JEREMIA 30 - Pathien Lekhabu Inthieng (BSI)

Sal intângnaa inthawka kîr nâwk ding thu tiem a nih

¹ Jeremia kuoma LALPA thu hung tlung chun hieng hin a tih:

² “LALPA Israel Pathien chun hieng hin a tih: I kuoma thu ka hrilhai po po chu lekhabuah ziek rawh.

³ Ngai ta, nihai chu a hung tlung ta sih a, LALPA chun a tih; Ka mi Israelhai le Juda sal intângna chu inlêt nâwk tâng ka ta, LALPA chun a tih: an thlatuhai kuoma ram ka pêka chun hung inkîrtir nâwk ka ta, hluong an tih,” tiin.

⁴ Juda chungthua le Israel chung- thua LALPAIN thu a hrilhai chu hieng hi an nih,

⁵ “LALPA chun hieng hin a tih: Thlamuongna ni loin, ṭitna le inthin râwl ka hriet a.

⁶ Tuhin indawn unla, en vêl ta u, pasal nauhasea na an um hlak am? Iem a tih a nuhmei nauhase nat tuor ang hrieu a, pasal tin chu a kuthai a kâwnga innghata, mi tin hmai chu dâng vawnga ka hmu hi?

⁷ Ahei, chu ni chu a ropui sih a, chu ang hrim chu a um nawh a, Jakob buoina hun ngei chu a ni el a nih; nisienlakhawm, chutaka inthawk chun sansuokin um a tih.

⁸ Chun, chu nia chun hieng hi hung nîng a ta, sipaihai LALPA chun a tih: I rînga inthawk chun rîngkawl chu sukthliek ka ta, i hruihai chu suktan bawk ka tih; chuongchun, mi hmêlmakhai chun ama rawng chu bâwlpêk ta naw ni hai;

⁹ amiruokchu, LALPA an Pathien rawng le, an lal David an kuoma ka tungding ding chu a rawng bâwl lem tâng an tih.

¹⁰ Chuleiin, Aw Jakob, ka siehlaw, ṭi naw rawh, LALPA chun a tih: Aw Israel, beidawng bawk naw rawh, ngai ta, ram hlataka inthawkin ka sandam ding che a ni sih a, i thlahai chu an sal intângna rama inthawkin sandam bawk ka tih; chuongchun, Jakob chu hung kîr a ta, nuomsa le to ṭawk ṭawkin um a tih, tukhawma sukṭi ta naw ni hai.

¹¹ Nangma sandam ding chein i kuomah ka um sih a, LALPA chun a tih: nang ka sukdarna tieng chea hnamhai po po tâwpna letdêr chu siem ka ta, nang ruok chu suktâwp letdêr naw ning che; amiruokchu, rorêlnain sukdik lem ka ti cheh a, hrem loin ieng kawnga khawm mâk- san naw ning che.

¹² “LALPA chun hieng hin a ti sih a: I natna chu sukdam theilo a na, i hliemna chu a nasa êm êm a.

¹³ Tuoma i um theina dingin tukhawma i chungthuah an ṭan naw cheh a, sukdamna damdawi i nei naw a nih.

¹⁴ Nangma hmangaituhai po po che hlaka an theinghil cheh a; an zawng ta naw cheh a: mi rilo hremna le hmêlma inhliemna chun kân hliem si cheh a, i suolnahai an pung pei lei chun i khawhlona chu a nasa hle sih a.

¹⁵ I natna lei chun ieng dinga khêk am i na? I natna chu sukdam theilo a nih, i suolnahai chu an hung pung pei leiin, i khawhlona chu a nasa hle sih a, hieng thilhai hi i chungah ka thaw a ni hi.

¹⁶ Chuong lei chun nangma fazotu po pohai chu fâkzoin um an ta; i hmêlmahai po po chu, anni mi tin el chu salah intâng an tih; chun, nang- ma suksetu che chu suksietin um a ta; râllâka latu che po po chu râllâkah pe bawk ka tih.

¹⁷ Hrisêlna pe nâwk ka ti che a, i hliemnahai chu sukdampêk ka ti che, LALPA chun a ti sih a; ‘Zion hi a nih, tukhawma an pawisak naw chu,’ tiin, nang chu hnam ṭawphnawk an inbûk che leiin.

¹⁸ LALPA chun hieng hin a tih: Ngai ta u, Jakob puon in sal intângna chu inlêt nâwk ka ta; a chêngna hmunhai chu lunginsiet ka tih: chun, a dêng pâwng chung ngeiahai chun khawpui chu bâwl nîng a ta, lal in ropui khawm chu chutaka a um dân pângngai ang bawkin um a tih.

¹⁹ Annia inthawk chun lâwmthu hrilnahai siem a ta, hlimna siem- tuhai râwl ri le chun: chun, anni chu sukpung ka ta, tlâwm naw ni hai: chun, anni chu chawimawi bawk ka ta; chîn naw ni hai.

²⁰ An thlahai khawm chu kha hmaa ang bawk kha nîng an ta, an inkhâwmpui khawm ka hmaa chun indin nîng a ta, anni nêksâwrtu po pohai chu hrem pei ka tih.

²¹ Chun, an lal chu anni laia mi ngei nîng a ta, an rorêltu khawm chu anni laia inthawka hung suok ngei nîng a tih; chun, ama chu hung hnai dingin siem ka ta, ka kuom chu hung hnai a tih: Tu am a na, keima mi hung hnai dinga huoina nei chu? LALPA chun a ti sih a.

²² Chuongchun, ka mihai nîng in ta, kei chu in Pathien nîng ka tih.

²³ Ngai ta u, LALPA thlipui chu, a lunginsenna ngei chu, a fe suok a, mûtthieltu thlipui chu: mi rilo lu chunga chun hrâng a tih.

²⁴ A thaw hmakhat chun LALPA lunginsenna chu hung kîr nâwk ta naw nih a; a lungrila a tum chu a thaw hmakhat chun: hi hnung tieng nihaia chun la hrieng in tih,” tiin.