JOEL 1 - Pathien Lekhabu Inthieng (BSI)

Khâuṭhikṭhi le tuktulungin ram a fâksiet

¹ Pethuel naupa Joel kuoma LALPA thu hung tlung chu.

² Tarsiehai, hi hi hre unla, hi rama um po pohai, na lo sit ro.Hi in hun lai le in puhai hun laia khawm a um ta hlak am a nih?

³ Chu chu in nauhai hril unla, in nauhai chun an nauhai hril sienla, an nau nâwksâwnghai chun suon dang hril pei raw hai se.

⁴ Thilngein a fâk mahla po chu khauṭhikṭhiin a fâk a, khâuṭhikṭhiin a fâk mahla po chu thingngein a fâk a; thingngein a fâk mahla po chu tuktulungin a fâk zo a.

⁵ Inruihai, har unla, ṭap ro; uoin dâwn po pohai, a uoin thlum lei chun khêk rak rak unla, in baua inthawka lâk hmang a ni ta sih a.

⁶ Hnam hrâttak, tiem sênglo ka rama inthawkin a hung suok ta sih a, a ha chu sakeibaknei ha ang a na, sakeibaknei lientak hapui ang a nei bawk a.

⁷ Ka grêp hrui a suksiet a, ka theichang kûng hâwng a khek a, a khek fai vawng a, a peihâwn a; a kâuhai chu a fil vâr vawng a.

⁸ Nunghâkin saiip puon bil a, a ṭhat- lai pasal a sûn angin ṭap rak rak ro.

⁹ Beiphit inhlân dâm, dâwn ding inhlân dâm chu LALPA ina inthawka sukbo a na, thiempu LALPA rawng- bâwltuhai chu an lungngai a.

¹⁰ Lo chu suksiet a na, ram chu a lungngai a, bu chu suksiet a na, uoin thar chu a kang a, hriek khawm chu a chau a.

¹¹ Aw, nangni lo neituhai, inzak unla, nangni grêp hrui enkawltuhai, bupui le buṭei leiin khêk rak rak ro; loa bu sîk ding chu a bohmang ta sih a.

¹² Grêp hrui chu a vuoi a, thei- chang kûng chu a châu a, theibufai kûng dâm, intûm dâm le apple thei kûng dâm, loa thing po pohai khawm chu a ṭuoi tah a; mihriem nauhai laia lâwmna chu a vuoi hmang ta sih a.

¹³ Nangni thiempuhai, saiip puon dierkei unla, ṭap ro; nangni mâichâm rawngbâwltuhai, khêk rak rak ro; nangni ka Pathien rawngbâwltuhai, hung unla, saiip puon silin zânkhaw- vârin zâl ro: in Pathien ina inthawk chun beiphit inhlân le dâwn ding inhlân chu khap a ni sih a.

¹⁴ Bu nghei hun inser thieng unla, inkhâwmpui ursûn siem unla, LAL- PA in Pathien ina chun tarsiehai le hi rama chênghai po po chu ṭhuoi khâwm unla, LALPA chu ko ro.

¹⁵ Chu ni chu a chung a rik de! LALPA ni chu a hnai ta sih a, Iengkim- thawtheia inthawka bohmangna ang hung tlung a tih.

¹⁶ Ei mithmua fâk ding sukbo a ni naw am a nih? Anih, ei Pathien ina inthawka hlimna le lâwmna leh?

¹⁷ Chihai chu hnuoitlang hnuoia chun a hmawn a; zênghai chu a sieh a, bu inhai chu ṭhiekin a um a, a bu chu a vuoi zo ta sih a.

¹⁸ Ranhai chu an inrûm nasa de! Bâwng ruolhai chu an lunginzîng a, hlohna hring hmun an nei naw leiin; anih, berâm ruolhai chu an rêm zo tah a.

¹⁹ Aw LALPA, ka ko che hi; mei chun thlalêr ram hlohna hmun chu a kâng fai tah a, meichawk chun ram thing po po chu a kâng fai ta sih a.

²⁰ Anih, ramsahai chu nanga ngaiin an inthuok huom huom a, va- dungtêhai chu a kang intan a, mei chun thlalêr hmun hlohna hmun chu a kâng fai ta sih a.