JOB LEKHABU (THE BOOK OF JOB) 7 - Pathien Lekhabu Inthieng (BSI)

Jobin Pathien a sêl

¹ “Hnuoi chunga hin mihriem chun sin thaw ding a nei zing ni lo am a nih? A nihai khawm chu inhlawfa ni ang a ni naw am a nih?

² Siehlaw, deihlim inhnar ngâwi ngâwi angin le, Inhlâwfa a hlawhai ngawt en ang el chun:

³ Thla teplohai chu hmang dinga siem ka na, Zân tuorhlaumtakhai chu ka ta dinga ruot a ni tah a.

⁴ Ka zâl pha chun, ‘Iengtik am tho ka tih aw? Zân chu a sâwt ngei,’ ka tih a; Zîngkhaw hung var chenin kân let kân let a.

⁵ Ka taksa chu pilvut khâwnhai le ngêhaia thuomin a um a; Ka vun chu a hung inhlip a, a tharin a hung suok tah a.

⁶ Ka nihai chu puon khâwngtu khawthei nêkin a hrât lem a; Beiseina hrim um loa sukthâm an nih.

⁷ Aw, ka hringna hi thli el a nih ti hre zing la, Ka mit hin thil ṭha hmu nâwk ta naw nih.

⁸ Mit a mi hmutu khan mi hmu ta naw nih a; I mithaiin mi hung en a ta, nisienlakhawm, um ta naw ning.

⁹ Sûm chu a hung inzâm a, a hung ral angin; Chuong ang chun, Seola fetahai chu hung nâwk ta naw ni hai.

¹⁰ A ina chun hung kîr ta naw nih a; A hmun chun ama chu hre ta bawk naw ni.

¹¹ “Chuleiin, ka bau hi insûm naw ning a, Ka thlarau thuokdawng hin thu hril ka tih; Ka lungril rimsiknaa hin sawisêl ka tih.

¹² Tuisuoriet am ka ni, tuisuorieta ngapui am ka ni. Keima chunga vêngtu i sie chu?

¹³ ‘Ka khumin mi sukhlim a ta, Ka zâlkhum chun ka sawisêlna chu mi suknêppêk a tih,’ ka ti hlak chun.

¹⁴ Nangin manghaiin i mi suklâu a; Mitthlaa thilhmuhaiin i mi sukṭih a.

¹⁵ Chuongchun, ka lungril chun inâwkhlum le thina a thlang a nih; Hieng ka ruhai ngawt nêk hin chu.

¹⁶ Ka hringna chu ka sêngral a; dam sâwt naw ningah, Mâkhâtin mîn umtir el rawh; ka nihai chu teplo el an ni sih a.

¹⁷ Mihriem hi ieng am a nih a, ama chu i chawimawi a; Amaa chun i lungril în nghat a,

¹⁸ Zîng tin ela i hung sir hlak a, Mitkhapkâr tina i fie hlak hi?

¹⁹ Iengchen am keia tieng ngha lo loin um i ta, Ka chil lem kâr el khawma makhâta i mîn umtir naw ding chu?

²⁰ Ka lo suol a ni khawmin, i chungah ieng am ka thaw a na, Aw, Nang mihriemhai vêngtu? Iengdinga nanga ta dinga inchikna dinga i mi sie am a na? Keima ngei ta dinga phurrik ni elna dingin.

²¹ Iengdinga ka bawsietna hi i ngaidam nawh a, Ka rîtlona hi i lâk hmang naw? Tuhin pilvut lai ka zâl el ding an ta sih a; Ngûntakin mi zawng i ta, nisienlakhawm, um ta naw ningah,” tiin.