JOB LEKHABU (THE BOOK OF JOB) 9 - Pathien Lekhabu Inthieng (BSI)

Jobin Pathien a dawn thei nâwna

¹ Chun, Job chun a dawn a, a hril tah a:

² “Chuong ang chu a nih ti indiktakin ka hriet a, Nisienlakhawm, mi chu iengtin am Pathien hmaa chun mi indiktak ni thei a ta?

³ Ama le inkhing chu nuom ang sien khawm, Sâng khat laia pakhata khawm ama chu dawn thei naw nih.

⁴ Ama chu lungrila var, hrâtnaa thilthawthei a na, Ama chunga insukngara hlawtling tu am um an ta?

⁵ Ama chun tlânghai chu a sawn a, an hriet si nawh a, An lunginsena anni a thâilet lai chun;

⁶ Hnuoi chu ama hmuna chun a sukhnîng a, Chutaka banhai khawm chu ân hnîng bawk a.

⁷ Nisa chu thu a pêk a, a hung suok ta nawh a; Arasihai chu a khârkhip bawk a.

⁸ Ama chun vânhai chu a keiphar a; Tuisuoriet fâwnhai chungah kal a chawi a.

⁹ Zângkawlawi dâm, Sîruk dâm le, Sîzucho dâm siemtu le, Simtieng kâwlkawdawng hai siemtu chu.

¹⁰ Ama chun inhmaa thil hriet suok ruollohai chu a thawh a; Anih, thilmak tiem sêng lohai chu.

¹¹ En ta, ka kâwla chun a feh a, ama chu ka hmu nawh a, A fe pei a, ama chu ka hriet si nawh.

¹² En ta, a lâk el a, tuin am dang thei a ta? ‘Ieng am i thawh a?’ tuin am a kuomah tîng a ta?

¹³ “Pathien chun a lungsen chu la kîr naw nih a, Rahab ṭhangpuituhai chu a hnuoiah an kûn ngei kha.

¹⁴ Kei taktê hin iengtin am ama dawn ka ta? Ama kalin khâwlai ka ieng thu tak am phawr thei ka ta?

¹⁵ Kei chu mi fel ni lang khawm, la dawn naw ning a; Ka chungthu rêltu ding kuoma chun hnina siem lem ka tih.

¹⁶ Ama ka ko chun a mi hung dawn hlak a; Ama chun ka râwl chu a ngai naw am a ni ka la sâwn rawp a.

¹⁷ Thlipui chu mîn nuoitirin, A san boin ka hliemnahai chu a sukpung tah a.

¹⁸ Ka thuok lâk ding chu mi ngaithei naw nih a; Khâknain mi suksip lem a tih.

¹⁹ Hrâtna thu ei hril chun ama chu thilthawthei a na! Rorêlna thu hril inla, tuin am ama chu ko thei a ta?

²⁰ Kei chu mi fel ni lang khawm ka bau ngeiin thiemnaw mîn chan a ta; Kei chu mi tluongtak ni lang khawm, kâwmâwah mîn chan a tih.

²¹ Mi tluongtak ka na; kei le kei kân ngaisâng nawh a; Ka hringna chu ka hmusit a;

²² A rêngin angkhat vawng a nih; chu lei chun annâwm, ‘Ama chun mi tluong le mi khawhlo khawm chu a suksiet ve ve,’ ka ti chu.

²³ Vuokna chun a sukhlum nghâl chun, Mi pawitâwklo vângduoina chu nuisan a tih.

²⁴ Hnuoi hi mi khawhlo kuta chun pêk a na, Chu chun rorêltuhai hmaihai chu ama chun ân khum a nih. Ama a ni naw chun, tu am nîng a ta?

²⁵ “Tuhin ka nihai chu thangkohai nêkin an hrât lem a; An tlân hmang a, thil ṭha hrim an hmu nawh.

²⁶ Lawnglien hrâthai angin an fe hmang a; Mupui a sa fâk ding chunga a bir ang elin.

²⁷ ‘Ka sawisêlna theinghil ka ta, Ka hmêl lungngai hi sie hmang ka ta, Hlimtakin um ka tih,’ ti lang:

²⁸ Ka lungngainahai po po chu ka ṭih a, Nang chun pawitâwkloah mi sie naw ti ni ti ka hriet sih a.

²⁹ Thiemnaw inchangtirin um ngei ka tih; Chuong sa chun, a thlâwn elin ienga dîm lân rim rawp ka ta?

³⁰ Vûrtuiin kei chu insilin, Ka kuthai chu changalin sâwp lang khawm,

³¹ Nang chun khura chun mi phûm tho i ta, Ka silfênhai ngei chun mi tirdak an tih.

³² Ama chu ka dawn dingin keima anga mihriem a ni si nawh a, Rorêlnaa hang ngîr hmunkhatpui ding êm chun.

³³ Kan inkârah ṭheltu tukhawm an um nawh a: Kan chunga kut innghat ve ve theitu ding chu.

³⁴ Keimaa inthawkin a hmawl chu la hmang sienla, A ṭiumnahai chun mi sukṭi ta naw raw se,

³⁵ Chuongchun, ama ṭi loin thu hril ka tih. Keimaa hin chuong ang chu ka ni si nawh a.