JOB LEKHABU (THE BOOK OF JOB) 2 - Pathien Lekhabu Inthieng (BSI)

¹ Ni khat chu Pathien naupahai chu LALPA hmaa an hung inlang- na ni a um nâwk a, Setan khawm chu anni laia LALPA hmaa inlang dingin a hung veh a.

² LALPA chun Setan kuoma chun, “Nang khâwtienga inthawka hung am i na?” a ta. Setan chun LALPA chu a dawn a, “Hnuoia kân vâk vêlnaa le chutaka a suk a tunga inlawnnaa inthawkin,” a ta.

³ LALPA chun Setan kuoma chun, “Ka siehlaw Job hi i ngaituo hlak am? Hnuoi chunga hin ama anga mi fel le mi tluong, Pathien ṭi mi le suol nghat- san mi an um si nawh a; a san nei loa ama sukbohmang dinga a chungah i mîn chângtir khawma ama chun a ringumna chu a chel det tlat a nih,” a tih a.

⁴ Setan chun LALPA chu a dawn a, “Vun aiah vun; anih, miin a thil nei po po chu a hringna dingin a pêk phal âwm hrim a nih.

⁵ Tuhin i kut inlet la, a ru le taksa chu tâwk la, i hmâisanah hrilse ngei ngei a ti che,” a ta.

⁶ LALPA chun Setan kuomah, “Ngai ta, ama chu i kuta um a nih annâwm; a hringna chau chu hla la,” a ta.

⁷ Chuongchun, Setan chu LALPA hmâihmaa inthawk chun a fe suok tah a, Job chu a kephaa inthawka a lusîp chenin khuoihli pânnain a hrem tah a.

⁸ Ama chun ama le ama ân huotna dingin bekawihâr a lâk a; vut lai chun a ṭhung tah a.

⁹ Chun, a nuhmei chun a kuomah, “I ringumna chu i la chel det tlat el a ni maw? Pathien chu hrilse la, thi el rawh,” a ta.

¹⁰ Nisienlakhawm, ama chun a kuomah, “Nuhmei invêt thuhril angin thu i hril a nih. Iengdingin am Pathien kuta inthawka thil ṭha ei hmu chun, thil ṭha naw khawm ei hmu naw ding am a nih?” a ta. Hieng thilhai po poa khawm hin Job chun a hmûrhai khawmin thil a suksuol nawh a.

¹¹ Chuongchun, Job ruol pathum hai chun ama chunga thil ṭha naw tlunghai po po chu an lo hriet chun, an hmun senga inthawk chun an rêngin an hung seng a; Eliphaz Teman mi le, Bildad Suhi mi le Zophar Naamath mi an nih; ama chu thlamuon ding le tuorpui dinga hung dingin hun rem an ruot tlâng a.

¹² Chuongchun, râl hlataka in- thawka an mithai an hei inlên chun, ama chu an hriet nawh a, an khêk rak rak a, an ṭap tâwl tah a; an puonhai chu an keithlêr tâwl a, pilvut vân- vawrin an luhai an inthêkhum a.

¹³ Chuongchun, ama kuoma chun hnuoi chungah ni sari le zân sari an ṭhung a, a tu khawm chun a kuomah iengkhawm an hril nawh a; a lung- ngaina chu a nasa êm êm a nih ti an hmu sih a.