JOSUA 6 - Pathien Lekhabu Inthieng (BSI)

Jeriko tlûkna chu

¹ Jeriko khuo chu Israel thlahai lei chun an khâr tlat a, tukhawm an suok nawh a, tukhawm an lût bawk nawh.

² Chun, LALPAIN Josua kuomah, “En ta, Jeriko le a lal le mi hrât huoisenhai hi i kutah ka pêk tah.

³ Râl kâp mi po po hin khawpui hi vêlin vawikhat chu hang vêl suok phawt in ta; chuong ang ruok chun ni ruk in thaw ding a nih.

⁴ Chun, thiempu pasariin bâwm hma tieng berâmchal ki tawtawrâwt pasari chawi an ta; chun, a ni sari ni chun khawpui chu vawi sari vêl suok in ta, chun, thiempuhai chun taw- tawrâwthai chu mût an tih.

⁵ Chun, berâmchal ki an mût rik ruoi ruoi a, tawtawrâwt ri in hriet pha chun, mipui po po chu inring- takin khêk dur dur raw se; chuong- chun, khawpui kul chu chim rup a ta, mipui chu mâni hma zâwn sengah chun hang fêng an tih,” a ta.

⁶ Chun, Nun naupa Josua chun thiempuhai chu a ko a, an kuomah, “Thuthlung bâwm hi zâwn unla, thiempu pasariin LALPA bâwm hmatienga chun berâmchal ki taw- tawrâwt pasari chawi raw se,” a ta.

⁷ Chun, ama chun mipuihai kuoma chun, “Fe pei unla, khawpui chu vêl suok ro, chun, inrâlthuomhai kha LAL- PA bâwm hmatieng fe pei raw se,” a ta.

⁸ Josuain mipuihai kuoma thu a hril zo chun LALPA hmaa berâmchal ki tawtawrâwt pasari chawi thiempu pasarihai chu an fe pei a, tawtawrâwt chu an mût a; chun, LALPA thu- thlung bâwm chun a zui a.

⁹ Chun, inrâlthuomhai chu taw- tawrâwt mûttu thiempuhai hmaa chun an feh a, chun a hnungdâlhai chun bâwm chu an sawm a, thiem- puhai chun fe malamin tawtawrâwt chu an mût pei a.

¹⁰ Chun, Josua chun mipuihai chu, “Khêk dêr naw unla, in râwl khawm hriet ni naw raw se, khêk dinga thu ka pêk ni cheu a tlung hmakhat chu in bâua inthawkin thu hrim hrim suok bawk naw sien, chu pha ruok chun chu khêk ro,” tiin thu a pêk a.

¹¹ Chuongchun, LALPA bâwm chun khawpui chu vêl khat ân vêl suoktir a; chun, riebûka chun an feh a, riebûka chun an riek tah a.

¹² Chun, Josua chu zingkâr in- hmatakin a tho a, thiempuhai chun LALPA bâwm chu an zâwn a.

¹³ Chun, LALPA bâwm hmaa be- râmchal ki tawtawrâwt pasari chawi thiempu pasarihai kha an fe pei a; tawtawrâwt an mût a; chun, inrâl- thuomhai chu an hmaah an feh a; chun, a hnungdâlhai chun LALPA bâwm chu an sawm a, thiempuhai chun, fe malamin tawtawrâwt an mût pei a.

¹⁴ Chun, a ni hni ni chun khawpui chu vawi khat an hang vêl suok nâwk a, riebûka chun an kîr nâwk a; chuong ang ruok chun ni ruk an thawh a.

¹⁵ A ni sari ni chun zîngkâr vâr- ṭienin an tho a, thaw dân pângngaiin vawi sari an vêl suok a, chu ni chau chun khawpui chu vawi sari an vêl suok a nih.

¹⁶ A vawi sarinaa thiempuhaiin tawtawrâwt an hang mût chun Josua chun mipuihai kuoma chun, “Khêk ro khai, LALPAIN khawpui hi a pêk ta cheu a nih.

¹⁷ Khawpui hi a sûnga thil um po po pumin suksiet dinga LALPA kuoma pumpêk vawng ding a nih; Rahab nawchizawr chau, ama le a in sûnga ama le um po pohai ruok chu ei mi tirhai kha a lo thuphmang leiin hla ding a nih.

¹⁸ Nangni ruokchu suksiet dinga thil pumpêka inthawk chun insie- kieng hlau ro, chuong naw chun, suksiet dinga thil pumpêk laia mi ieng khawm lo lain, Israelhai riebûk hi suksiet dingah siem in ta, lunginzîngna intlun hlau rawi in tih.

¹⁹ Tangkaruo dâm, rângkachak dâm, dâr le thîr bûrlebêlhai ruok chu a rêngin LALPA kuoma inthieng a na, LALPA sum inah an lût vawng ding a nih,” a ta.

²⁰ Chuongchun, mipuihai chu an khêk a, tawtawrâwthai mût an nih a. Tawtawrâwt ri an hang hriet phingleh, an khêk ta dur dur a, kul chu a chim hmât vawng a; chuong- chun, mi tin chu mâni hma zawn senga chun an feh a, khawpuia chun an lût a, khawpui chu an lâk tah a.

²¹ Khawpui sûnga mi po po nuhmei pasal, a chîn a lien, bâwng- chal dâm, sabengtung dâm leh kâwl- hnâmin an sât hlum vawng tah a.

²² Chun, Josua chun mi pahni ram va enthlatuhai kuoma chun, “Nâw- chizawr ina chun va lût unla, a kuoma ṭawng in lo inkhâm ta ang khan chu nuhmei chu a nei po po leh va ṭhuoi suok ro,” a ta.

²³ Chuongchun, enthlatu tlang- vâlhai chu an va lût a, Rahab le a pa le a nu leh, a unaupahai leh, a nei po pohai le chun an va ṭhuoi suok a, a laibung unauhai po po khawm an va ṭhuoi suok a, Israelhai riebûk puo- tienga chun an inumtir a.

²⁴ Chun, khawpui chu a sûnga thil um po po leh meiin an raw vawng a, tangkaruo dâm, rângkachak dâm, dâr le thîr bûr le bêlhai chau chu LALPA in sum inah an sieh a.

²⁵ Amiruokchu, Rahab nawchi- zawr le a nei po po le a pa sûnghai chu Josua chun a hla vawng a; chuong- chun, Israelhai lai chun tu chen hin a la ṭhang ta zing a nih, Josuain Jeriko khuo enthla dinga a tirhai kha a lo thuphmang leiin.

²⁶ Chuong lai chun Josua chun, “Hi Jeriko khuo hi hung indina hung bâwl taphawt chu LALPA hmaa chun ṭawngsephurin um raw se, a nau lutîr chu chânin a lungphûm chu phûm a ta, a nau mitlum chânin a kul kawtkhârhai chu indin a tih,” tiin anni chu a vau a.

²⁷ Chuongchun, LALPA chu Josua kuoma chun a um a, a ram pumpuia chun a hming a hung inthang tah a.