JOSUA 24 - Pathien Lekhabu Inthieng (BSI)

Josua inthlâna thucha

¹ Chun, Josua chun Israel hnamhai po po chu Sekema chun a ko khâwm a. Israelhai upahai, an lusahai, an rorêltuhai, an hotuhai chu ân kotir a; Pathien hmaah an hung inlang tâwl a.

² Chun, Josua chun mi po po kuoma chun, “LALPA Israelhai Pa- thienin hieng ang hin a ti a nih, ‘In thlatuhai kha inhma laiin vadung khêla khan an um hlak a; Abraham pa le Nahor pa Tera meu khawm kha; anni chun pathien danghai rawng an bâwl hlak a.

³ Chun, in thlatu Abraham kha Vadung râla inthawk khan ka ṭhuoi suok a, Kanaan ram sûng po poa khan ka ṭhuoi a, a thlahai chu ka sukpung a, Isak kha ka pêk a; chun, Isak chu Jakob le Esau ka pêk a.

⁴ Chun, Esau chu a chanpuol dingin Seir tlâng ka pêk a, chun, Jakob le a nauhai kha Aiguptaah an zuk feh a.

⁵ Chun, Mosie le Aron ka tir a, Aigupta ram chu anni laia thilmak thawin ka hrem a; chu zoa chun ka ṭhuoi suok cheu a.

⁶ Chun, in thlatuhai chu Aigupta rama inthawkin ka ṭhuoi suok a; chun, tuipui in va tlung a, chuong- chun, Aigupta mihai chun in thlatu- hai chu tawlailîr le sakawr chung chuong mihai leh Tuipui Sen chenin an hnawt a.

⁷ Chun, anni chun LALPA an hang ko a, Aigupta mihai le an inkâr chu a hung sukthim ta mup a; chun, tuipui a hung intuomtir a; a chîm hmang tâwl tah a, chuongchun, Aigupta rama ka thilthaw kha in mit ngeiin in hmuh a; chun, thlalêra khan sâwttak in um a.

⁸ Chun, Jordan vadung râla um Amor mihai rama chun ka ṭhuoi cheu a; an lo do cheu a; chuongchun, in kutah ka pêk a, an ram chu in hluo tah a; chun, anni chu ka sukbohmang pêk cheu a.

⁹ Chun, Moab lal Zippor naupa Balak a hung inthawk a, Israel mihai chu a lo do a, chun, Beor naupa Balaam kha ṭawngsie inphurtir ding cheuin ân kotir a,

¹⁰ amiruokchu, Balaam thu kha ka lo ngai nuom nawh a, chuleiin, mal a sâwm ta lem cheu a; chuongchun, a kuta inthawk chu ka sansuok ta cheu a ni kha.

¹¹ Chun, Jordan vadung in kai a, Jeriko in hang tlung a; chun, Jerikoa mihai chun an lo do cheu a; Amor mihai, Periz mihai, Kanaan mihai, Hit mihai, Girgas mihai, Hiv mihai, Jebus mihai le khan, chuongchun, anni chu in kutah ka pêk a.

¹² Chun, in hmaah khuoingal ka tir a, chu chun in hmaah anni chu a hnawt a, Amor mihai lal pahnihai ngei kha; in kâwlhnâmin amanih, in thalngulin amani khawm a ni bawk nawh.

¹³ In isuksuok dêr lo, ram le nangni isiem dêr lo khawpuihai ka pêk cheu a, chuonga chun in um a; in iphun lo grêp huona mi le oliv huona mi dâm chu in fâk a,’ tiin.

¹⁴ Chuleiin, LALPA chu ṭi unla, titakzet le indiktakin a rawng bâwl unla, in thlatuhaiin Vadung râl le Aiguptaa a rawng an bâwl hlak pathienhai kha pei vawng unla, LALPA rawng chu bâwl ro.

¹⁵ Chun, LALPA rawng bâwl hi ṭha awm nawa in hriet chun vawisûn hin tu rawng am a na in bâwl ding thlang el ro; in thlatuhaiin Vadung râla a rawng an bâwl hlak pathienhai kha am a ni, in ihluo ram Amor mihai pathienhai kha? Kei le ka sûnghai ruok hin chu LALPA rawng a nih kan bâwl ding chu,” a ta.

