JEREMIA 37 - Pathien Lekhabu Inthieng (BSI)

Jeremia lung inah an khum

¹ Chun, Jehoiakim naupa Konia aia Babulon lal Nebukadnez- zarin Juda ram lala a lo siem Josia naupa Zedekia chun ro a rêl tah a.

² Nisienlakhawm, amain amanih, a siehlawhaiin amanih, chu rama mipuihai chun amani khawm, zâwl- nei Jeremia hmanga a hril LALPA thuhai chu an ngai nawh a.

³ Chun, lal Zedekia chun Selemaia naupa Jehukal le, thiempu Maaseia naupa Zephania chu zâwlnei Jeremia kuomah, “Tuhin keini ta dingin, LALPA kan Pathien kuoma chun ṭawngṭai rawh”, ti dingin a tir tah a.

⁴ Chuonglai chun Jeremia chu lung ina an sie ta naw leiin, mipuihai lai chun a lûtin a suok hlak a.

⁵ Aigupta rama inthawk chun Pharao sipaihai chu an hung a; chun, Jerusalem inhuoltu Kaldaihai chun anni chanchin chu an lo hriet phing chun, Jerusalema inthawk chun an indar tah a.

⁶ Chuongchun, LALPA thu chu zâwlnei Jeremia kuoma chun a hung tlung a;

⁷ “LALPA Israel Pathien chun hieng hin a tih: Ka kuoma thu indawn dinga nang ka kuoma tirtu che, Juda ram lal kuoma chun hieng hin hril rawh: Ngai ta, Pharao sipaihai nang- ma ṭhangpui dinga hunghai chu, an ramah Aiguptaa bawk chun kîr nâwk an tih.

⁸ Chuongchun, Kaldaihai hung nâwk an ta, hi khawpui hi hung do an ta, lâng an ta, meiin râwng an tih.

⁹ LALPA chun hieng hin a tih: ‘Kaldaihai chun mi mâksan ta ngei an tih,’ tiin nang le nang inhlêm naw rawh; an fe hmang âwm si nawh a.

¹⁰ Nangma hung dotu che Kaldai sipaihai po po khawm chu lo that ta la khawm, anni laia chun mi hliemhai chau chu la umin, chuong khawm chun, mi tin chu mâni puon inhaia chun tho an ta, hi khawpui hi meiin râwng an tih,” tiin.

¹¹ Chun, Pharao sipaihai ṭi leia Kaldai sipaihai chu Jerusalema in- thawka an indar hnung chun,

¹² Jeremia chu Benjamin ramah va fea, chu hnam laia a chanvo chu la dingin, Jerusalema inthawk chun a suok tah a.

¹³ Ama chu Benjamin dai kawt- khâra a um lai chun, vêngtu sipai hotu chutaka chun a lo um a, a hming chu Hanania naupa Selemia naupa Irija a nih; ama chun, “Kaldaihai kuomah în pe a nih,” tiin zâwlnei Jeremia chu a man tah a.

¹⁴ Jeremia chun, “Thukhêl a nih; Kaldaihai kuomah kân pêk nawh,” a ta; nisienlakhawm, ama chun a ngai nawh a; chuongchun, Irija chun Jeremia chu a man a, rorêltuhai kuoma chun a hung ṭhuoi tah a.

¹⁵ Chun, rorêltuhai chu Jeremia chunga chun an lunginsen a, ama chu an hrem a, lekhaziektu Jonathan ina chun lung inah an khum tah a; chu chu lung inah an siem ta sih a.

Zedekiain Jeremia ân hmupui

¹⁶ Jeremia chu khur thima le kul- bîngahai chun a hung chun, chutaka chun Jeremia chu ni tamtak a um a;

¹⁷ chun, lal Zedekia chun mi a tir a, a hung ṭhuoi a, a ina chun lal chun a rûkin ân dawn a, a kuomah, “LAL- PA kuoma inthawkin thu a um?” a tih a. Chun, Jeremia chun “A um”, a tih a. “Babulon lal kutah pêkin i um ding a nih,” a ti bawk a.

¹⁸ Chu nawa khawm lal Zedekia kuomah Jeremia chun, “Nanga chunga amanih, i siehlawhai chunga amanih, hi hnam chunga hin amanih khaw lai am ka suksuola lung ina i mi khum a na?

¹⁹ I zâwlneihai, ‘Babulon lal chun hi ram amanih, nang amani khawm hung do naw ni,’ tituhai kha khaw lai am an um a?

²⁰ Chun, tuhin lo hre ta, aw ka pu lal, ka hni che, ka hnina hi, ka ngên che, i hmaa hin pawm ni raw se: lekhaziektu Jonathan ina khan mîn kîr tir nâwk ta naw rawh, chuong naw chun thi rawi ka tih,” a ta.

²¹ Chun, lal Zedekia chun thu a pêk a; Jeremia chu vêngtuhai kula chun an sieh a, khawpui sûnga bei po po chu hmang vawng a ni chenin bei siemtuhai kawtthlêra inthawkin ni tin bei an pêk a. Chuongchun, Jere- mia chu vêngtuhai kula chun a um zing tah a.