MATTHAI 4 - Pathien Lekhabu Inthieng (BSI)

Isu thlêma a um

¹ Chu zoa chun Isu chu Diebol thlêma um dingin thlalêrah Thlarau ṭhuoi lûtin a um tah a.

² Chun, ni sâwmli le zân sâwmli a nghei hnungin a phîng a hung ṭâm tah a.

³ Chun, thlêmtu chu a hung a, a kuomah, “Pathien Naupa i ni chun, hieng lunghai hi beia inchang dingin thu pe rawh,” a ta.

⁴ Nisienlakhawm, ama chun, “Mi- hriem hi bei chauin hring naw ni hai a, Pathien baua thu tin suokin hring lem an tih,” ti ziek a nih, tiin a dawn a.

⁵ Chu zoa chun diebol chun khaw inthienga chun a ṭhuoi lût a, Pathien biekin sîp zuma chun a sieh a;

⁶ Chun, a kuomah, “Pathien Nau- pa i ni chun tla thla rawh; ‘I chungchânga chu a vântirkohai chu thu pêng a ta, An kutin dawm an ti cheh a, Chuong naw chun I kein lung sui hlau rawi i tih,’ ti ziek a ni si a,” a ta.

⁷ Isûn a kuomah, “ ‘Lalpa i Pathien fie naw,’ ti ziek a ni ve bawk a nih,” a ta.

⁸ Chun, diebol chun tlâng insâng- takah a ṭhuoi nâwk a, khawvêl ram po po le a ropuina chu ân entir a.

⁹ A kuomah, “Bawkkhupin chibai i mi bûk chun, hieng po po hi pe vawng ka ti che,” a ta.

¹⁰ Chu phingleh Isûn, “Setan, fe hmang dai rawh; ‘Lalpa i Pathien chibai bûk la, ama rawng chau bâwl rawh,’ ti ziek a nih,” a ta.

¹¹ Chu hnunga chun diebol chun a zâmsan tah a. Chun, ngai ta, vântir- kohaiin a rawng an bâwlpêk tah a.

Isu Galili rama rawng a bâwl ṭanna

¹² Chun, Johan an man ti Isûn a hriet phingleh Galili ramah a fe ta dai a;

¹³ chun, Nazareth a mâksan a, Kapernaumah a um ta zing a, chu chu Zebulun le Naphtali biela dil panga um a nih:

¹⁴ zâwlnei Isai baua,

¹⁵ “Dîl tienga Jordan râlah, Zebulun le Naphtali ram, Jentailhai Galili;

¹⁶ Inthim hnuoia ṭhunghai chun var nasatak an hmuh a, Thina hmun le a hlima ṭhunghai chunga chun, Var a hung suok tah a,” tia a hril kha a hung tlung theina dingin.

¹⁷ Chu chena inthawk chu Isûn, “Sim ro, vân ram chu a hnai tah,” tiin a hril phut tah a.

Isûn nga mantu hai pali a ko

¹⁸ Chun, Galili dil panga a lêng malamin, unau pahni, Simon (Peter an ti chu) a unau Andri leh dila chun lên dêngin a hmuh a; nga mantu an ni hrim a.

¹⁹ Chun, ama chun an kuomah, “Mi zui ro, chuongchun, mihriem mantuin siem ka ti cheu,” a ta.

²⁰ Lênhai chu mâksanin an zui nghâl tah a.

²¹ Chutaka inthawk chun a fe pei a, unau dang pahni, Zebedai naupa Jakob le a unau Johan chu, an pa Zebedai kuoma lawngah an lênhai siemṭhain a hmuh a, anni chu a ko tah a.

²² Chuongchun, lawng le an pa chu an mâksan a, an zui nghâl tah a.

Isûn mipui tamtak ân chûktir

²³ Chun, Isûn an inkhawmna inhaia inchûktirin, ram Chanchin Ṭha chu hrilin mihai laia natna tinrêng le hrât nawna tinrêng suk- damin Galili ram po po a fang pei a.

²⁴ Chun, Suria ram po poah a chanchin ân thang tah a; chuong- chun, mi damnaw po po, damnawna le natna tinrênga nahai, khawhri imanhai, hringawl invawihai, zeng- hai a kuomah an hung ṭhuoi a, a lo sukdam tâwl a.

²⁵ Galili rama inthawk dâm, Dekapoli khuoa inthawk dâm, Jeru- salema inthawk dâm, Judai rama inthawk dâmin le Jordan râla inthawk dâm chun mipui nasatakin ama an zui bawk a.