KOLOSSA 1 - Pathien Lekhabu Inthieng (BSI)

Chibai bûkna

¹ Paula, Pathien dit zâwnga Krista Isu tirko le Timothe, ei unaupa chun:

² Kolossaa Kristaa mi inthienghai le unau ringumhai kuoma chun, Pathien ei Pa kuoma inthawka lunginsietna le inremna in kuomah um raw se.

Lâwmthu hrilna le ṭawngṭaina

³ In ta dinga ṭawngṭai rawpin, Pathien ei Lalpa Isu Krista Pa kuoma chun lâwmthu kan hril hlak:

⁴ Chu chu, Krista Isua in ringna le mi inthieng po pohai chunga in hmangaina chu kan lo hriet leiin le,

⁵ vâna in ta dinga beiseina siepêka in um leiin a nih a; Chanchin Ṭha thutak thua in lo hriet ta lei khan a nih.

⁶ Chu Chanchin Ṭha chu, khawvêl pumpuiah malsâwmna hung intlunin a pung pei a; chuong ang takin in kuoma khawm a hung tlung a; titakzeta Pathien lunginsietna chu ngaia in hriet ni chena inthawk khan chu nangnia khawm rain a pung pei a ni kha.

⁷ Epaphra, kan suok chanpui dittaka inthawka in inchûk ngei kha a nih. Ama hi kan aiawa Krista rawngbâwltu ringumtak a na.

⁸ Thlarauin nangnia hmangaina ân neitir cheu thu keini mi hriltu kha a ni bawk.

⁹ Chuleichun, Thlarau tieng varna le hriet theina po poa a dit zâwng hrietnaa chun in hung sip theina dingin, kan hriet nia inthawk chu keini khawma ṭawngṭai le hnipêk cheu kan ma nawh a.

¹⁰ Chuongchun, sinthaw tinrênga hung rah a, Pathien hrietna kawnga hung inṭhang deu deu a, kawng tinrênga ama suklungawi dinga Lalpa zui tlâka in um theina ding le,

¹¹ hlimtaka selna le dawtheina tinrêng nei dinga a ropuina hrâtzie ang peia hrâtna tinrênga sukhrâta in um theina dingin kan ngênpêk cheu.

¹² Pa, vara mi inthienghai ro chu inṭâwmpui tlâka mi hung siemtu, kuoma chun lâwmthu hril pei bawkin.

¹³ Ama chun inthim thuneinaa in- thawka mi sansuokin, a Naupa hmangaitak rama chun a mîn kai tir tah a,

¹⁴ amaa chun ei intlanna ei hmu a nih-ei suolhai ngaidamna chu

Krista mizie le a sinthaw

¹⁵ Ama chu hmu thei naw Pathien angpui, nau lutîr, thilsiemhai po po nêka chunghnung lem a nih.

¹⁶ Amaa chun iengkim siem a ni sih a; vâna umhai, hnuoia umhai leh, hmu thei lo le hmu theihai le chun, lalṭhungphahai khawm, rorêlnahai khawm, inlalnahai khawm, thunei- nahai khawm, iengkim amaa chun, ama ta ding bawka siem a nih.

¹⁷ Chun, ama hi chu iengkim um hmain a um hrim a nih, amaa chun iengkim a ngir khâwm bawk a nih.

¹⁸ Ama chu a taksa -- Kohran lu a na, iengkima a chunghnung tak a hung ni theina dingin, a bulpui, mithi laia inthawka tho hmasatak chu a nih.

¹⁹ Pa lungni zâwngtak chu hi hi a ni sih a: Pathien famkimna tinrêng chu amaa a um zing le,

²⁰ a kraws thisen chun inremna hung siemin, amaa chun iengkim, ama ngeia chun hnuoia thil umhai le vâna thil umhai khawm, ama le inremtir hi.

²¹ Chun, nangni inhmaa in thil suksuolnaa khan amaa inthawka ṭhein in lo um a, in lungrila chun hmêlma in lo ni bawk kha.

²² Nisienlakhawm, tuhin chu a taksa thina ngei khan ama leh ân remtir ta cheu a nih, a hmaa chun inthiengtak le hmêlhemlo le, sawisêl boa ân ngirtir theina ding cheuin.

²³ Amiruokchu, in ringna chun innghatsan neiin dettakin in um ding a nih. Chanchin Ṭha in ihriet beiseinaa inthawk sawn hmangin um naw ro. Chu Chanchin Ṭha chu vân hnuoia thilsiem po po laia tlângin- sampui a ni kha; kei Paula hi, chu rawngbâwltua siem chu ka nih.

Kohrana Paula rawngbâwlna

²⁴ Tuta ka tuorpêkna cheua hin ka lâwm a, Krista rinum tuor bâk chu a taksa leiin ka taksaa hin ka sunzawm pei a nih, a taksa chu kohran hi a nih.

²⁵ Pathien thu hril kim dinga enkawlna sin Pathienin in ta dinga a mi pêk ang peiin chuonghai rawng- bâwltua siem ka nih.

²⁶ Chu Pathien thu chu chatuon le suon um chena inthawka thurûk inthup kha a nih; tu ruok hin chu a mi inthienghai kuoma inlangtirin a um tah.

²⁷ Chuonghai kuoma chun Jentail- hai lai chu thurûk ropuina hauzie chu Pathienin inhriettir a nuom hrim a nih: chu thurûk chu Krista nangnia um ropuina beisei san chu a nih.

²⁸ Mi tin Kristaa chun ṭha famkim- a kan inngîrtir theina dingin, mi tin infuiin, mi tin varna tinrênga inchûk- tirin a chanchin kan hril hlak hi;

²⁹ chuong anga inngîrtir thei dingin, nasataka keimaa sin a thaw, chu a sinthaw ang peia thaw ṭâlin, ka thaw hrim bawk hlak a nih.