JOB LEKHABU (THE BOOK OF JOB) 28 - Pathien Lekhabu Inthieng (BSI)Mihriemin varna a zawng dân 1 “Tangkaruo ta ding chun cho- suokna hmun chu a um ngei a nih, Rângkachak ta dinga sukthiengna hmun leh. 2 Thîr chu leihnuoia inthawka lâk suok a na, Dârsen ruok chu lunga inthawka emtuia lâk suok a nih. 3 Mihriemin inthimna a suktâwp a, Thina hlim le inthimna lung sâmuphai chu, A hmun hlatakahai chun a zawng suok hlak. 4 A ram hluotuhai um nawnaa chun khur an cho a, A chunga fehai chun an theinghil a; Mi hlatnaah an inkhai a, an inthên an inthên a. 5 Hnuoi ruok chu amaa inthawk chun bei a hung suok a, A hnuoitieng chu, inlet chun chu mei ang el a nih. 6 Chutaka lunghai chu Sapphir lung hmun dâm a na, Rângkachak hlawmhai chu a um a nih. 7 Chu lampui chu chunglêng vate sa fami chun a hriet nawh a, Mulukawlhai mit khawm chun a hmu ngai nawh. 8 Ramsa chapotakhai khawm chun an sir ngai nawh a, Sakeibaknei ṭiumtak khawm chun a hraw ngai nawh. 9 “A kut chu lungpui changtak chunga chun a sie suok a, Tlânghai chu a bula inthawkin a kei let a. 10 Lungpuihai lai chun tuiluongnahai a cho a, A mithai chun thil hlutak chu a hmuh a. 11 An far nawna dingin tuihnârhai chu a ting a, Thil inthupa um chu varah a hung lâk suok tah a. 12 Amiruokchu, khâwlai am varna chu hmu nîng a ta? Hrietthiemna hmun khawm chu khâwlai am a na? 13 Mihriem chun chu man chu an hriet nawh a, Mi hring rama khawm chu chu hmu suok a ni bawk nawh. 14 Khursûng chun, ‘Keimaah a um nawh,’ a ta, Tuisuoriet chun, ‘Keimaah a um nawh,’ a ti bawk a. 15 Rângkachaka nei thei a ni nawh a, Chu chu man ding chun tangkaruo khawm bûk thei a ni bawk nawh. 16 Ophir rângkachak le chun ngaihlut inang thei a ni nawh a, Sapphir amanih, Berul lung hlutak le khawm chun hlut inanga ngai thei a ni nawh. 17 Rângkachak le hlimen chun an tluk thei nawh a, Chu chu thlengpui ding chu rângkachak inthiengtaka thleng thei khawm a ni bawk nawh. 18 Tuikeplung amanih, lunghlu khawm chu a hrila hril ding a ni nawh a, Anih, Varna man chu lunghlu chun tluk naw nih a, 19 Ethiopia rama Topaz lunghlu chun tluk naw nih a, Rângkachak inthieng le khawm chun a hlut angkhata ngai ding a ni nawh. 20 Anleh, varna chu khâwtaka inthawka hung am a na? Hrietthiemna hmun chu khâwlai am ni tâng a ta? 21 Mi hring po po mithmuhaia inthawka thupa umin, Chunga vatehai kâwla khawm thup a nih. 22 Bohmangna le Thina chun, ‘Chu chu thuthang chu kan nahaiin kan lo hriet a,’ an ta. 23 “Pathien chun chu lampui chu a hriet a, Chu chu hmun khawm chu a hriet a nih. 24 Ama chun kâwlkawdawnghai chu a hmuh a, Vân khuphnuoi po po hi a hmu vawng a nih. 25 Thli hrâtnahai chu a pêk lai khan, Anih, tuihai chu inkhinain ân khi suok a nih. 26 Chu lai chun ruo ta ding chun bi a ruotpêkin, Vâninrûm, kâwlinlep ta ding khawma lampui a siempêk bawk a. 27 Chun, ama chun a hmuh a, a puong tah a, A tungding a, anih, a zawng suok bawk a. 28 Chun, mihriem kuoma chun, ‘Ngai ta, Lalpa ṭi chu, varna a nih; Suola inthawka fe hmang chu hrietthiemna a ni bawk a,’ a ta,” tiin |
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.
Bible Society of India