LEVI DÂN 3 - Pathien Lekhabu Inthieng (BSI)

Inremna Thilinhlân

¹ “A thilinhlân chu inremna thilin- hlân inthâwina a na, bâwng ruol laia mi ân hlân chun, a pui amanih, a chal amanih khawm ni sien, LALPA hmaa demkailo ân hlân ding a nih.

² A thilinhlân lu chunga chun a kut innghat a ta, intuokna puon in kawt- khâr bula chun that a ta; chun, Aron naupasal thiempuhai chun mâichâm chu thisen chun an the huol ding a nih.

³ Inremna thilinhlân, inthâwinaa mi chu, LALPA ta dinga mei hmanga thilinhlâna dingin a sûng thâu le a rîlbawtu po po leh,

⁴ a kal pahni le a tuomtu thâu a diemnêma mi le a thin tuomtu duorda, a kalhai pum chun phawr a ta, ân hlân ding a nih.

⁵ Chun, Aron naupasalhai chun mâichâmah meia thing um chunga pumrawhmang thilinhlân chunga chun rawng an ta; chu chu LALPA ta dinga rim inhniktak mei hmanga thilinhlân a nih.

⁶ “Inremna thilinhlân inthâwinaa LALPA ta dinga thilinhlân chu berâm ruol laia mi a ni chun, a pui khawm ni sien, a chal khawm ni sien, demkailo ân hlân ding a nih.

⁷ A thilinhlâna berâmte ân hlân chun LALPA hmaa chun inhlân a ta;

⁸ a thilinhlân lu chunga chun a kut innghat a ta, intuokna puon in tuola chun that a ta; Aron naupasalhai chun mâichâm chu thisen chun an the huol ding a nih.

⁹ Chuongchun, inremna thilin- hlân, inthâwinaa mi, LALPA ta dinga mei hmanga thilinhlâna ding chun, a thâu dâm, a mei thautak a zângru bula tan a tluonin, a rîlbawtu thâu leh,

¹⁰ a kal pahni le a diemnêma mi le a thin tuomtu duorda, a kalhai puma phawrin ân hlân ding a nih.

¹¹ Thiempu chun chu chu LALPA kuoma mei hmanga bu thilinhlân dingin, mâichâma chun a raw ding a nih.

¹² “A thilinhlân chu kêl a ni chun LALPA hmaa chun inhlân a ta,

¹³ a lu chunga chun a kut innghat a ta, intuokna puon in tuola chun a that ding a nih; chun, Aron naupa- salhai chun mâichâm chu thisen chun an the huol ding a nih.

¹⁴ Chuongchun, chutaka a thilin- hlâna mi chu, LALPA kuoma mei hmanga a thilinhlân dingin, a sûng thâu le a rîlbawtu po po leh,

¹⁵ a kal pahnihai le a tuomtu thâu a diemnêma mi le a thin tuomtu duorda, a kalhai pum chun phawr a ta, ân hlân ding a nih.

¹⁶ Chun, thiempu chun chuonghai chu, riminhnik dingin, mei hmanga thilinhlânin mâichâma chun a raw ding a nih. A thâu po po chu LALPA chanpuol a nih.

¹⁷ Thâu amanih, thisen amanih in fâk naw ding a nih ti hi, in thlahai chena khawm in umna taphawta chun kumkhaw thuruot ngîrzing nîng a tih,’ ti rawh,” tiin.