¹⁶ Chun, mipuihai chun, “LALPA Pathien chu mâksanin pathien dang- hai rawng chu kan bâwl naw dingzie chu;

¹⁷ ama LALPA kan Pathien ngeiin annâwm kan thlatuhai le Aigupta ram suoka inthawka mi ṭhuoi suok a, kan mithmua inchikna ropuitak takhai thawh a, kan fena taphawta le mipui po po kan nêr thlengnaa khawma mi humhim pei chu;

¹⁸ Chuongchun, LALPA chun kan hma ngeiah hnam tin chuong rama um Amor mihai chu a hnawt suok vawng a; chuleiin, keini khawma LALPA rawng a nih kan bâwl ding chu, ama chu kan Pathien a ni sih a,” an tih a, an dawn a.

¹⁹ Josua ruok chun mipuihai kuoma chun, “LALPA rawng chu bâwl thei naw ti niu, ama chu Pathien inthieng a ni sih a; Pathien thîk- thusie a na, in bawsietna dâm le in suolnahai chu ngaidam naw ni.

²⁰ LALPA chu in mâksan a, hnam dang pathienhai rawng in bâwl chun chu, in chungah a ṭha sa hin in chung- ah thil ṭha nawin ṭuong vêng a ta, a sukbohmang el ding cheu a nih”, a ta.

²¹ Chun, mipuihai chun Josua kuomah, “Ni lo e, LALPA rawng kan bâwl tlat lem ding a nih,” an ta.

²² Chun, Josua chun mipuihai kuomah, “A rawng bâwl tumin LALPA chu in thlang ta ngei ti thuhretuhai chu nangni ngei hi in nih,” a ta. Chun, anni chun, “Thuhretuhai chu kan ni a ni ta hi,” an ta.

²³ Chun, ama ma chun, “Chuong chu a ni chun, tûn nangni laia hnam dang pathien umhai chu sie hmang dai unla, in lungrilhai chu LALPA Israelhai Pathien tieng chun in- thlêktir ro,” a ta.

²⁴ Chun, mipuihai chun, Josua kuomah, “LALPA kan Pathien rawng chu bâwl kan ta, a thu chu zâwm pei kan tih”, an ta.

²⁵ Chuongchun, Josua chun chu ni chun mipuihai kuomah thu a thlung a, Sekem khuoa chun dân le rorêlna a ruotpêk a.

²⁶ Chuongchun, Josua chun chuong thu chu Pathien dân buah a ziek a, chun, lung lientak a lâk a, LALPA hmun inthieng bula thingsai- suo hnuoia chun a phun a.

²⁷ Chun, Josua chun mipuihai po po kuoma chun, “Ngai ta u, hi lung hi ei thuhretu ni raw se, LALPAIN ei kuoma a thuhrilhai po po chu a hriet ta hi; chuleiin, in thuhretu a ni ding a nih, chuong a ni naw chun, Pathien hi inphatsan el rawi in tih,” a ta.

²⁸ Chuongchun, Josua chun mi- puihai chu anni chanpuol ram senga khan ân fetir tah a.

Josua le Eleazar thi

²⁹ Chuong thil hnunga chun Nun naupa Josua, LALPA siehlaw chu kum za le sâwm miin a thih a.

³⁰ Gaas tlâng hmârtieng pang, Ephraim tlâng rama ama chanpuol ramri sûng Timnath-seraa chun an phûm tah a.

³¹ Chun, Josua dam sûng le, upahai Josua hnunga la damhai, LALPAIN Israel mihai ta dinga thil a thawhai po po hretuhai dam sûng chun, Israel mihai chun LALPA rawng an bâwl hlak a.

³² Chun, Israel thlahaiin Aigupta rama inthawka Josef ru an sawm pei kha Sekem khuoa chun Sekem pa, Hamor nauhaia inthawka Jakobin tangka zaa a în châwka khan an phûm a; chuongchun, chuong chu Josef thlahai puolah a hung um tah a.

³³ Chun, Aron naupa Eleazar chu a thi a, a naupa Phinehas puol dinga an pêk Ephraim tlâng rama Gibea khuoa chun an phûm tah a.