JEREMIA 29 - Pathien Lekhabu Inthieng (BSI)

Sal intânghai kuoma Jeremia lekhathawn

¹ Tuhin, sal intâng upa la um- sunhai le, thiempuhai le, zâwl- neihai le, mipui po po Jerusalema inthawka Babulona Nebukadnezzar- in sala a ṭhuoihai kuoma zâwlnei Jeremia lekhathawn thuhai chu hienghai hi an nih:

² (lal Jekonia le lalnu nu le, mi tillâkhai le, Juda ram le Jerusalema lalhai le, mi themthiemhai le, thîrsu- hai leh Jerusalem an suoksan hnung chun a nih).

³ Saphan naupa Elasa le, Hilkia naupa Gemaria (Babulon lal Nebu- kadnezzar kuoma Juda ram lal Zedekian Babulona a tirhai) kuta chun thawn a nih

⁴ Jerusalema inthawka Babulona sala intâng dinga kân ṭhuoihmang- tirhai po po kuoma chun, sipaihai LALPA, Israel Pathien chun hieng- hin a tih:

⁵ Inhai bâwl unla, a sûngahai chun chêng unla, huonhai chu siem unla, an rahai chu fa bawk ro;

⁶ nuhmeihai nei unla, naupasal- hai, naunuhmeihai nei unla: in naupasalhai nuhmei inneitir unla, in naunuhmeihai khawm pasal inneitir bawk unla, naupasalhai le naunu- hmeihai an nei theina dingin; chu- taka chun hung pung pei unla, kiem tieng pan ta naw ro.

⁷ Chun, sala intâng dinga kân ṭhuoihmangtirna cheu khawpuia inremna chu zawng unla, chu chu LALPA kuoma chun hni ro; chutaka inremna lei chun muongna in nei ding a ni sih a.

⁸ Sipaihai LALPA Israel Pathien chun hieng hin a tih: Nangni laia in zâwlnei umhai le, in khawhri zâwl- haiin hlêm naw raw se cheu, chun, in manghai in imang khawm chu ring bawk naw unla.

⁹ Keia hmingin khêlin in kuomah thu an hril hlak sih a; anni chu ka tir an ni nawh, LALPA chun a tih.

¹⁰ LALPA chun hieng hin a ti sih a; Babulona intâng kum sâwmsari a tling hnunga chun, hung sir ka ti cheu a, hi hmuna inkîrtir ding cheuin in kuoma chun ka thu tiem chu hlen ka tih.

¹¹ Nangni tieng panga ka ngaituo, thil ngaituohai chu ka hriet sih a, LALPA chun a tih, in tâwpna tienga beiseina siempêk ding cheuin thil ṭha naw ni loin, thlamuongna lungril a ni lem.

¹² Chun, kei chu mi hung ko in ta, fêng in ta, ka kuoma chun ṭawngṭai in ta, chun, kei khawma lo ngai ka ti cheu.

¹³ Mi zawng in ta, in lungril po poa in mi zawng pha chun mi hmûng in tih.

¹⁴ Nangni ihmuin um ka ta, LALPA chun a tih: chuongchun, in sal intângna chu inlet ka ta, ka hnawt hmangna cheu hmun po poa inthawk le, hnam po pohaia inthawk chun ṭhuoi khâwm ka ti cheu a, LALPA chun a tih; chun, sala intâng dinga ṭhuoi hmanga kân umtirna cheu hmuna bawk khan hung ṭhuoi kîr nâwk ka ti cheu.

¹⁵ “LALPA chun Babulona khawm chun zâwlneihai a hung siem tah a,” in ti leiin,

¹⁶ David lalṭhungphaa ṭhung lal chungthua le, chu khawpuia mipui chêng po pohai, in unauhai nangni le sala intâng dinga fe ve nawhai chung- thua chun LALPAIN hieng hin a tih:

¹⁷ sipaihai LALPA chun hieng hin a tih: Ngai ta u, an chunga chun kâwlhnâm dâm, ṭâm dâm, hripui dâm tir ka ta, anni chu theichang hrût, an siet êm leia fâk thei lohai anga chun siem ka tih.

