LEVI DÂN 10 - Pathien Lekhabu Inthieng (BSI)

Nadab le Abihu suolna

¹ Aron naupasalhai Nadab le Abihu chun an mei lâkna chu an lâk ve veh a, chutaka chun meiling chu an sieh a, riminhnik chu an phul a, LALPA hmaah thu a pêk naw dântakin mei inthiengnaw an in- hlân a.

² Chuongchun, LALPA hmaa in- thawkin mei a hung suok a, anni chu a kâng hlum a, LALPA hmaa chun an thi tah a.

³ Chuongchun, Mosie chun Aron kuomah, “Hi hi a nih LALPAIN, ‘A mi hnaituhaia chun inthiengin inlang ka ta, mipui po po hmaa chun chawi- mawiin um ka tih,’ tiha a hril kha,” a tih a. Aron chu a to zing a.

⁴ Chun, Mosie chun Aron pami Uzziel naupa Misael le Elzaphan chu a ko a, an kuomah, “Hung hnai unla, in unauhai hi hmun inthienga inthawk hin riebûk puoah zâwn dawk ro,” a ta.

⁵ Chuongchun, an hung hnai a, zakuo hâk pumin riebûk puoa chun, Mosie hril angin an zâwn dawk a.

⁶ Mosie chun Aron kuoma le a naupasalhai Eleazar le Ithamar kuoma chun, “A sûnnain in sam inthla naw unla, in puonhai keithlêr bawk naw ro, chuong naw chun thi rawi in ta, mi po po chungah lung- insen rawi a tih; in unauhai Israel sûngkuo pumpuiin LALPA isêm chawk mei chu sûn lem raw se.

⁷ Chun, intuokna puon in kawt- khâra chun in suok ding a ni nawh, chuong naw chun thîng in tih; LALPA hriek chu in chungah a um sih a,” a ta. Chuongchun, Mosie thu ang chun an thawh tah a.

Thiempuhai thil inser ding le an thaw ding

⁸ LALPA chun Aron chu a biek a,

⁹ “Nang amanih, i naupasalhai amani khawmin, intuokna puon in sûnga in fe laiin uoin le zu hrim hrim dâwn naw ro, chuong naw chun thîng in tih; hi hi in thlahai chena kum- khaw dân ding nîng a tih.

¹⁰ Chu chu ân thieng le ân thieng naw le, a thieng le a thieng naw in thlier theina ding le,

¹¹ LALPAIN Mosie hmanga an kuoma a hril, thupêkhai po po chu Israel thlahai în chûktir theina dingin nîng a tih,” tiin.

¹² Mosie chun Aron le a naupasal la dam hai, Eleazar le Ithamar kuoma chun, “LALPA kuoma mei hmanga thilinhlâna mi, fâkmi thilin- hlân lâk mahlahai chu la unla, mâichâm bulah chawl ṭhangloin fa ro, thil inthieng a ni sih a.

¹³ LALPA kuoma mei hmanga thilinhlâna i chanpuol le i naupa- salhai chanpuol a ni leiin hmun inthiengah in fâk ding a nih; chuong anga chu thu pêk ka nih.

¹⁴ A ir thêna thên le a mal dawm- kânga inhlân ruok chu hmun faiah in fâk ding a nih; nang le i naupasalhai le i naunuhmeihai leh; Israel thlahai inremna thilinhlân inthâwinaa i chanpuol le i naupasalhai chanpuola ruot a ni sih a.

¹⁵ A mal dawm kâng le a ir thên chu LALPA hmaa a thêna thên thilinhlân dingin mei hmanga thilin- hlân thâu leh an hung chawi ding a nih; chu chu nang le i naupasalhai leh kumkhuoa in chanpuol ding nîng a ta, LALPA thupêk ang khan,” a ta.

¹⁶ Mosie chun suol inthâwina kêl chu nguntakin a zawng a; chun, ngai ta, an lo raw zo dêr tah a na; chuong- chun, Aron naupasal la dam Eleazar le Ithamar chunga chun a lungin- sen a,

¹⁷ “Iengdinga suol inthâwina chu hmun inthienga in fâk naw am a na? Hi hi thil inthieng tak, mipui rîtlona in phur theina dinga a pêk cheu, LALPA hmaa intlanna in isiempêk dinga a pêk cheu a ni sih a.

¹⁸ Ngai ta u, a thisen chu hmun inthienga chun in lâk lût lêm; thu ka pêk ang khan hmun inthienga chun in fâk ngei ding a nih in sawnnaw,” tiin.

¹⁹ Chun, Aron chun Mosie kuom- ah, “Ngai ta, vawisûn hin LALPA hmaah an suol inthâwina le, an pum- rawhmang thilinhlân chu an inhlân a na, hieng ang thil hi ka chungah a hung um el ta sih a! Vawisûn hin suol inthâwina chu lo fa ta lang, LALPA mithmuah pawm tlâk a ni chuong ding am a nih?” a ta.

²⁰ Mosien chu chu a hriet chun a lungawi tah a.