JAKOB 4 - Pathien Lekhabu Inthieng (BSI)

Khawvêl ruol nina

¹ Nangni laia indona le insêlna hai hi khâwlaia inthawka hung suok am an na? In taksa pêngahai indona siem hlaktu, in nuom zâwnga in- thawkhai chun hung suok an ni naw am a nih?

² In châk a, in nei si nawh a, tuol in that a, in inhnar a, in nei thei si nawh a; in insêl a, in indo a; in hni naw leiin in nei nawh a;

³ in hnih a, in hni indik naw leiin in hmu nawh, in inhawitirna dingin hmang in tum sih a.

⁴ Nangni uirenuhai, khawvêl ruol nina hi Pathien hmêlma nina a ni ti in hriet naw am a nih? Chuongchun, tûkhawm khawvêl ruol ni nuom taphawt chu Pathien hmêlmaah ân siem hlak a nih.

⁵ Annawleh, “Thlarau einia ân chêngtir chun, thîk khawp hielin a mi dit a nih,” ti hi, Pathien Lekha Thuin iengkhawm ni loin a hrilin in ring am a nih?

⁶ Nisienlakhawm, lunginsietna tam nâwkzuol a pêk hlak; chuleiin, Pathien Lekha Thuin, “Pathienin mi chapohai a kal a, inngaitlâwmhai ruok chu lunginsietna a pêk hlak,” a ti a nih.

⁷ Chuongchun, Pathien thu thuin um ro; amiruokchu, Diebol chu kal ro, chuongchun, tlân hmang san a ti cheu.

⁸ Pathien hnai ro, chuongchun, amain hnai a ti cheu. Mi suolhai, in kuthai sâwpfai ro, lungril bulbâl nei nawhai, in lungrilhai sukthieng ro.

⁹ Rimsi unla, lungngai unla, ṭap ro; in innui chu lungngaiah inchang sienla, in hlim nguiah inchang raw se.

¹⁰ Lalpa mithmuin inngaitlâwm ro, chuongchun, chawimawi a ti cheu.

Unauhai sawisêl thu

¹¹ Unauhai, inhrilse tuo naw ro. Tûkhawmin a unau a hrilsietin amanih, a unau a sawisêlin amanih, Dân a hrilsietin Dân a sawisêl a nih; nisienlakhawm, Dân i sawisêl chun Dân zâwmtu i ni nawh a, rorêltu i ni lem.

¹² Dân petu le rorêltu pakhat chau a um; sandam theia, sukbohmang thei chu; nang tuolbâwmhai sawisêl- tu chu tu am i ni leh?

Uong lo dinga vaulâwkna

¹³ Tuhin ngai ta u khai! nangni, “Vawisûn amanih, zinga manih, chu khawpuia chun fêng ei ta, chutaka chun kum khat va thang ei ta, sumdâwng ei ta, hlâwkna hmûng ei tih,” tituhai,

¹⁴ zînga chun ieng am a hung um ding in hriet si nawh. In hringna chu ieng am a na? Sûm sâwt nawtê hung inlanga, bo nâwk el hlak ang hi in ni sih a.

¹⁵ Chuongchun, “Lalpain rem a ti chun dam ei ta, chu chu, kha kha thâwng ei tih,” in ti ding hi a nih.

¹⁶ Nisienlakhawm, in uongnahai hi in suong lem sih a; chuong ang suongna po po chu suol a nih.

¹⁷ Chuongchun, tûkhawm thil ṭha thaw ding hre sia, thaw naw chu, a ta dingin suol a nih.