JEREMIA 3 - Pathien Lekhabu Inthieng (BSI)

¹ “Miin a nuhmei a mâk a, ama chu a mâksan a, pasal dang ta a hung ni tah a, amapa chu amanu kuoma chun a lût nâwk ding am a nih? Chuong a ni chun chu ram chu nasa- taka sukpawrche a ni naw ding maw? Nang khawm chu, ngaizâwng tam- takhai le chun nawchizawr angin i lo khawsa tah a, anachu, ka kuoma bawk i hung kîr nâwk ding? LALPA chun a tih.

² Bâwlhmun tienghai khi i mithai khan hang thlîr la, en ta; an zâlpui nawna che khaw lai am a um a? Thlalêra Arabia mi ang elin, lampui sîra chun an ta dingin i ṭhung a; i rîtlona le i hurna chun ram chu i sukpawrche ta a nih.

³ Chuleiin, raw sûrhai chu chel- tâng an na, ruo nuhnung tieng chu a um ta naw a nih; amiruokchu, mi hur chal chu i nei a, inzak i tum dêr si nawh a.

⁴ Tuta inthawk hin, ‘Ka pa, nang chu ka tleirâwlna ṭhuoitu i nih,’ tiin ka kuomah i khêk naw dîm a nih?

⁵ A lunginsenna chu a kawl zing dîm a nih? A tâwp chenin a kawl dîm a nih? Ngai ta, thil ṭha naw chu i hrilin i thaw tah a, i suol thei dân tâwpin i lo suol tah,” tiin.

Israel le Juda sim dingin zil an nih

⁶ Chu nawa khawm chun lal Josia hun lai chun ka kuomah LALPA chun a hril a, “Israel hnungtawlin a lo thaw ta hi i hmu am? Tlâng insâng tinahai hang fein le, thing hring tin hnuoia chun; chuongahai chun nawchizawr angin a lo khawsa tah a.

⁷ Hieng thilhai po po hi a thaw zo hnung chun ka kuomah hung kîr i tih, ka tih a, nisienlakhawm, a hung kîr si nawh a, a zuorpuinu rilotak Juda khawm chun ama chu a hmuh a.

⁸ Israel hnungtawl chun uiretna thil a lo thaw ka hmu lei tak chun ama chu ka mâk a, inmâkna lekha ka pêk tah ti a hmu sa khawmin a zuor- puinu rilotak Juda chun ṭitna châng a hriet chuong nawh a, ama ngei khawm chu a fe a, nawchizawrah a khawsa ve tah a.

⁹ A hurna inruina lei chun ram chu sukpawrchein a um tah a; thingbul- hai le lunghai le chun a lo uire tah a.

¹⁰ Hieng thil po pohai lei khawm hin a zuorpuinu hlêm hmang Juda chu a lungril po po leh a hung kîr naw ta rawp a, a la tehlêm lem a, LALPA chun a tih,” tiin.

¹¹ Chun, LALPA chun ka kuomah, “Juda rilotak nêk hin Israel hnung- tawl khawm hi fel lemin ân lang ie.

¹² Fe la, hi thuhai hi hmâr tienga chun va phuong la, ‘Hung kîr rawh, nang Israel hnungtawl, LALPA chun a tih; i chunga chun lunginsenin en naw ning cheh a, zângai theitak ka ni sih a, LALPA chun a tih, lunginsenna chu kumkhuoin kawl zing naw ning.

¹³ I suolna chu hre phawt phawt la, LALPA i Pathien chunga chun i lo bawsiet tah a, thing hring tin hnuoia chun hmêlmakhai kuomah i lo inphal tah a, ka râwl khawm chu i awi bawk ta nawh a, LALPA chun a tih.

¹⁴ Hung kîr ro, hnungtawl thlahai, LALPA chun a tih; in pasal ka ni sih a, chun, khawpuia pakhat le, pa- hnama pahni lâng ka ti cheu a, Ziona chun hung ṭhuoi ka ti cheu;

¹⁵ chuongchun, ka lungril ang takin berâmpu ding pêng ka ti cheu a, ama chun hrietna le hrietthiemnain châwm a ti cheu.

¹⁶ Chun, chu rama chun in hung pung a, in hung tam pha chun; chuong niahai chun, LALPA chun a tih, “LALPA thuthlungna bâwm hi,” ti ta ngai naw ni hai. An lungrilah hung lût ta naw nih a, anni hlaka hre zing ta naw ni hai a; va sir bawk naw ni hai a, thawa thaw khawm um ta naw ni,’ ti ta ngai naw ni hai.

¹⁷ Chu pha chun Jerusalem chu LALPA lalṭhungpha tiin inbûk an ta, hnam po pohai chu chutaka chun kei khâwm nîng an ta, LALPA hmingin Jerusalema chun, an lungril rilo ngarna ang chun fe khâwm nâwk ta ngai naw ni hai.

¹⁸ Chuong nihaia chun Juda sûng- kuo chu Israel sûngkuo le chun in- tlawn an ta, hmâr tieng rama in- thawk chun hung suok hmunkhat an ta, in thlatuhai kuoma rochan dinga ka pêk rama chun hung an tih.

¹⁹ “Kei chun, ‘hnamhai laia chun sie cheuin, ram inhawitak chu pe cheuin, hnamhai sipai pâwlhai rochan ṭhataka chun sie cheu ka lo lungril hlak a; chun, nangin, Pa, mi hung tîng i ta, i mi zuinaa inthawk hin fe hmang ta naw ti ni’ ka lo ti hlak a.

²⁰ Anachu, nuhmeiin a pasal chu khawhlotaka a ṭhe angin, chuong ang tak chun ka chungah khawhlotakin i lo thaw ta tlat el a; Aw Israel sûng- kuo,” LALPA chun a tih.

²¹ Bâwlhmun tlângahai chun râwl hriet a na; Israel thlahai ṭapna le hnina chu; chu chu lei chun an lampui chu an lo sukhran tah a, LALPA an Pathien chu an theinghil tah a nih.

²² “Hnungtawl thlahai, hung kîr ro; in hnungtawlnahai chu lo suk- dampêk ka ti cheu.” “Ngai ta, i kuoma chun kan hung ie, nang chu LALPA kan Pathien chu i ni sih a.

²³ Indiktakin muolhaia ṭhang- puina beiseia umhai chu mipui inri mur murhai chu a thlâwn el a nih; indiktakin LALPA ei Pathiena chun Israelhai sandamna chu a um a nih.”

²⁴ Nisienlakhawm, ei naupang laia inthawkin, ei thlatuhai sin inrimna chu thil inzâpui umhai chun a lo fâk zo tah a, an bâwng ruolhai, an berâm ruolhai, an naupasalhai le an naunuhmeihai leh;

²⁵ ei inzaknaa chun zâl ei ta, ei lungril ngaibuoina chun mîn khum raw se; LALPA ei Pathien chunga chun thil ei lo suksuol ta sih a; ei naupang laia inthawk tah vawisûn chen hin eini ni leh, ei thlatuhai ni leh; chuongchun, LALPA ei Pathien râwl chu ei lo awi ta naw a nih.