MATTHAI 13 - Pathien Lekhabu Inthieng (BSI)

Bu chi thetu tekhithu

¹ Chu ni chun Isu chu ina inthawkin a fe suok a, dîl panga chun a ṭhung a.

² Chun, a kuomah mipui nasatak an hung inkhâwm a, chuongchun, lawngah a chuong a, a ṭhung a; mipui po po ṭieuphoah an ngîr a.

³ Chun, tekhithuin an kuomah thu tamtak a hril a, “Ngai ta u, bu chi thetu chu bu chi the dingin a feh a.

⁴ Chun, a the laiin a ṭhen lampui sîrah a tlah a, vatehaiin an hung tlân zo tah a.

⁵ Chun, aṭhen pielthlêng leihnuoi inphânna hmunah a tlah a, leihnuoi a sa naw leiin a mâwng nghâl tah a.

⁶ Nisienlakhawm, nisa a hung insâng deuin em vuoiin a hung um a, zung a nei naw leiin a rawp el tah a.

⁷ Chun, a ṭhen hlohlingnei lai a tlah a, hlo chu a hung mâwng sâng a, a dîp hmang tah a.

⁸ A ṭhen hnuoi ṭhaah a tlah a, ṭhenkhat a lêt za dâm, ṭhenkhat a lêt sâwmruk dâm, ṭhenkhat a lêt sâwm- thum dâmin a hung ra tah a.

⁹ Tukhawm na nei chun hre raw se,” a ta.

Tekhithu thiltum chu

¹⁰ Chun, inchûktirhai chu an hung a, a kuomah, “Iengdinga an kuomah tekhithua i hril am?” an ta.

¹¹ Chun, ama chun a dawn a, an kuomah, “Vân ram thurûk chu nangni ihriet chu phal a nih, anni ihriet ruok chu phal a ni nawh.

¹² Tukhawm a nei taphawt chu pe sâng an ta, nei ṭeu an tih; nisienlakhawm, tukhawm a nei naw taphawt chu, an nei sun khawm lâkpêk an tih.

¹³ Chuleichun, tekhithuin an kuomah ka hril a nih; hmu hai sien khawm an hmu ngai nawh a, nain hrehai sien khawm an hriet ngai nawh a, a ngaina khawm an hriet ngai naw leiin.

¹⁴ Chun, Isai thuhrillâwk kha an chungah a hung tlung a ni hi; ‘Na chun hre dêng in ta chu, a ngaina ruok chu hre tawp naw ti niu; Hmu chu hmu dêng in ta chu, hriet ruok chu hre tawp naw ti niu;

¹⁵ Hi chihai lungril hi a lo ngawng tah a, An nahai a lo sêt tah a, An mit an insîm bawk a. Chuong naw chun an mitin hmûng an ta, An nain hrieng an ta, An lungrilin hre bawk an ta, Ngha kîr nâwk an ta, Keiin anni sukdam hlau rawi ka tih,’ a ti kha.

¹⁶ “Nangni mit chu a vângnei a nih, a hmu hlak leiin; in na khawm a vângnei a nih, a hriet hlak leiin.

¹⁷ Titakzetin ka hril cheu hi, zâwlnei tamtakhai le mi fel tam- takhai khawmin, in thil hmuhai hi hmu an inhâwk a, nisienlakhawm, an hmu si nawh a; in thil hriethai khawm hi hriet an inhâwk a; nisienlakhawm, an hriet si nawh a!

Bu chi thetu tekhithu hrilfiena

¹⁸ “Chuongchun, bu chi thetu tekhithu chu hre ro:

¹⁹ Tukhawmin ram thu chu naa a lo hriet a, a ngaina a hriet si naw chun, mi suol chu a hung a, a lungrila the sa chu a lâkpêk hlak. Chu chu lampui sîra the chu a nih.

