a ni nawh; ka sûngkuo thu po poa chun ring a um a nih;

⁸ ama le chun chu thurûk um loin bauin tlangtakin inbieng kan ta; LALPA hmêl khawm hmûng a tih. Chuleiin, ka siehlaw Mosie hi iengtiziea hrilse ngam am in ni leh?” a lo tih a.

⁹ Chuongchun, LALPA lung chu an chungah a chawk a, a fe nâwk tah a.

¹⁰ Puon in chunga sûm chu ân kieng tah a; chun, ngai ta, Miriam chu vûr ang ela vârin a hung inphâr tah a; Aron chun Miriam chu a hei en a, inphâr a lo ni ta zing el ti a hmuh a.

¹¹ Chuongchun, Aron chun Mosie kuomah, “Aw pu, kan chungah suol innghat lul naw raw khai, invêttakin kan lo thawh a, kan lo suol tah a nih.

¹² Mi a nu sula inthawka a hung suok tîra thi sa deuthaw angin Miriam chu um lul naw raw se,” a ta.

¹³ Chuongchun, Mosie chun, “Aw Pathien, sukdam nâwk ta khai,” tiin LALPA chu a ko a.

¹⁴ Chun, LALPAIN Mosie kuom- ah, “A pain a hmaia chil a sâk ngawt khawma ni sari chu ân zak naw ding am a nih? Riebûk puoah ni sari khum hmang ni sienla, chu zoa chun ṭhuoi lût nâwk ni raw se,” a tih a.

¹⁵ Chuongchun, Miriam chu rie- bûk puoah ni sari an khum hmang a. Miriam chu an ṭhuoi lût hma khat chun mipuihai chu an intâwl sawn nawh a.

¹⁶ Chu zoa chun mipuihai chu Hazerotha inthawk chu an suok a, Paran thlalêrah umhmun an khuor a.