MIKA 4 - Pathien Lekhabu Inthieng (BSI)

Khawvêl pumpuiah Lalpain remnain ro a rêl

¹ Nisienlakhawm, ni nuhnungahai chun hieng ang hi hung nîng a ta; LALPA in umna tlâng chu tlâng lien- hai chunga chun sukdet nîng a ta, tlâng chînhai chunga chun chawi- sângin um bawk a tih; chutaka chun chi tinrênghai chu fe hum hum an tih.

² Chun, hnam tamtakhai chu fêng an ta, “Hung unla, LALPA tlângah, Jakob Pathien ina chun hang fêng ei tiu; chuongchun, ama chun a lampui chanchinhai chu mîn chûktir a ta, a lampuihaia chun fêng ei ta, tîng an tih; Ziona inthawk chun dân thu chu a hung suok ding a ni sih a; LALPA thu chu Jerusalema inthawkin a hung suok ding a nih.”

³ Ama chun chi tamtak kârah ro rêl a ta, hlataka hnam hrâttak khawm chu kâwk a tih; chun, an kâwlhnâm- hai chu hnuoi inletna hmawr zum- haiah sut an ta, an feihai chu thei kûng ât bawngna chem inkuoihaiah sut an tih; hnam dangin hnam dang chungah kâwlhnâm inlet ta naw nih a, indo dân khawm inchûk ta naw bawk an tih.

⁴ Mi tinhai chu an grêp hrui hnuoia le an theichang kûng hnuoiah ṭhung lem an ta, tukhawma sukṭi naw ni hai; sipaihai LALPA bau chun a hril tah a.

⁵ Chi tin mâni pathien hming sengin um an ta, eini khawm LALPA ei Pathien hmingin kumkhuoin um ei tih.

Sal intângnaa inthawkin Israel sansuokin a um

⁶ LALPAIN hieng ang hin a tih: Chu nia chun kebai kei khâwm ka ta, hnawt hmanga um le ka sukrimsika um chu kei khâwm ka tih;

⁷ kebai chu hlâbîkah siem ka ta, hlataka hnawt hmanga um chu hnam hrâttakah siem ka tih: tuta inthawk chu Zion tlângah kumkhuoin LALPA chun an chungah ro rêl a tih.

⁸ Aw nang, ran ruol kul, Zion naunu umna tlâng, i kuomah hung tlung a tih: anih, inlalna hmasa chu hung tlung a tih, Jerusalem naunu inlalna chu.

⁹ Iengdinga i ṭap rak am a na? I sûngah laltak chu a um naw am a nih? I remruottu chu a bohmang ta am a nih? Nuhmei nau invawi anga natnain a man el ta che chu!

¹⁰ Aw Zion naunu, nuhmei nau invawi nau nei ding angin na tuor la, invawi rawh; tuhin khawpuia in- thawk fe suok i ta, ramah chêng i tih. Babulon chen khawmin i fe ding a ni sih a: chutaka chun sansuokin um i ta, chutaka chun i hmêlmahai kuta inthawkin LALPA chun sansuok a ti che.

¹¹ Tuhin hnam tamtak chu nang- ma doin an inkhâwm a, “Sukpawr- chein um sienla, ei mit hin Zion chunga a châk zâwng chu hmu raw se,” an tih a.

¹² Nisienlakhawm, LALPA ngai- tuonahai chu an hriet nawh a, a remruot chu an hriet thiem bawk nawh: hrizâwla buphal siekhâwm angin anni chu ân khâwm ta sih a.

¹³ Aw Zion naunu, tho la chîl rawh, i ki chu thîr angin siem ka ta, i kepha bâwrhai chu dâr angin ka siem ding a ni sih a; chun, chi tamtakhai chu vaw nâwi i ta, an thil hlêp chu LALPA ta dingin hlânthieng i tih, an sum chu leihnuoi pumpui LALPA ta dingin hlânthieng i tih.