²⁰ Chun, pielthlêng hmuna the chu, thu hre a, lâwmtaka pawm nghâl hlak hi a nih;

²¹ nisienlakhawm, amaa chun zung a um naw leiin sâwt nawte chau a um a; chun, thu lei chun, rinumna amanih, suknawmnatna amanih a hung um phingleh a tlu nghâl el hlak.

²² Chun, hlohlingnei laia the chu, thu hretu a na; nisienlakhawm, khawvêl lungkhamna le hausakna hlêmna chun thu chu a dîp a, ra loin a um hlak.

²³ Chun, leihnuoi ṭha chunga the chu, thu chu naa hre a, a ngaina hre bawk hi a nih. Chu chu a ra ngei a, ṭhenkhat a lêt za dâm, ṭhenkhat a lêt sâwmruk dâmin, ṭhenkhat a lêt sâwmthum dâmin a pung hlak,” a ta.

Bu tehlêm tekhithu

²⁴ Tekhithu dang an kuomah a hril nâwk a, “Vân ram chu, mi a loa chi ṭha thetu le chun hrilkhi a nih;

²⁵ nisienlakhawm, mi an in kârin a hmêlma a hung a, bu lai chun bu tehlêm a the a, a fe hmang nâwk tah a.

²⁶ Chun, bu chu a hung mâwng a, a hung vui chun, bu tehlêm chu a hung inlang ve tah a.

²⁷ Chun, in neitu suokhai chu an hung a, a kuoma chun, ‘Pu, i loah chi ṭha i the a ni naw am a nih? bu tehlêm saw khâwlaia hung um am a ni leh?’ an ta.

²⁸ Chun, ama chun an kuomah, ‘Chu chu hmêlmain a lo thaw a ni ta chu,’ a ta. Chun, suokhai chun a kuomah, ‘Chuong chu la khâwm el inlang rem i ti?’ an ta.

²⁹ Ama ruok chun, ‘Ti lo e; bu tehlêm chu in lâk khâwm chun bu chu phawi sa hlau rawi in tih.

³⁰ Bu sîk chenin um hmun khat raw se; chun, bu sîk pha chun, bu âttuhai kuomah, bu tehlêm chu la khâwm hmasa phawt unla, raw dingin intêl ro, bu ruok chu ka inah sêk lût ro, la tîng ka tih,’ a tih a,” a ta.

Anṭam mu tekhithu

³¹ Tekhithu dang an kuomah a hril nâwk a, “Vân ram chu anṭam chi mal khat mîn a lâk a, a loa a the ang chu a na;

³² chu chu chi po poa chîn tak a na: nisienlakhawm, a hung mâwng sâng pha chun, thlaihai nêk chun a lien lem a, thing a hung ni hlak a, chuongchun, chunglêng vatehai chu an hung a, a zârhaia chun an riek hlak a,” a ta.

Chawl tekhithu

³³ Tekhithu dang an kuomah a hril nâwk a, “Vân ram chu chawl, nu- hmeiin a ilâk, beiphit tekhâwng thum laia arênga a tho vawng hmakhata a iphûm ang chu a nih,” a ta.

³⁴ Chuong po po chu Isûn tekhi- thuin mipuihai kuomah a hril a, tekhithu nawin iengkhawm a hril nawh:

³⁵ zâwlneiin, “Tekhithuin ka bau kâng ka ta, Leihnuoi insieng tîra inthawka thil inthup chu hril dawk ka tih,” tia a hril kha a hung tlung theina dingin.

Bu tehlêm tekhithu hrilfiena

³⁶ Chu lai chun mipuihai chu a fesan a, ina chun a lût tah a; chun, a inchûktirhai chu a kuomah an hung a, “Loa bu tehlêm tekhithu kha mi hrilfie rawh,” an ta.

³⁷ Chun, ama chun a dawn a, “Chi ṭha thetu chu Mihriem Naupa hi a nih;

³⁸ Lo chu khawvêl hi a na; chi ṭhahai chu Ram nauhai an na; bu tehlêmhai chu suol nauhai an nih.

