LEVI DÂN 14 - Pathien Lekhabu Inthieng (BSI)

¹ LALPA chun Mosie a biek a,

² “Hi hi inphâr a inthien nia a thaw dân ding chu ning a tih: Thiem- pu kuoma ṭhuoi ding a na;

³ thiempu chu riebûk puotieng fe suok a ta, en a tih. Inphâr chu a phârna chu a dam ta chun,

⁴ thiempu chun, a inthienna ding chun, vate hring inthieng pahni le sidar thing le patzai sen le husop hung chawipêk ding thu pêng a ta;

⁵ thiempu chun vate pakhat pil bêlah vadung tui luong chunga that dingin thu pêng a tih.

⁶ Vate hring ruok chu, sidar thing dâm, patzai sen dâm, husop dâm le chun chawi a ta, vadung tui chunga vate thata um thisena chun phûm vawng a ta;

⁷ inphârnaa inthawka inthien ding chu, thisen chun vawi sari thêng a ta, ân thieng tah tiin phuong a ta; chun, vate hring chu ramah insuong a tih.

⁸ Chun, a inthien ding chun a puonhai sâwp a ta, invaw fai vawng a ta, an sil ding a nih; chuongchun, inthieng hung nîng a ta; chu zo chun riebûkah fêng a ta, amiruokchu, a puon in puoa chun ni sari a um ding a nih.

⁹ Chun, a ni sari ni chun a lu sam po po le a khâkhmul le, a mitkho hmul dâm vaw kawl a ta, a hmul po po chu vaw fai vawng a ta; chun, a puonhai sâwp a ta, ân sil ding a nih; chuongchun, inthieng hung ni tâng a tih.

¹⁰ “Chun, ni riet ni chun berâmte a chal pahni demkailo le berâmte a la pakhat, demkailo kum khat mi le, fâkmi thilinhlân dinga beiphit indi- tak epha hmun sâwma ṭheha hmun thum hrieka hmet le hriek limlai khat a chawi ding a nih.

¹¹ Chun, ân thientu thiempu chun a inthien ding le chuong thilhai chu intuokna puon in kawtkhâr bulah LALPA hmaah sieng a tih.

¹² Thiempu chun berâmte pakhat chu hriek limlai khat le chun lâng a ta, bawsiet inthâwina dingin inhlân a tih; LALPA hmaa thêna thilinhlân dingin a thên ding a nih.

¹³ Chun, suol inthâwina le pum- rawhmang thilinhlân an thatna hlak hmun, hmun inthienga chun berâmte chal chu a that ding a nih; suol inthâwina ang bawkin bawsiet in- thâwina khawm chu thiempu chan- puol a nih a; thil inthiengtak a nih.

¹⁴ Thiempu chun bawsiet inthâwi- na thisen chu lâng a ta, inthien ding nakâwr changtieng hmawra dâm, a kut changtieng kutpuia dâm, a ke changtieng kepuia dâm thiempu chun nâl a tih.

¹⁵ Chun, hriek limlai khat chu thiempu chun lâng a ta, ama vawitieng kutphaa chun sung a ta;

¹⁶ a kut vawitienga hrieka chun a changtieng kutpâr phûm a ta, hriek chu LALPA hmaah a kutpârin vawi sari thêng a tih.

¹⁷ Chun, a kuta hriek la um ṭhenkhat chun inthien ding chu a nakâwr changtieng hmawr dâm, a kut changtieng kutpui dâm, a ke changtieng kepui dâma bawsiet in- thâwina thisen chunga chun nâl a tih.

¹⁸ Chun, thiempu chun a kuta hriek la um po chun, inthien ding lu chu nâl a tih. Chun, thiempu chun LALPA hmaah intlanna a siempêk ding a nih.

¹⁹ Chun, thiempu chun suol in- thâwina chu inhlân a ta, ân thieng- nawna leia inthien ding chu intlanna siempêk a tih. Chu zo chun, pum- rawhmang thilinhlân chu that a ta;

²⁰ chun, thiempu chun pumraw- hmang thilinhlân le fâkmi thilinhlân chu mâichâma chun inhlân a ta, thiempu chun intlanna siempêk a tih; chuongchun, inthieng hung ni tâng a tih.

²¹ “Chun, mi pasie a nih a, chuong ang chu a tlin naw chun, berâmte a chal pakhat bawsiet inthâwina ding, intlanna siempêkna ding thên ding le, fâkmi thilinhlân dingin beiphit inditak epha hmun sâwma ṭhea hmun khat, hrieka chawkpawl, hriek limlai khat leh chawi a ta;

²² chun, vaṭhu tuok khat amanih, pârvate tuok khat amanih, a nei thei lem lem chu pakhat chu suol in- thâwina ding, a dang chu pum- rawhmang thilinhlân dingin.

²³ Ni riet ni chun a inthienna dingin thiempu kuomah intuokna puon in kawtkhâr bulah LALPA hmaah a hung chawi ding a nih.

²⁴ Chuongchun, thiempu chun bawsiet inthâwina berâmte le hriek limlai khat chu lâng a ta, thêna thilinhlân dingin LALPA hmaah thiempu chun thên a tih.

