JOB LEKHABU (THE BOOK OF JOB) 19 - Pathien Lekhabu Inthieng (BSI)

Jobin Pathienin indiktakin hung rêl dingin a ring

¹ Chun, Job chun a dawn a, a hril tah a:

² “Ieng chen am ka thla chu in suklâuin, Thuhai chun in mi suknâwi ding a na?

³ Hieng vawi sâwm rau hi in mi kâwk tah a, Ngartaka in mi thaw hi in inzak naw a ni hi.

⁴ Ka lo suksuol ta ngei a ni chun chu, Ka suksuolna chu keimaa chun um zing el a ta.

⁵ Keia chunga nangni inchawimawi in ni a, Ka demumna keia chunga zawng suok in ni chun,

⁶ Pathien chun ka chungthuah tuhin a mi pei thlâk tah a, A lên chun a mîn khum tah ti hre ro.

⁷ Ngai ta u, ‘Pâwngnêkna,’ tiin ka khêk a, Nisienlakhawm, ngaiin ka um nawh a; Ṭhangpuina dingin ka khêk a, nisienlakhawm, rorêlna dik a um si nawh a.

⁸ Ka suok thei nawna dingin ka lampui chu ân huon a, Ka lampuiahai chun inthimna chu a sie tah a nih.

⁹ Ka lua inthawk chun ka lallukhum chu la hmangin, Ka ropuina chu a mi hlîppêk ta a ni hi.

¹⁰ Kil tina chun a mi hung suksiet a, chuongchun, kei chu ka fe liem tah a; Ka beiseina khawm chu thing ang elin a lâk hmang tah a.

¹¹ A lunginsenna chu ka chungah a sukchawk a, A hmêlma pakhat ang chun a mi ngai tah a.

¹² A sipaihai chu an hung khâwm a, keima tieng lampui an hung siem a, Ka puon in vêlin ṭhanghmun an khuor a.

¹³ Ka unauhai chu keimaa inthawka hlatakah a sieh a, Ka hmêlhriethai hlak chu keia chungah an inthuruol a.

¹⁴ Ka laibunghai hlakin an mi nghatsan a, Ka ruol pâwlngeihai hlakin an mi theinghil ta bawk a.

¹⁵ Ka ina mikhuolhaiin an mi theinghil a, ka siehlawnuhai hlakin ram dang mi angin an mi ngai a,

¹⁶ Ka siehlaw chu ka ko a, a mi dawn hrim hrim nawh a, Ama chu bauṭhaa ka ngên a lo ṭûl ta lem a.

¹⁷ Ka thuok chu ka nuhmei kuoma chun mak a lo ni tah a, Ka nu rîla rahai ngei kuoma ka hnina khawm chu nghawkum a lo ni tah a.

¹⁸ Naupanghai khawm chun an mi hmusit a, Ka tho leh, ka chungah an mi sawisêl a.

¹⁹ Ka ruol bulhai po po hlak chun an mi pâwlser a, Ka hmangai takhai khawm chu ka chungah an hel a.

²⁰ Ka vun le ka tisa hi ka rua chun a kawp ringawt a, Ka hahai vun ruok chu ka la chang a.

²¹ Aw nangni ka ruolhai, mi lunginsiet ro, mi lunginsiet ro, Pathien kut chun a mi hung tâwk ta sih a.

²² Pathien ang el chun iengdinga in mi hrem a, Ka tisaa hin lungawi tâwk lo am in nih a?

²³ “Aw ka thuhai hi tuhin ziekin um sien, Aw, lekhabua chun ziek tlatin um hai sien chu aw!

²⁴ Thîr le suon kawlawm chun ziekin um sien, Lungpuia chun kumkhuoa dingin kerin um hai sien chu!

²⁵ Amiruokchu, ka tlantu chu a hring a nih ti ka hriet a, A tâwpa chun hnuoi chunga hin la ngîr ngei a tih.

²⁶ Chuong anga ka vun chena sukbohmang a ni hnung khawm chun, Ka taksa ngei chun Pathien chu la hmûng ka tih.

²⁷ Ama chu ka ta ding ngeiin hmu tâng ka ta, Ka mithai chun en a ta, mi dang chu en naw ni. Ka lungril chu ka sûnga chun ân tuiral a.

²⁸ ‘Iengtin am ama chu sukrimsîng ei ti aw! Amaa chun hi thil zung hi hmusuok a nih,’ in ti chun,

²⁹ Kâwlhnâm chu ṭi ro. Lunginsenna chun kâwlhnâma hremnahai chu a hung lâk suok hlak sih a; Rorêlna chu a um ti in hriet theina dingin,” tiin.