³⁹ Hmêlma a thetu chu diebol a na; bu sîk chu khawvêl tâwpna ding a na; bu sîktuhai chu vântirkohai an nih.

⁴⁰ Chuongchun, bu tehlêmhai chu an lâk khâwma meiah an raw ang hin khawvêl tâwpnaa chun la um a tih.

⁴¹ Mihriem Naupa hin a vântir- kohai chu tir dawk a ta, a rama inthawka insuksuoltirtuhai le thil suksuoltuhai po po chu thlang dawk an ta,

⁴² rawtuina meia chun pei an ta, chutaka chun ṭap le harâwt chu la um a tih.

⁴³ Chu pha chun, mi felhai chu an Pa rama chun nisa angin var tâng an tih. Na nei chun hre raw se.

Ro, lunghlu le lên tekhithu

⁴⁴ “Vân ram chu loa ro phûmrûk ang a nih; chu chu miin a hmuh a, a thup hmang a, a lâwm leiin a feh a, a nei po po chu a va zawr a, chu lo chu ân châwk tah a.

⁴⁵ “Chun, vân ram chu sumdâwng mi lunghlu ṭhatak zawngtu ang chu a ni nâwk a,

⁴⁶ chun, ama chun lunghlu hlutak pakhat a hmuh a, a fe tah a, a nei po po chu a va zawr a, ân châwk tah a.

⁴⁷ “Chun, vân ram chu lênkhang tuisuorieta dênga, chi tinrêng fûn khâwmna ang chu a ni nâwk bawk a.

⁴⁸ Chu chu a sip phingleh va- pangah an hnûk dawk a; chun, an ṭhung a, a ṭha po chu bâwmah an lâk khâwm a, a sie ruok chu an pei a.

⁴⁹ Khawvêl tâwp pha chun chuong ang bawk chun la um a tih; vân- tirkohai chu hung suok an ta, mi fel laia inthawkin mi suol hai chu ṭhêng an ta,

⁵⁰ rawtuina meia chun pei an ta; chutaka chun ṭap le harâwt chu um a tih,” a ta.

⁵¹ Chun, Isûn an kuomah, “Chuong po po chu in hriet am?” a ta. Anni chun a kuomah, “Hre e,” an ta.

⁵² Chun, ama chun an kuomah, “Chuong a ni chun Dân inchûktirtu vân ram lampui inchûktira um taphawt chu, in neitu, a ro bâwma inthawka thil tharhai le, thil hluihai phawr dawk hlaktu ang chu a nih,” a ta.

Isu Nazaretha kei dawka a um

⁵³ Chun, Isûn chuong tekhithuhai chu a hril zo phingleh, chutaka inthawk chun a fe tah a.

⁵⁴ Chun, a umna khuo tieng chu a tlung a, an inkhawmna ina chun anni ân chûktir tah a; chuongchun, mak an ti hle a. “Hi mipa hin, hieng varna le, thilmak thaw theinahai hi, khâw- laia inthawka a hmu am a ni leh?

⁵⁵ Hi mi pa hi thingrem siemtu naupa kha a ni naw am a nih? A unauhai khawm, Jakob, Josef, Simon, Juda an tihai chu an ni naw am a nih?

⁵⁶ A farnuhai khawm ei kuoma um an ni vawng a ni naw am a nih? Hi mi hin khâwlaia inthawk hrima hieng po po hi a hmu am a na?” an ta.

⁵⁷ Chuongchun, a chungah an lungni ta nawh a. Nisienlakhawm, Isûn an kuomah, “Zâwlnei chu ama khuo tieng le ama ina chau naw chu inpâk loin a um ngai nawh,” a ta.

⁵⁸ Chun, an ring naw leiin chutaka chun thilmak tam a thaw ta nawh a.