JOEL 2 - Pathien Lekhabu Inthieng (BSI)

¹ Ziona chun tawtawrâwt mût unla, ka tlâng inthienga chun inrâl- ringna sukri ro, hi ram sûnga mi po pohai chu inthin raw se; LALPA ni chu a hung tlung mêk a, a hnai ta sih a;

² inthimna le vâninnîmna ni, sûm zîng ni le inthim sâ ni, tlâng chunga vârtle var rên ruon ang; mipui nasa- tak le hrâttak, chuong ang la um ngai lo, chuong hnunga suon tamtak chen khawma um nâwk ta ngailo ding chu.

³ An hmatieng chu meiin a kâng fai a, an hnungtieng meichawkin a hlieu bawk a; an hmaa ram chu Eden huon ang a nih; an hnungtieng chu thlalêr ram ṭâwl a nih, ieng- khawmin chuong chu an pumpel ta nawh.

⁴ An inlang dân chu sakawr inlang dân ang a nih; sakawr chuong mi angin an tlân a.

⁵ Indona tawlailîr ri angin tlâng chunga chun an kat sup sup a, pâwl kâng chawk dur dur ang le indonaa mipui hrâttak inzosa angin.

⁶ An hmaa mipuihai chu an thla- phâng a, an hmêlhai chu a hung dâng vawng tah a.

⁷ Mi hrâttak angin an tlân a, indo mi angin bangah an lâwn a; mâni zâwn sengah an feh a, an intlar dân an sukbuoi nawh.

⁸ An inhneng bawk nawh a, mâni lampui sengah an feh a, hriemhreihai an nêrthleng a, an fe pêt nawh.

⁹ Khawpui chunga chun an in- châwm a; kul chungah an tlân a; in sûngahai chun an hang lâwn a; inru angin tukverahai an lût a.

¹⁰ An hmaa chun hnuoi khawm ân thin a; vânhai ân hnîng a; nisa le thla chu an inthim a, arasihai chun an var an thup a:

¹¹ LALPA chun a sipai ruolhai hmaa chun râwl ân suoh a, a rie- bûkhai chu a ropui hle sih a; a thu muolsuotu chu a hrât hle sih a. LALPA ni chu a ropuiin a râpthlâk êm êm sih a; tuin am tuor thei a ta?

Lalpa zângaina

¹² LALPA chun, “Chuong sa khawmin tuhin in lungril po poin, bu ngheiin, ṭapin, lungngaiin keia tieng hung ngha unla;

¹³ in puon ni loin, in lungril thlêr ro,” a tih. LALPA in Pathien tieng chu ngha ro: ama chu lunginsiet theitak le lainatnaa sip, lunginuoi le zainêm- naa sip, thil ṭha naw chu inlêt hlak a nih.

¹⁴ LALPA in Pathien kuomah, bei- phit inhlân le dâwn ding inhlânahai khawm chun, kîrin lungril inlêtin, malsâwmna mâksanin um naw ni ti tuin am a hriet a?

¹⁵ Ziona chun tawtawrâwt mût unla, bu nghei hun inserthieng ro; inkhâwmpui ursûntak chu siem ro,

¹⁶ mipui inkhâwm unla, in- khâwmpuihai chu sukthieng unla, tarsiehai, naupanghai, nenê ne laihai kei khâwm unla, moneitu chu a pin- dana inthawkin hung suok sienla, mo khawm a pindan sûngrila inthawk chun hung suok raw se.

¹⁷ Thiempu, LALPA rawngbâwl- tuhai chu, tuolpûk le mâichâm inkâra chun ṭap sienla, “Aw LALPA i mihai hla la, i rochanhai hi hrilsieta uma hnamhaiin an chunga ro an rêlpêk dingin pe naw rawh: ‘An Pathien chu khâw lai am a um ta leh,’ tiin an mipuihai lai chun ieng dingin am tîng an ta?” ti raw se.

¹⁸ LALPA chun a ram chu a thîk a, a mihai chu a lunginsiet a.

¹⁹ LALPA chun a dawn a, a mihai kuomah, “Ngai unla, in kuomah bu dâm, uoin dâm, hriek dâm hung in- tlun ka ta, chuonghaia chun tlai in ta: hnamhai laia chun hrilsietin inumtir nâwk ta naw ning cheu a:

²⁰ amiruokchu, in kuoma in- thawkin hmârtieng sipai ruol chu sawnhmang dai ka ta, ram ṭâwl le râusannaah infetir ka tih, a hmasa pâwl saktieng tuisuorietah, a nu- hnung pâwl thlangtieng tuisuorietah; hung ṭhuoi suok a ta, rimsetakin hung innam a tih, thil nasatak a thaw ta leiin.

²¹ Aw ram, ṭi naw la, hlimin lâwm rawh, LALPA chun thil ropuitakhai a thaw ta sih a.

²² Ranhai, ṭi naw ro, thlalêr hlobet hmun a hung inder a; thing chu a hung rah a, theichang kûng le grêp- hruihai chu a hung inno sih a.

²³ Nangni Zion nauhai, lâwm ro, LALPA in Pathiena chun hlim ro; ruo hmasa chu inkhi chiein a pêk si cheu a, in ta dingin ruo ân sûrtir a, thla khatnaa ruo hmasa le ruo nuhnung chu.

²⁴ Ṭuonghai chu buin hung sip a ta, uoin le hriek chu bêlahai chun sip liem a ta.

²⁵ Nangni laia ka sipai ruol tamtak ka itir, tawktawngang dâm, khâuṭhikṭhi dâm, thingnge dâm, tuktulung dâmin an fâk zo kumhai kha thung nâwk ka ti cheu.

²⁶ Tamtak nei in ta, tlai in tih, maktaka ngaituo hlaktu cheu LALPA in Pathien hming chu inpâk in ta, ka mihai chu muolpho hrim hrim naw ni hai.

²⁷ Chun, Israelhai lai hin ka um ti le, LALPA in Pathien ka na, tu dang khawm an um nawh ti hrieng in tih; ka mihai chu muolpho nâwk ta naw ni hai.

Pathien thlarau buoka um chu

²⁸ “Chu hnunga chun mi po po chungah ka thlarau buok ka ta; chuongchun, in naupasalhaiin, in naunuhmeihaiin ka thu hril an ta, in tarhaiin mangah mang an ta, in tlangvâlhaiin inlârnahai hmûng an ta:

²⁹ chuong niahai chun suokpahai le suoknuhai chunga khawm ka thlarau buok ka tih.

³⁰ Vâna le hnuoiahai thilmak- hai inhmutir ka ta, thisen dâm, meikhu dâm, meikhu ngîr dâm leh.

³¹ Nisa inthimin inchang a ta, thla chu thisenah inchang a ta, LALPA ni ropuitak le râpthlâktak chu a hung tlung hma chun.

³² Chun, hieng ang hi nîng a ta, tukhawm LALPA hming lam taphawt chu sanhim nîng an tih; LALPAIN a hril ang khan a tlânsuokhai chu Zion tlânga le Jerusalem khuoah an um âwm sih a, chu hai lai chun LALPAIN a kohai chu ṭhang an tih.”