JEREMIA 46 - Pathien Lekhabu Inthieng (BSI)

Aigupta chungchânga hrillâwknahai

¹ Hnamhai chungthua zâwlnei Jeremia kuoma LALPA thu hung tlung chu:

² Aigupta chungthuah: Juda ram lal Josia naupa Jehoiakim inlal kum li kuma Babulon lal Nebukadnezzar- in a rûn, Aigupta lal Pharao-neko sipai Euphrates vadungpui panga Karkemisa umhai chungthu chu:

³ Âwmphaw le phaw buotsai unla, indona chu hnai ro.

⁴ Sakawrhai chu râlthuom unla, nangni sakawr chung chuong mihai, chuong unla, in lukhumhai leh ngîr- suok ro; feihai chu nâwttle unla, râlthuom chun inthuom ro.

⁵ Iengtizie am an ta le? An bei- dawng zo a, an hnungtawl tah a; an mi hrâthai chu hnein an um a, an tlân dar a, hnungtieng an ngha ta nawh; ṭium chu sîr tinah a um a nih, LALPA chun a tih.

⁶ Mi hrât chu tlân hmang naw sienla, mi thilthawthei khawm chu suokthleng naw raw se; hmâra chun Euphrates vadungpui panga chun an insui a, an tluh a.

⁷ Nile vadung, vadungpuihai ang ela tuihai invawr let anga ngîr dawk chu tu am a na?

⁸ Aigupta ram chu Nile vadung ang chun a hung lien a, a tuihai chu vadungpui tuihai ang elin ân vawr let a; ama chun, “Hung lien ka ta, leihnuoi hi inkhum ka tih; khawpui- hai le chutaka a hluotuhai chu sukbohmang bawk ka tih,” a ta.

⁹ Nangni sakawrhai, hang fe unla, nangni sakawr tawlailîrhai, lungin- sen ro; mi thilthawtheihai khawm chu fe suok raw hai seh; Ethiopia le Put mihai, phaw hmang mihai le, Lud mi thalngul kuoi hmang mihai chu.

¹⁰ Chu ni chu LALPA, sipaihai LALPA ni, a hmêlmahai chunga phuba a lâk theina dinga, phuba lâkna ni a ni sih a; kâwlhnâm chun fazo a ta, tlai a tih; chun, an thisen chu a khawp tâwkin dawn bawk a tih; LALPA sipaihai LALPA chun hmâr- tieng ramah Euphrates vadungpui panga chun inthâwina chu a nei sih a.

¹¹ Gileada chun hang fe la, thinghnai damdâwi hang la rawh, aw Aigupta naunu nunghâk inthieng, a thlâwn elin damdâwi tamtak i lo hmang tah a; i ta dingin damna hrim a um nawh a.

¹² Hnamhai chun în zakna chu an lo hriet a, i khêkri chun hnuoi chu a sip zo tah; mi thilthawthei chu mi thilthawtheia ma chun ân suithlu a, an pahni hni chun an tlu rêl a nih.

¹³ Babulon lal Nebukadnezzar chu hung a ta, Aigupta ram chu ieng angin am a hung rûn ding a na, ti thua zâwlnei Jeremia kuoma LALPA thuhril thu chu:

¹⁴ Aiguptaa chun hril unla, Migdola chun phuong unla, Nopha khawm chun phuong unla, Tahpan- hesa le chun: “Ngîr dawk la, inbuotsai rawh; i vêla chun kâwlhnâm chun a fâk zo pei ta si a,” ti ro.

¹⁵ I mi hrâthai chu iengdingin am lên hmangin um an ta? LALPA chun anni chu a hnawtdar leiin, anni chu an ngîr nawh.

¹⁶ Mi tamtak chu insuithlu dingin a siem a, anih, an intlûk thuo pei a, “Tho unla, hi kâwlhnâm nêksâwrnaa inthawk hin eini mihai laia ngei le, ei piengna ram ngeia khan fe nâwk ei tiu,” an tih a.

¹⁷ Chutaka chun an khêk a, “Aigupta lal Pharao hlak chu ri mei mei el chau a ni sih a; hun ruothai chu ân feliemtir pei a,” tiin.

¹⁸ Laltak a hming khawm sipaihai LALPA chun, ka hring zing angin; tuisuoriet panga Karmel ang le, tlânghai laia Tabor tlâng angin, ama chu hung ngei ngei a tih.

¹⁹ Aw nang naunuhmei Aigupta rama chêng, sala intâng dinga fe dingin incheibâwl rawh, Noph chu râusan nîng a ta, hluotu boin a kâng ding a ni sih a.

²⁰ Aigupta hi bâwngla hmêl ṭha- tak a na, nisienlakhawm, hmârtienga sietna chu a hung a, a hung tlung mêk a nih.

²¹ A sûnga mi inhlawfahai khawm chu, ran ina bâwngtêhai ang an nih; anni khawm chu an hnungkîr a, an tlân hmang hmunkhat a; an ngir hrim hrim nawh; an lunginzingna ni, anni hremna hun chu an chungah a hung tlung si a.

²² A rî chu rûlpui rî ang a na; a hmêlmahai chun kalchawiruolin, hreipuihai leh thing phûrtuhai angin an hung rûn a.

²³ Zawng suok thei ni naw sien khawm, a rampui hnuoihai chu phûr thlûng an tih, LALPA chun a tih; khâuhai nêkin an tam lem a, tiem thei an ni si nawh a.

²⁴ Aigupta naunu chu sukzak nîng a ta; hmârtienga mihai kuta chun pêk suok nîng a tih.

²⁵ Sipaihai LALPA, Israel Pathien chun hieng hin a tih: “Ngai ta u, Noa um Amon le Pharao le Aigupta le, a pathienhai le, a lalhai le; Pharao ngei le ama ringtuhai chu ka hrem ding a nih;

²⁶ anni chu an hringna zawngtu- hai kuta le, Babulon lal Nebukadnez- zar kuta le, a siehlawhai kuta chun pe suok ka tih; chu hnunga chun, tienlaia ang bawk khan hluoin um tâng a tih; LALPA chun a tih.

²⁷ Nisienlakhawm, aw Jakob ka siehlaw, ṭi naw rawh, aw Israel, bei- dawng bawk naw rawh, ngai ta, hlataka inthawkin nang le, i chithla- hai chu sala an intângna rama inthawk chun ka sandam ding cheu a ni sih a; Jakob chu hung kîr nâwk a ta, to ṭawk ṭawk a ta, nuomsain um a tih, tukhawma sukṭi ta naw ni hai.

²⁸ Aw ka siehlaw Jakob, ṭi naw rawh, LALPA chun a tih; i kuomah ka um sih a, nang ka hnawt hmangna che tienga hnamhai po po chu suk- tâwp vawng ka ta, nang ruok chu suktâwp letdêr naw ning cheh a; rorêlnain sukdik lem ka ti cheh a, ieng kawnga khawm hrem loin mâksan naw ning che,” tiin.