JOB LEKHABU (THE BOOK OF JOB) 29 - Pathien Lekhabu Inthieng (BSI)

Jobin a hlimna hmasahai a hriet suok

¹ Chun, Job chun a thuhril chu a zawm nâwk a, a hril tah a:

² “Aw thla hlui tahaia ang khan um la ni lang chu aw, Pathienin a mi vêng lai nihai anga khan;

³ A khâwnvar ka lu chungah a var lai, A var ringa inthimna ka fe thleng lai khan;

⁴ Ka vânglai nihaia ka um anga, Pathien thurâwn chu ka puon in chunga a um lai khan;

⁵ Iengkimthawthei chu ka kuomah a um a, Ka nauhai khawm ka sirah an um lai khan;

⁶ Ka kaiṭênhai chu nênetui khala sâwp a nih a, Lungpui chun hriek vadunghai chu a min suopêk hlak lai khan!

⁷ “Khawpui dai kawtkhâra ka va fe suok a, Kawtthlêra chun ṭhunghmun ka rem chun,

⁸ Tlangvâlhai chun an mi hmuh a, an inbi a, Upahai khawm chu an tho a, an ngîr hlak a,

⁹ Lalnauhai khawm chun an inbiek an mah a, An kuthai chun an bau chu an hup a;

¹⁰ Mi ṭhahai râwlhai khawm chu a hung reh a, An leihai chu an dang chungah a kawp tah a.

¹¹ Nain a mi hriet chun, mal a mi sâwm hlak sih a, Mit khawma a mi hmu chun, ka kuomah hrietpuina a pêk a;

¹² Mi rimsi khêk chu ka sansuokin, Fahra ama ṭhangpuitu ding neilo khawm chu ka sansuok hlak leiin,

¹³ A malsâwmna bohmang ṭêp khawm chu ka kuomah a hungin, Hmeithai lungril chu hlima hlasak dingin kân umtir hlak.

¹⁴ Felna chu ka sil a, chu chun a mi thuom a, Ka felna chu lalpuon le lukâwm ang a nih.

¹⁵ Mitdel ta dingin mithai ka na, Kebâi ta dingin kehai ka nih.

¹⁶ Tlasam ta dingin pa ka na, Chun, a chungthu ka hriet naw khawm chu ka zawng suok hlak.

¹⁷ Mi fello ha chu ka sukthliek a, A sa fâk chu a haa inthawk chun ka lâk suok hlak.

¹⁸ Chun, ‘Ka bua chun thîng ka ta, Ka nihai chu phaiphin zâtin sukpung ka tih,’ ka tih a.

¹⁹ Ka zung chu tuihai chenin ân zâm a, Ka zâr chunga chun zânkhawvârin dâidaw chu a kûr bawk a.

²⁰ Ka ropuina chu keimaa chun a thar a, Ka kuta chun ka thalngul chu siemtharin a um bawk a.

²¹ “Ka kuomah miin na an sit a, an nghâk a, Ka thurâwn chu ngaiin an to hlak.

²² Ka thu hnungahai chun thu an hril nâwk ta ngai nawh a, Ka ṭawng chu an chungah a tla a.

²³ Ruo nghâk angin kei an mi nghâk a, Ruo nuhnung tieng nghâk angin an bau an ka lien a.

²⁴ Anni kân nuipui a, an inring naw laiin, Ka hmêlput hlimum chu an pei thlâk chuong nawh a.

²⁵ An lampui ka thlang suok a, lal angin ka ṭhung a, Sipai laia lal tak angin ka khawsa a, Mi thlavaihai thlamuongtu ang elin.