MIKA 6 - Pathien Lekhabu Inthieng (BSI)

Lalpain Israel a kal thu

¹ LALPA thu hril chu tuhin lo ngai ta u: Tho la, tlâng lienhai hmaa chun khing la, tlâng chînhai chun i râwl ngai raw se.

² Aw tlâng lienhai, LALPA khing- na chu ngai unla, nangni leihnuoi innghatna hlunhai, lo ngai ro; LALPA chu a mihai leh an inkhing a, Israelhai chu khing a tih.

³ “Aw ka mihai, in chungah ieng am ka thawh a? Ieng kawng âm ka suksâwl cheu a? Mi hung khing ta u.

⁴ Aigupta rama inthawk chun ka ṭhuoi suok cheu a, suoka inthawkin kân tlansuok cheu a, in hmaah Mosie hai le, Aron hai le Miriam hai ka hung tir kha.

⁵ Aw ka mihai, LALPA thilthaw fel chu in hriet theina dingin, Moab lal Balak thu rawt le Beor naupa Balaamin a dawn dân, Sittima in- thawka Gilgal chenin thil umziehai kha, tuhin hre zing ro.”

Lalpa thil ngiet chu

⁶ Ieng lêm LALPA hmaa chun hung ka ta, Pathien chunghnung hmaa chun kûn ka ta? Pumraw- hmang thilinhlânhai, bâwngte kum khat mihai leh a hmaa chun ka hung ding am a nih?

⁷ LALPA chu berâmchal sâng tamtak amanih, hriek vadung sîng- haia dâm chun a lungawi ding am a nih? Ka bawsietna leiin ka nau lutîr chu ka pêkin, ka thlarau suolna leiin ka taksa ra chu ka pêk ding am a nih?

⁸ Aw mihriem, a ṭha chu ân entir ta che a nih; LALPAIN a phût che chu ieng am a na? Indiktaka thaw le lunginsietna ngainat le i Pathien le thuhnuoirawltaka lêng hmunkhat chu a ni naw am a nih?

⁹ LALPA chun khawpui chu a khêkkhum a nih, varna nei mi chun i hming chu ṭîng a tih; “Hembâwk le a buotsaitu chu hre ro.

¹⁰ Mi rilo ina chun rîtlona robâwmhai chu a la umin inkhina dawrâwm tirdakumtakhai chu a la um rawp am?

¹¹ Bûkna indik nawhai le ip rik dân dawhahai leh inthieng ka ni thei ding am a nih?

¹² Chutaka mi hausahai chu pâwngnêknain an sip sih a, chutaka chênghai chun khêl an hril a, an bau sûnga an lei chu mi hlêm hmang a nih.

¹³ Chuleiin, kei khawma nataka hliemin ka vuok ta cheh a, i suolna- hai leiin râusanah ka siem ta che a nih.

¹⁴ Fâk chu fâng i ta, nisienla- khawm, khawp naw ti ni; i kuoma chun i tlâwmna chu um a ta, sawn i ta, nisienlakhawm, himin thak hmang naw ti ni; i fe hmangpuihai khawm chu kâwlhnâmah pe suok tho ka tih.

¹⁵ Chîng chu chîng i ta, sîk naw ti ni, oliv rahai chu sirsâwr i ta, nisien- lakhawm, a hriek chu nâl naw ti ni; grêp ra chu sâwr la khawm, a uoin chu dâwn naw ti ni.

¹⁶ Omri thuruothai chu vawng zing a ni sih a, Ahab sûngkuo thil- thaw po pohai leh; an remruothaia chun in fe a nih; chuleiin, hmun râusanah ka siem ta ding che a nih, a sûnga chênghai hi nuizatbûr dingin; chun, ka mihai hmingsietna chu phur in tih.”