²⁵ Bawsiet inthâwina berâmte chu that a ta; thiempu chun bawsiet inthâwina thisen chu lâng a ta, inthien ding nakâwr changtieng hmawra dâm, a kut changtieng kut- puia dâm, a ke changtieng kepuia dâm nâl a tih.

²⁶ Thiempu chun hriek iemani tâwk ama kutpha vawitienga chun bun a ta;

²⁷ a kut vawitienga hriek ṭhen- khat chu a kut changtiengin LALPA hmaah vawi sari thêng a tih.

²⁸ Chun, thiempu chun a kuta hriek chun inthien ding nakâwr changtieng hmawra dâm, a kut changtieng kutpuia dâm, a ke changtieng kepuia dâma bawsiet inthâwina thisen chung taka chun nâl a ta;

²⁹ chun, thiempu kuta hriek la um po chun LALPA hmaa intlanna siempêk dingin, inthien ding lu a nâl ding a nih.

³⁰ Chun, vaṭhu amanih, pârvate amanih, a nei thei lem lem pakhat chu inhlân a ta; a nei thei lem lem taphawt,

³¹ suol inthâwina dingin pakhat, pumrawhmang thilinhlâna dingin pakhat, fâkmi thilinhlân leh; chun, thiempu chun inthien ding chu LALPA hmaa chun intlanna siempêk a tih.

³² Hi hi inphârna hri invawi, inthienna dân ang tlin nawhai ta dinga dân a nih,” tiin.

³³ LALPA chun Mosie le Aron a biek a,

³⁴ “Hluo dinga ka pêk cheu Kanaan ram in hluo pha, in hluo ding in khawlaia khawm inphârna hri ka sie chun,

³⁵ chu in neitu chun, ‘Hi ina hin hri ṭhenkhat um âwmin ka hriet,’ tiin thiempu a hung hril ding a nih.

³⁶ Chun, thiempu chu hri en dinga a lût hma chun, in sûnga thil umhai po po chu inthieng loa a um nawna dingin, in chu sukruok dingin thiempu chun thu pêng a ta; chu zo chun thiempu chu in en ding chun lût a tih.

³⁷ Chun, hri chu en a ta; hri chun a hring tieng amanih, a sen tieng deu amaniha banga chun a lo kai a, bang chu a phaia ân lang ta chun,

³⁸ thiempu chu ina inthawk chun kawtkhârah suok a ta, in chu ni sari khâr a tih.

³⁹ Chun, ni sari ni chun, thiempu chun va en nâwk a ta; hri chu banga chun a lo indar lien chun,

⁴⁰ hri umna lung chu lâk suok a, khawhnâwmah hmun pawrchea pei dingin thiempu chun thu pêng a ta;

⁴¹ chun, in sûng tieng chu inziet vêltir a ta, chun lung chârna an ziet khawk chu khawhnâwmah hmun pawrchea bawk chun bun thlâng a ta;

⁴² chun, lung dang lâng an ta, chuong lunghai hmuna chun sieng an tih; chun, lung chârna dang lâng a ta, in chu châr a tih.

⁴³ Chun, lung a lâk suok a, in chu a phâwk a, a ziet hnunga hri chu ina a hung suok nâwk chun,

⁴⁴ thiempu chu va fêng a ta, en nâwk a tih; hri chu ina chun a lo indar lien chun, chu ina inphârna hri chu a det chi a na, ân thieng naw a nih.

⁴⁵ In chu ṭhiek a ta, a lunghai, a thinghai le a chârnahai po po khawm; chun, khawhnâwmah hmun pawr- cheah thak hmang a tih.

⁴⁶ Tukhawm chu in chu khâr a ni sûng hrim hrima lût chu zântieng chenin inthieng naw ni bawk a tih.

⁴⁷ Tukhawm chu ina zâl taphawt chun a puonhai sâwp a tih. Tukhawm chu ina bu fa taphawt khawmin a puonhai a sâwp ding a nih.

⁴⁸ “Chun, thiempu chu a lût a, a hang en vêl a, in chu phâwk ṭhat a ni hnunga hri chu a lo indar lien naw chun, in chu ân thieng a nih ti thiempu chun a phuong ding a nih, hri chu ân kieng ta leiin.

⁴⁹ In inthienna ding chun vate pahni le sidar thing le patzai sen le husop a chawi ding a nih.

⁵⁰ Vate chu pil bêlah vadung tui chungah that a ta,

⁵¹ sidar thing le husop le patzai sen chu vate hring le chun lâng a ta, vate thata um tah thisena le vadung tuia chun phûm a ta; in chu vawi sari thêng a tih.

⁵² Chuong ang chun, vate thisen dâm, vadung tui dâm, vate hring dâm, sidar thing dâm, patzai sen dâm chun in chu inthien a tih.

⁵³ Vate hring ruok kha chu khuoa inthawkin ramhnuoiah invuong suoktir a tih; chuongchun, in inthien- na chu siem a ta, in chu hung inthieng tâng a tih.

⁵⁴ “Hi hi inphârna chi tinrêng le inbuotna hri ta dinga dân chu a nih;

⁵⁵ puona inphârna hri um le ina mi dâm,

⁵⁶ ân vûng dâm, a puor suok dâm, a hmun hmuna inlang dâm,

⁵⁷ ân thieng le ân thieng naw inhrietna dingin. Hi hi inphârna chungchânga dân chu a nih,” tiin.