JOSUA 11 - Pathien Lekhabu Inthieng (BSI)

Jabin ṭhangruolpuihai hnea an um thu

¹ Hazar lal Jabinin chu chu a lo hriet chun Madon lal Jobab hai, Simron lal hai, Aksaph lal hai,

² hmartienga tlâng ram lalhai dâm, Kinneroth simtienga Araba lal hai, phai ram lal hai dâm, thlang- tieng panga Dor tlâng sâng lal hai,

³ saktieng le thlangtienga um Kanaan mihai dâm, tlângrama um Amor mihai, Hit mihai, Periz mihai, Jebus mihai, Mizpa ram Hermon tlâng hnuoia umhai Hiv mihai kuoma dâm mi a tir a.

⁴ An sipai ruolhai leh mi tamtak, an tam tieng chu tuisuoriet kama phaiphin zât zet, sakawr le tawlailîr tamtak leh an inthawk tah a.

⁵ Chuong lalhai po po chu an intuok khâwm a, Israelhai chu thaw tumin Merom tuiahai chun an riek khâwm a.

⁶ Chun, LALPAIN Josua kuomah, “Anni leiin ṭi naw rawh, zîngah hieng tik phât hin anni chu sukhlum sa vawngin Israelhai chu ka hung pêk el ding a nih; an sakawr thahai chu sat pêk i ta, an tawlailîrhai chu i raw el ding a nih,” a ta.

⁷ Chuongchun, Josua le râlkâp mihai po po chu Merom tuiahai chun an vân thawk ta phut el a, an baw tah a.

⁸ Chun, LALPAIN anni chu Israel- hai kutah a pêk a, an thawh a, Zidon Ropui chen dâm, Misrephoth-maim hmun chen dâm, saktieng panga Mizpe ruom chen dâmin an hnawt a; pakhat khawm hla hrim hrim nei loin an that vawng a.

⁹ LALPAIN a tir angin, Josua chun an chunga chun a thawh a, an sakawr thahai chu a satpêk a, an tawlailîrhai chu a rawpêk bawk a.

¹⁰ Chuong lai chun Josua chu a hnungkîr a, Hazor chu a lâk a, an lal chu kâwlhnâmin a that a, kha hma khan chu Hazor chu chuong lai vêl ram po poa khawpui tak a nih.

¹¹ Chu khuoa mi umhai po po chu kâwlhnâmin an that vawng a, an sukchimit dêr a, ân thuokthei taphawt chu pakhat khawm an hla nawh, chuongchun, Hazor chu meiin a raw tah a.

¹² Chun, chuong lalhai khawpui- hai po po le an lalhai po po chu Josua chun a lâk vawng a, kâwlhnâma thawin a that a, a sukchimit vawng a; LALPA siehlaw Mosien thu a pêk ang khan.

¹³ Amiruokchu, muolvûma khaw- pui lo umhai kha chu Hazor tilo chu Israelhai chun pakhat khawm an raw nawh a, chu khuo ruok chu Josuain a raw a nih.

¹⁴ Chuong khawpuia an râllâkhai po po le ranhai chu Israel thlahai chun anni chanpuolah an nei a, mihriem ruok chu an sukbohmang vawng hmakhat chu kâwlhnâmin an that a, ân thuokthei taphawt chu hla an nei nawh.

¹⁵ LALPAIN a siehlaw Mosie thu a pêk ang bawkin, Mosie khawmin Josua chu thu a pêk veh a, chuong ang tak chun Josua chun a thaw pei a, LALPAIN Mosie thu a pêk po po chu thaw naw hrim a nei dêr nawh.

Josuain ram pumpui a lâk thu

¹⁶ Chuongchun, Josua chun chuong ram po po, tlâng ram dâm, sim ram po po dâm, Gosen ram po po dâm, phai ram dâm, Araba dâm, Israelhai tlâng ram dâm, an phai ramhai leh a lâk vawng a.

¹⁷ Seir tlâng hang khawtu Halak tlânga inthawka Hermon tlâng hnuoia Lebanon ruoma Baal-gad chenin; an lalhai po po chu a man a, a that a, a sukhlum vawng a.

¹⁸ Josua chun chuong lalhai po po chu sâwttak a do a nih.

¹⁹ Gibeon khuoa um Hiv mihai ti chau naw chu Israel mihai le inremna siem khuo hrim an um dêr nawh a, doa an lâk vawng an nih.

²⁰ LALPAIN Mosie thu a pêk ang anga sukchimit vawng a, ditsakna nei dêr loa a sukbohmang theina dinga an lungril sukngarpêka Israel- hai indotir hlaktu chu LALPA chu a ni sih a.

²¹ Chuong lai chun Josua chu a feh a, tlâng rama inthawk dâmin, Hebrona inthawk dâmin, Debira in- thawk dâmin, Anaba inthawk dâmin, Juda tlâng rama inthawk dâmin, Israel tlâng ram po poa inthawk dâmin, Anakim mihai chu a sukchi- mit vawng a, Josua chun an khawpuihai pumin a sukbohmang vawng a,

²² Israel thlahai rama chun Anakim mihai chu pakhat khawm um an um ta dêr nawh a, Gazaa dâm, Gatha dâm, Asdoda dâm ruok chun chu a um an la um a.

²³ Chuongchun, LALPAIN Mosie kuoma a hril po po ang khan Josua chun ram pumpui chu a lâk tah a; chun, Josua chun Israel mihai chu an hnam inṭhe dân ang peiin an rochan dingin a pêk tâwl a; chuongchun, ram chu râlmuongin a um tah a.