LEVI DÂN 18 - Pathien Lekhabu Inthieng (BSI)

Um dân ṭha naw khapna

¹ LALPA chun Mosie a biek a,

² “Israel thlahai be la, an kuomah, ‘Kei hi LALPA in Pathien chu ka nih a.

³ In umna tah Aigupta ram mihai thaw ang kha thaw naw unla, ka ṭhuoi lûtna ding cheu Kanaan ram mihai thaw ang khawma thaw naw unla, an dân khawm zâwm bawk naw ro.

⁴ Ka rorêlhai chu pawmin, ka dân- hai chu hrawin in zâwm ding a nih; kei hi LALPA in Pathien chu ka nih.

⁵ Chuleiin, ka dân le ka rorêl chu in zâwm ding a nih; chu chu miin a thaw chun hring phâng a tih; kei hi LALPA chu ka nih.

⁶ “Tukhawma in sûng bulhai hrim hrim chu an saruokna hlîm dingin in pan ding a ni nawh; kei hi LALPA chu ka nih.

⁷ I pa saruokna chu i hlîm ding a ni nawh, chu chu i nu saruokna chu a nih; i nu a na, a saruokna i hlîm ding a ni nawh.

⁸ I pa nuhmei saruokna i hlîm ding a ni nawh, i pa saruokna a nih.

⁹ I farnu, i pa naunu amanih, i nu naunu amanih, i piengpui amanih, i piengpui naw amanih saruokna chu i hlîm ding a ni nawh.

¹⁰ I naupasal naunu amanih, i naunuhmei naunu amani saruokna chu i hlîm ding a ni nawh. An sa- ruokna chu nanga saruokna a ni sih a.

¹¹ I pa nuhmei naunu, i pa nei ngei saruokna chu i hlîm ding a ni nawh, i farnu a ni leiin.

¹² I pa farnu saruokna chu i hlîm ding a ni nawh, i pa sûng bul a nih.

¹³ I nu zuorpuinu saruokna chu i hlîm ding a ni nawh, i nu sûng bul a nih.

¹⁴ I pa unaupa saruokna chu i hlîm ding a ni nawh, chu umzie chu, a nuhmei chu i pan ding a ni nawh, i nu a nih.

¹⁵ I monu saruokna chu i hlîm ding a ni nawh, i naupa nuhmei a na, a saruokna i hlîm ding a ni nawh.

¹⁶ I unaupa nuhmei saruokna chu i hlîm ding a ni nawh, ama chu i unaupa saruokna a nih.

¹⁷ Nuhmei le a naunu saruokna chu i hlîm ding a ni nawh; a naupa naunu amanih, a naunu naunu amanih, a saruokna hlîm dingin i pan ding a ni nawh, i sûng bulhai an na, rîtlona nasatak a nih.

¹⁸ I nuhmei zuorpuinu saruokna i hlîm ding a ni nawh, a saruokna chu hlîm dingin i nuhmei dam sûng chun i nei kawp ding a ni nawh.

¹⁹ “Nuhmei a dân pângngaia a hul naw sûng chun a saruokna hlîm dingin i pan ding a ni nawh.

²⁰ Ama le insukpawrche dingin i tuolbâwm nuhmei chu i zâlpui ding a ni nawh.

²¹ Molek puola meia pei lût dingin i rîla ra hrim hrim chu i pêk ding a ni nawh a, i Pathien hming chu i suksiet ding a ni bawk nawh: Kei hi LALPA chu ka nih.

²² Nuhmei angin pasal hrim hrim i pâwl ding a ni nawh, thil tirdakum a nih.

²³ Insukpawrche dingin ran hrim hrim i pâwl ding a ni nawh, nuhmei tukhawm inpâwl dingin ran kuomah ân pêk ding a ni nawh, rîtlona chungchuong a nih.

²⁴ “Hieng thil a ienga khawm hin insukpawrche naw ro; hieng thil po poa in hmaa ka hnawt suok tah hnamhai chu an lo pawrche tah a,

²⁵ ram khawm chu a lo pawrche tah a nih; chuleiin, a rîtlona chu ka hrem a, ram chun a sûnga umhai chu a luok dawk ta vawng a.

²⁶ Nangni chun chu ka dânhai, ka rorêl dânhai in zâwm ding a nih; hieng thil tirdakumhai a ieng el khawm hi in thaw ding a ni nawh, a ram mi khawmin, ram dang mi in rama khawsa khawmin;

²⁷ (hieng thil tirdakum po po hi in hmaa hi rama lo umhai khan an lo thaw tah a, ram khawm chu a lo pawrche tah a nih);

²⁸ in hmaa hnam a luok dawk ang bawka in sukpawrche leia ram chun a luok dawk ve nawna ding cheuin.

²⁹ Tukhawm hieng thil tirdakum- hai a ieng ieng khawm thawtu taphawt chu an chipuihai laia in- thawka tuithlârin um an tih.

³⁰ Chuleiin, hieng an thil chîng tirdakumhai hi in chîng ve nawna dingin, thupêk hi in zâwm ding a nih; chuong thilhai chun insukpawrche ngai dêr naw ro: Kei hi LALPA in Pathien chu ka nih,’ ti rawh,” tiin.