JOB LEKHABU (THE BOOK OF JOB) 22 - Pathien Lekhabu Inthieng (BSI)

Eliphazin Job chu mi rilotakah a bel

¹ Chun, Eliphaz Teman mi chun a dawn a, a hril tah a:

² “Mihriem chu Pathien ta dingin a ṭhahnem thei ding am a nih? Matheiloin mi var chun ama le ama ân ṭhathnempui hlak ngei a.

³ Mi fel i ni hi Iengkimthawthei ta ding chun ieng am lâwmna ding a um a? Annawleh, i lampuihai chu i sukṭha famkim hin ama ta dingin hlâwkna a um am a nih?

⁴ Ama i ṭi leiin a hrem chein, Rorêlnaah a ṭhuoi lût che am a nih?

⁵ I rîtlona hi a nasa êm êm a ni naw am a nih? I suolnahai chun tâwp chin a nei bawk si nawh a.

⁶ I unau thuomhnaw chu teplo khatin i lâk a, Saruokhai chu an silfên i hlîppêk bawk sih a.

⁷ Mi chauhai kuoma chun tui dâwn ding i pêk nawh a, Mi phîngṭamhai ta dingin bei în ro bawk a.

⁸ “Amiruokchu, mi thahrât chun chu hnuoi hi a nei a, Mi inzaum chu a sûnga chun a chêng a nih.

⁹ Hmeithaihai chu kut ruokin în fe hmangtir a, Naufahrahai kuthai chu sukthliekin a um bawk a.

¹⁰ Chuleiin, chânghai chu i sîrvêlah a um vawng a nih. Ṭit thutna chun a sukbuoi bawk cheh a.

¹¹ I hmu thei nawna dingin i var chu sukthimin a um a, Tui tamtak chun ân khum che a nih.

¹² Pathien chu vân insânga chun a um a ni naw am a nih? Arasihai insângzie chu ngaituo ta, an insângzie chu!

¹³ Nang chun, ‘Pathien chun ieng am a hriet a? Inthim sâmupah ro a rêl thei ding am a nih?

¹⁴ Sûm sâmuphai chu ama inkhumna a na, a hmu thei nawh, Vân vêla chun a fe hlak a nih,’ i ta.

¹⁵ Lampui hlui kha i hraw zing ding maw, Mi rilohai lo fena ta kha?

¹⁶ Chuonghai chu an hun hmain lâk hmangin an um a, Chuonghai lungphûm chu tuihnâr anga bunthlâk a ni ta kha.

¹⁷ Pathien kuomah, ‘Keini mi mâksan rawh, Iengkimthawthei chun kan chungah ieng am thaw thei a ta?’ tituhai chu.

¹⁸ An inhai chu thil ṭhahaiin a la suksip rawp a, Amiruokchu, mi rilo thurâwn chu keimaa inthawkin hlatakah a um a nih.

¹⁹ Mi felhai chun, chu chu an hmu a, an lâwm a, Mi pawitâwklohai chun hmusitin an nuisan a,

²⁰ ‘Eini mi kaltuhai kha sât thlâk an ni ta ngei el a, Anni a la mahlahai khawm chu meiin a kâng hmang a,’ tiin.

²¹ Tuhin ama le chun inhmêlhriettir la, inremin um rawh, Chuongchun, i ta dingin thil ṭha a hung tlung ding annâwm.

²² A baua inthawka inchûktirna chu pawm la, A thuhai chu i lungrilah sie khâwl rawh.

²³ Iengkimthawthei kuomah i kîr nâwk chun, tung ding nîng i ta, I puon inhaia inthawka fel nawna chu hlatakah i sie hmang phawt chun.

²⁴ I hausakna chu pilvuta siein, Ophir rângkachakhai khawm chu vadungtê lunghai lai chun sie rawh.

²⁵ Chuongchun, Iengkimthawthei chu i ro hung nîng a ta, I ta dingin tangkaruo hlutak hung nîng a tih.

²⁶ Chun, nang chu Iengkimthawtheia chun hlim tâng i ta, Chun, i hmai chu Pathien tieng ngha tâng i tih.

²⁷ I ṭawngṭaina chu ama kuomah siem i ta, ama chun dawn a ti che; Chun, thutiemhai chu ama pe tâng i tih.

²⁸ Thil hung ngiet i ta, chu chu nanga ta dinga thaw ni tâng a tih: Chun, i lampuihaia chun var ta bawk a tih.

²⁹ Pathienin mi chapo chu a sukhnuoi a, Mi inngaitlâwm ruok chu a sandam a.

³⁰ Ama chun pawitâwklo mi ni lo khawm chu sanhim a ta, I kuthai inthiengna leiin sanhim a ni ding a nih,” tiin.