MIKA 7 - Pathien Lekhabu Inthieng (BSI)

Israel um dân indik nawna chu

¹ Ka chung a va rik de! nisapui thei an sîkkhâwm laia um ang le grêp lo hun laia grêp hmu ṭhel lo ding ang ka ni sih a; ra bâwr fâk ding a um nawh; ka hringna hin theichang hmin hmasa a châk a nih;

² Pathien ngaisak mi chu hnuoia inthawk hin an bohmang a, mihriem lai hin mi indiktak hrim an um nawh; thisen insuo dingin an inchân vawng a, mi tinin mâni unau chu lênin an ve a nih.

³ An kuthai chu thil ṭha naw chungah taimataka thaw dingin an innghat a; lal chun thamna a ngên a, rorêltu chun lâwmman a ngiet a; milien chun a lungril thil suksuolna a hril suok a; chuong ang chun an inthuruol tâwl a nih.

⁴ Anni laia mi ṭhatak khawm chu buor ang a na, mi indiktak khawm chu hlohlingnei nêkin a se lem; i vêngtuhai ni, fanga i um ni ngei chu a hung tlung tah, chu chu an lungin- zîngna ni nîng a tih.

⁵ Ruol chu ring naw unla, ṭhuoitua chun ringna innghat naw ro; i âng- sûnga umnu kuom ngeia khawm chun i bau kawtkhârhai chu vêng ṭha rawh.

⁶ Naupa chun pa hming a suksiet a, naunu chun a nu a do a, moin a tarpi a do sih a; mihriem hmêlmahai chu ama sûnghai ngei an nih.

Lalpa chun Var le Sansuokna a hungpui

⁷ Kei ruok chun chu LALPA en ka ta; ka sandamna Pathien chu nghâk ka tih; ka Pathien chun a mi ngai ding a nih.

⁸ Aw ka hmêlma, mi diriem el naw rawh, ka tlûk pha khawm tho nâwk ka tih; inthima ka ṭhung khawmin LALPA chu ka ta dinga var nîng a tih.

⁹ LALPA chunga chun thil ka suksuol ta leiin, a lungninawna nasa- tak chu phur ka tih, ka chungthu a mi hrilpui a, ka ta dinga rorêlna chu a muolsuo hmakhat chun: vara chun mi ṭhuoi suok a ta, a felna chu hmûng ka tih.

¹⁰ Chuongchun, ka hmêlma ka kuoma, “Khâwlai am LALPA i Pathien?” titu chun hmûng a ta, muolphonain ama chu inkhum a tih. Ka mithai hin ama chu en a ta; tuhin chu kawthlêr chirhak anga sirde ni tâng a tih.

¹¹ I kul banghai siemna ni ding chu! chu nia chun thuruot chu hlatak chena suklien nîng a tih.

¹² Chu nia chun Assuria le Aigupta khawpuia inthawk dâm, Aigupta le Vadung tlung raka in- thawk dâm, tuisuoriet le tuisuoriet inkâra inthawk le, tlâng le tlâng inkâra inthawk dâm chun, i kuomah hung an tih.

¹³ Chuong sa khawm chun ram chu a sûnga chênghai le a thilthaw ra lei chun râusan nîng a tih.

¹⁴ Karmel tlâng kâra khawsâwt- taka um i rochan berâm ruol, I mihai chu i hembâwk hmangin châwm la, inhma ang khan Basan le Gileada châwmin um tâwl raw hai se,

¹⁵ Aigupta rama inthawka i fe suok lai ang khan a kuomah thil maktakhai inentir ka tih.

¹⁶ Hnam tinin chu chu hmûng an ta, an thilthawtheina po po chu inzâpui an tih; an hmûr hup an ta, an nahai sêt a tih.

¹⁷ Rûl angin pilvut liek an ta; hnuoia bawkinvâka fehai angin an umna kuoa inthawk chu inthin pumin hung an ta; LALPA ei Pathien kuoma chun ṭi pumin hung an tih; nangma leiin an ṭi ding a nih.

¹⁸ Nang anga khawhlona ngai- damtu le a rochan la um sun bawsietna fekhêltu Pathien tu am an um a? A lunginsenna chu kumkhuoin a vawng zing nawh, lunginsietnaa chun a lâwm êm êm hlak leiin.

¹⁹ Ngha kîr nâwk a ta, ei chungah lunginsietna nei a tih; ei khaw- hlonahai chu a ke hnuoiah sirdêng a tih; nangin an suolnahai po po chu tuisuoriet mawng inthûktakhaia chun pei lût i tih.

²⁰ Tienlaia kan puhai kuoma ṭawng i lo inkhâm tah, Jakob kuoma thutak le Abraham kuoma lungin- sietna sukpuitling i tih.