LEVI DÂN 4 - Pathien Lekhabu Inthieng (BSI)

Suol Inthâwina

¹ LALPA chun Mosie a biek a,

² “Israel thlahai chu hril la, an kuomah, ‘LALPAIN thawlo dinga thu a ipêkhaia hin, a ienga khawm miin suksuol palin, a ieng ieng khawm hi lo thaw ta sienla,

³ a suksuoltu chu hriek nâla um thiempu a nih a, mipuihai chungah thiemnaw inchangna ân tlungtir chun, a thil suksuol tah suol in- thâwina ding chun, LALPA kuomah bâwng tuoi demkailo inhlân raw se.

⁴ Bâwng chu intuokna puon in kawtkhâr bulah LALPA hmaa chun hung kei a ta, a lu chungah a kut innghat a ta, LALPA hmaah bâwng chu a that ding a nih.

⁵ Hriek nâla um thiempu chun bâwng thisen ieng zât amani chu lâng a ta, intuokna puon ina chun hung chawi a ta;

⁶ thiempu chun thisena chun a kutpâr inchieng a ta, hmun inthieng puonzâr hmaa chun, LALPA hmaah vawi sari thêng a tih.

⁷ Chun, thiempu chun a ṭhen chu LALPA hmaah, intuokna puon ina riminhniktak mâichâm kihaia chun thisen chu tlâwmte nâl a tih; chun, bâwngchal thisen la um po chu intuokna puon in kawtkhâr kâwla pumrawhmang thilinhlânna mâi- châm bula chun a bunthlâk ding a nih.

⁸ Chun, suol inthâwina bâwngchal thâu po po chu la vawng a ta, a sûng thâu le a rîlbawtu po po leh,

⁹ a kal pahnihai le a tuomtu duorda a diemnêma mi le a kalhai pumin a thin tuomtu duorda le chun,

¹⁰ inremna thilinhlânna bâwng- chala mi angin phawr vawng a ta, thiempu chun pumrawhmang thilin- hlânna mâichâma chun a raw ding a nih.

¹¹ Chun, bâwngchal vun le, a sa po po le, a lu le, a kehai le, a sûnghai le a êk leh;

¹² bâwngchal pumpui el chu, rie- bûk puotieng hmun faiah vut bunthlâkna hmuna chun hung lâng a ta, thing chungah meiin a raw ding a nih; vuthai bunthlâkna hmun ngeia chun raw a ni ding a nih.

¹³ “Chun, Israel mi po poin an suksuol pal a, mipui mithmua thupa umin, LALPAIN thaw lo dinga thu a pêkhai, a ieng khawm chu an thawh a, thiemnaw an chang a,

¹⁴ an thil suksuol chu hriet suok a ni chun, mipuiin suol inthâwina ding- in bâwng tuoi inhlân an ta; intuokna puon in tuola chun an hung kei ding a nih.

¹⁵ Chun, mipuihai upahai chun LALPA hmaah bâwng lu chunga chun an kuthai innghat an ta, bâwng chu LALPA hmaa chun that ding a nih.

¹⁶ Chun, hriek nâla um thiempu chun intuokna puon ina chun bâwng thisen aṭhen chu hung chawi a ta;

¹⁷ thiempu chun thisena chun a kutpâr inchieng a ta, puonzâr bulah LALPA hmaa vawi sari a the ding a nih.

¹⁸ Chun, thisen aṭhen chu intuok- na puon inah LALPA hmaah mâi- châm kia chun nâl a ta, thisen la um po chu intuokna puon in kawtkhâr kâwlah pumrawhmang thilinhlânna mâichâm bula chun a bunthlâk ding a nih.

¹⁹ A thâu po po chu la vawng a ta, mâichâma chun a raw ding a nih.

²⁰ Chuong ang chun bâwng chu thâwng a ta; suol inthâwina bâwng a thaw ang charin hi khawm hi a thaw ding a nih; chun, thiempu chun intlanna siempêk a ta, ngaidam ni tâng an tih.

²¹ Chun, bâwng chu khawhnâwm tieng fepui a ta, bâwng hmasa a raw ang khan a raw ding a nih; chu chu mipuihai ta dinga suol inthâwina a nih.

²² “Rorêltuin thil a suksuol a, LALPA a Pathienin thaw lo dinga thu a pêkhai po po kha a ieng ieng khawm a thaw pal a, thiemnaw a chang a,

²³ a thilsuol thaw chu inhriettir a ni chun a thilinhlânah kêlchal, demkailo hung kei a ta;

²⁴ kêl lu chunga chun a kut in- nghat a ta, LALPA hmaa pumraw- hmang thilinhlân an thatna hlaka chun a that ding a nih; chu chu suol inthâwina a nih.

²⁵ Chun, thiempu chun suol inthâwina thisen chu a kutpârin tlâwmte lâng a ta, pumrawhmang thilinhlânna mâichâm kihaia chun nâl a ta, pumrawhmang thilinhlânna mâichâm bula chun a thisen la um po chu a bunthlâk ding a nih.

²⁶ A thâu po po chu intlanna thilinhlân inthâwina thâu a raw angin mâichâma chun a raw ding a nih; chun, a suol chungchâng thua chun thiempu chun intlanna siempêk a ta, ngaidam nîng a tih.

²⁷ “Vantlâng laia mi tukhawmin LALPAIN thaw lo dinga a thupêkhai a ienga khawm suksuol palin, thiem- naw lo chang ta sienla,

²⁸ thil a suksuol chu inhriettir a ni chun a thilinhlânah kêl, a pui dem- kailo, a thil suksuol tah suol in- thâwina dingin a hung kei ding a nih.

²⁹ Suol inthâwina ding lu chunga chun a kut innghat a ta, pum- rawhmang thilinhlânna hmuna chun suol inthâwina chu a that ding a nih.

³⁰ Thiempu chun thisen chu a kutpârin tlâwmte lâng a ta, pum- rawhmang thilinhlân mâichâm kihaia chun nâl a tih; a thisen la um po chu mâichâm bula chun a bun- thlâk ding a nih.

³¹ Chun, a thâu po po chu intlanna thilinhlân thâu an lâk angin la vawng a ta; chun, thiempu chun LALPA ta dinga rim inhnikah mâichâma chun a raw ding a nih; chun, thiempu chun intlanna chu siempêk a ta, ngaidam nîng a tih.

³² “Suol inthâwina dinga a thil- inhlâna berâmte a hung chawi chun, a la demkailo a hung chawi ding a nih.

³³ Suol inthâwina lu chunga chun a kut innghat a ta, pumrawhmang thilinhlân an thatna hmuna chun suol inthâwina dingin a that ding a nih.

³⁴ Thiempu chun suol inthâwina thisen chu a kutpârin tlâwmte lâng a ta, pumrawhmang thilinhlânna mâi- châm kiahai chun nâl a ta, a thisen la um po chu mâichâm bula chun bunthlâng a tih.

³⁵ A thâu po po chu, berâmte thâu intlanna thilinhlân inthâwinaa mi lâk angin la vawng a ta; chun, thiem- pu chun LALPA ta dinga mei hmanga thilinhlân angin mâichâmah a raw ding a nih; chun, thiempu chun a thil suksuol ta chungchânga chun in- tlanna siempêk a ta, ngaidam nîng a tih.