LEVI DÂN 9 - Pathien Lekhabu Inthieng (BSI)

Aronin inthâwina a inhlânhai

¹ A ni riet ni chun Mosie chun Aron le a naupasalhai le Israel upahai chu a ko a;

² Aron kuoma chun, “Suol in- thâwina dingin bâwngte a chal, le pumrawhmang thilinhlân dingin berâmchal demkailo ve ve kei la, LALPA hmaa chun inhlân rawh.

³ Chun, Israel thlahai kuoma chun, ‘Suol inthâwina dingin kêlchal, pumrawhmang thilinhlân dingin bâwngte le berâmte kum khat mi ve ve demkailo ṭhieu,

⁴ le bâwngchal le berâmchal LALPA hmaa inremna thilinhlân dinga inhlân dingin hung kei unla; hrieka hmet fâkmi thilinhlân leh, vawisûn hin in kuomah LALPA a hung inlang ding a nih,’ tiin hril rawh,” a ta.

⁵ Chun, Mosien thu a pêk ang chun intuokna puon in tuola chun an hung kei a; chun, mi po po chun an va hnai a, LALPA hmaa chun an va ngîr a.

⁶ Mosie chun, “Hi hi a nih, in thaw dinga LALPAIN thu a pêk cheu kha; chuongchun, LALPA ropuina chu nangni lai hung inlang a tih,” a ta.

⁷ Chun, Mosie chun Aron kuomah, “Mâichâm kha hung hnai la, i suol inthâwina dâm, i pumrawhmang thilinhlân dâm inhlân la; nangma ta ding le mipuihai ta dingin intlanna siem rawh; chun, mipuihai thilinhlân chu inhlân la, intlanna siempêk rawh, LALPAIN thu a pêk ta angin,” a tih a.

⁸ Chun, Aron chun mâichâm chu a va hnai a, ama puola suol inthâwina bâwgte chu a that a.

⁹ Aron naupasalhai chun thisen chu a kuoma chun an inhlân a, thisena chun a kutpâr chu ân chieh a, mâichâm kihaia chun a nâl a; thisen chu mâichâm bula chun a bunthlâk a;

¹⁰ suol inthâwina thâu dâm, a kal dâm, a thin tuomtu duorda dâm chu mâichâm chunga chun a rawh a, LALPAIN Mosie thu a pêk ang khan.

¹¹ A sa le a vun chu riebûk puoah a rawh a.

¹² Chun, pumrawhmang thilin- hlân chu a that a, Aron naupasalhai chun thisen chu ama an pêk a, ama chun mâichâm chu a the huol a.

¹³ Pumrawhmang thilinhlân sa tlin chu a tum tumin a lu leh an pêk a, ama chun mâichâma chun a lo rawh a.

¹⁴ A sûnghai le a kehai chu a sâwp a, mâichâm chunga chun pumraw- hmang thilinhlân leh a rawh a.

¹⁵ Chun, mipuihai thilinhlân chu ân hlân a; mipuihai ta dinga suol inthâwina kêl chu a kei a, a that a, a hmaa mi ang bawk khan suol inthâwina ding chun ân hlân a.

¹⁶ Chun, pumrawhmang thilin- hlân chu ân hlân a, a dân ang peiin ân hlân a nih.

¹⁷ Chun, fâkmi thilinhlân chu ân hlân a, chutaka mi chu a vei khatin a lâk a, zingkâr pumrawhmang thilin- hlân ti naw khawm chu mâichâma chun a raw bawk a.

¹⁸ Mipui puola inremna inthâwina thilinhlân bâwngchal le berâmchal chu a that bawk a; Aron naupasalhai chun a thisen chu an pêk a, mâichâm chu a the huol a.

¹⁹ Bâwngchal thâu le berâmchal thâu dam, a mei thâu tak dâm, a rîlbawtu dâm, a kal dâm, a thin tuom- tu duorda dâm chu an pêk bawk a.

²⁰ A thâu chu a ir chunga chun an sieh a; ama chun a thâu chu mâi- châma chun a lo rawh a.

²¹ A ir le a mal changtieng ruok chu Aron chun LALPA hmaa thêna thilinhlân dingin a thên a, Mosie thupêk angin.

²² Chun, Aron chun mipui tieng a bân a phar a, mal a sâwm tâwl a; suol inthâwina le pumrawhmang thilin- hlân le inremna thilinhlân ân hlân zo chun a hung ṭum a.

²³ Chun, Mosie le Aron chu in- tuokna puon ina chun an va lût a; an hung suok nâwk a, mipuihai chu mal an sâwm a; chun, LALPA ropuina chu mi po po chunga chun a hung inlang tah a.

²⁴ LALPA hmaa inthawk chun mei a hung suok a, pumrawhmang thilinhlân le a thâuhai chu mâichâma chun a kâng hmang tah a; chu chu mipui po poin an hmu chun an khêk dur dur a, an bawkkhup ta ṭhuop a.