JOSUA 4 - Pathien Lekhabu Inthieng (BSI)

Lung sâwm le pahni Jordana inthawka an lâk

¹ Chun, a hnam pumpui chun Jordan an kai fai vawng hnungin LALPAIN Josua kuoma chun,

² “Mipuihai laia mi hi mi sâwm- pahni, hnam tina mi pakhat pei thlang suok la, an kuomah,

³ ‘Jordan vadung lailung, thiempu- hai ngîrna laitaka mi lung sâwmpa- hni la unla, put phei unla, riebûk, vawizâna in riekna dingah sie ro,’ tiin thu pe rawh,” tiin a hril a.

⁴ Chuongchun, Josua chun Israel thlahai laia mi sâwmpahni, hnam tina mi pakhat pei a thlang suokhai chu a ko a;

⁵ chun, Josua chun an kuomah, “LALPA in Pathien bâwm hmaa khan Jordan vadung lailungah fe unla, Israel thlahai hnam zât, hnam khat ta ding, mi tinin pakhat pei, lung pakhat seng in liengkoah put ro khai.

⁶ Nakie in nauhaiin, ‘Hieng lung- hai hi ieng inentirna am a na?’ tia an la hung indawn pha chun,

⁷ nangnîn an kuomah, ‘LALPA thuthlung bâwm hmaah Jordan tui- hai chu a hung intan ta lei a nih: chuongchun, hieng lunghai hi Israel thlahaiin kumkhuoa an hriet zingna ding a ni hi,’ in la ti ding a nih,” a tih a.

⁸ Chun, Israel thlahai chun Josua- in thu a pêk ang chun an thaw a, LALPAIN Josua kuoma a hril angtak chun, Israel thlahai hnam zât Jordan vadung lailunga mi lung sâwmpahni chu an lâk a; an riekna hmuna chun an put phei a, chutaka chun an sieh a.

⁹ Chun, thuthlungna bâwm zâwn- tu thiempuhai ngîrna lai tak, Jordan vadung lailunga chun Josua chun lung sâwmpahni a phun a, chuong chu tu chen hin a la um zing a nih.

¹⁰ Mosien Josua kuoma thu a lo pêk ta po po anga, LALPAIN mipui- hai kuoma hril dinga Josua thu a pêk chu thaw vawng a ni hmakhat chun thiempu bâwm zâwntuhai chu Jordan vadung lailunga chun an ngîr zing el a. Chuongchun, mipuihai chu an insukhmawh a, an kai tâwl tah a.

¹¹ Mipui po po chu an kai vawng hnung chun LALPA bâwm le thiem- puhai chu mipuihai mithmua chun an kai ve tah a.

¹² Reuben thlahai, Gad thlahai le Manasse hnam zâtvehai chu Mosien an kuoma a lo hril ta ang khan Israel thlahai hmaa chun inrâlthuom sain an kai a;

¹³ râlthuoma inthuom sa diem mi sîng li lai indo dingin Jeriko phaiahai chun LALPA hmaah an kai a nih,

¹⁴ Chu ni chun LALPAIN Josua chu Israelhai po po mithmua chun a chawimawi a, Mosie an ṭi ang bawk khan a dam sûng po chun ama chu an ṭi tah a.

¹⁵ LALPA chun Josua kuoma chun thu a hril a,

¹⁶ “Thiempuhai thuthlung bâwm zâwntuhai kha Jordan vadunga in- thawka hung suok ding thu pe rawh,” tiin.

¹⁷ Chuongchun, Josua chun thiempuhai chu “Jordan vadunga inthawk khan hung suok ta ro khai,” tiin thu a pêk a.

¹⁸ Thiempuhai LALPA thuthlung bâwm zâwntuhai chu Jordan vadung- a inthawka an hung suok a, thiem- puhai ke chun khawmuol chu a sir char leh Jordan tuihai chu an luong pângngaiin an hung luong nâwk a, a hma ang bawk khan a kuong sip chun a luong liem nâwk ta dum dum a.

¹⁹ Mipuihai chu thla khatna ni sâwm niin Jordan vadunga inthawk chu an suok a, Jeriko sak tieng pang- a Gilgala chun umhmun an khuor tah a.

²⁰ Chuong lung sâwmpahni, Jordan vadunga inthawka an put dawkhai kha Josua chun Gilgala chun a phun tah a.

²¹ Chun, Israel thlahai kuoma chun thu a hril a, “Nakie phaleh in thlahaiin an pahai, ‘Hieng lunghai hi ieng inentirna am a na?’ tia an la hung indawn pha chun,

²² ‘Israelhai chun Jordan vadung hi hnuoi hulah an kai a nih,’ tiin in thlahai chu in lân hriettir ding a nih.

²³ LALPA in Pathien chun inhmaa Tuipui Sen chu ei kai hmakhata ei hmaa a lo sukkangtan ta ang khan, LALPA in Pathienin Jordan tuihai hi in kai hmakhat chu in hmaah a sukkangtan ta a ni hi.

²⁴ Leihnuoia hnam tinrêngin LALPA kut hi a lo hrât a nih ti an hriet thei a, LALPA in Pathien chu kumkhuoa an ṭi theina dingin,” tiin.