¹⁸ Chun, anni chu kâwlhnâm le ṭâm le hriin hnawt ka ta, anni ka tir hmangna tieng hnamhai po po laia chun thusekawk ding le, inchekna ding le, makti ding le, mi ṭawng- dâwng dingin hnuoia lalram po po laia hnungtieng hmatienga nawr- lênga um dingin pe suok ka tih;

¹⁹ anni chun ka thu an ngai naw leiin, LALPA chun a tih; inhmataka thoa anni tirin, ka siehlaw zâwlnei- hai chu an kuomah ka tir a; nisien- lakhawm, anni chu in lo ngai si nawh, LALPA chun a tih.

²⁰ Chuleichun, nangni sala intâng, Jerusalema inthawka Babulona ka tir po pohai, LALPA thu chu lo ngai ta u.

²¹ Ka hminga in kuoma thukhêl hriltu Maaseia naupa Zedekia chung thua le, Kolaia naupa Ahab chung- thua chun Israel Pathien, sipaihai LALPA chun hieng hin a tih: Ngai ta u, anni chu Babulon lal Nebukad- nezzar kuta chun pe suok ka ta, ama chun in mithmuah anni chu that a tih;

²² Babulona Juda sal intânghai po po chun, “Zedekia le Ahab, Babulon lalin a rawhai ang chun LALPA chun siem raw se che,” tiin, anni chung- thua chun ṭawngse inphurna takah hmang an tih:

²³ Israel rama chun invêtthlâk- takin thil an thawh a, an tuolbâwm- hai nuhmei le chun an uireh a, ka hming sâlin ka thupêk loa khêl thu an hril leiin; chun, kei chu a hretu, a hrietpuitu chu ka nih, LALPA chun a tih.

²⁴ Chun, Nehelam mi Semaia chungthua chun hieng ang hin thu hril i tih:

²⁵ Sipaihai LALPA, Israel Pathien chun hieng hin a tih: Jerusalema mi- pui um po pohai, thiempu Masseia naupa Zephania kuoma leh, thiem- puhai po po kuoma chun hieng anga nangma hminga lekha i thawn leiin:

²⁶ “Thiempu Jehoiada aia chun LALPA chun thiempuah a siem ta cheh a, chuongchun, LALPA ina chun hotu nîng i ta, chun, mi tukhawm ân vêt a, ama le ama zâwlneia ân siem chun, ama chu intângna ina siein, kawl inbuntir i tih.

²⁷ Chuleiin, tuhin ieng dinga Ana- thotha mi Jeremia in kuoma zâwlnei inti hi i kâwk naw am a na?

²⁸ ama chun, ‘Sal intâng sûng ding hi a sâwt a, inhai bâwl unla, a sûnga- hai chun chêng unla, huonhai siem unla, a rahai chu fa ro,’ tiin Babulon- ah thu a mi thawn si a” tiin.

²⁹ Chun, thiempu Zephania chun zâwlnei Jeremia na hrieta chun hi lekhathawn hi a tiem tah a.

³⁰ Chun, Jeremia kuoma chun LALPA thu chu a hung tlung a:

³¹ “Sal intânghai po po kuoma chun mi tir la. Nehelam mi Semaia chungthua chun LALPA chun hieng- hin a tih: Semaia chu ka tir loin, in kuoma chun thu hrilin, thukhêl chu a hung inawitir cheu leiin,

³² LALPA chun hieng hin a tih: Ngai ta u, Nehelam mi Semaia le a thlahai chu hrem ka ta; hi hnam laia chêng ding hi mi nei naw nih a, ka mihai laia thil ṭha ka thaw khawm chu hmu bawk naw ni, LALPA chun a tih: LALPA chunga helna thu a lo hril ta leiin,” tiin.