ISAI 63 - Pathien Lekhabu Inthieng (BSI)

Lalpa phubalâkna ni

¹ Edom rama inthawka hung, Bozra khuoa inthawka silfên suksen sil saw tu am a na? A puon sila ropuitak, a hrâtna a nasatzie anga hung saw? Keima, feltaka thu hril a, sandam kawnga mi hrâttak kha ka nih.

² Iengleiin am i puon sil kha a sen a, i silfênhai khawm kha grêp sâwrna khura sirsâwrtu silfên anga um am a na?

³ Keima chauin grêp sâwrna khurah ka sirsâwr a; mi tin laia mi pakhat khawm ka kuomah an um nawh a, anih, anni chu ka lungin- senin ka sir a, ka lunginsenin ka chîl a; chuongchun, an hringna thisen chu ka silfênahai hin thein a um a, ka puon po po hi ka sukpawrche tah a.

⁴ Phubalâk ni chu ka lungrilah a um sih a, ka mi intlanhai kum chu a hung tlung ta bawk a nih.

⁵ Chuongchun, ka hei en a, ṭhangpuitu ding hrim hrim an um nawh; chel ngîrtu ding hrim hrim an um naw chu mak ka tih a; chuleiin, keima bân ngei hin sandamna a mîn tlun a; ka lunginsenna chun a mi chel ngîr tah a.

⁶ Chuongchun, mi tin chu ka lung- insenin ka sirdeh a, ka lunginsenin ka sukrui a, an hringna thisen chu hnuoiah ka bunthlâk tah.

Israel ta dinga Pathien ṭhatna

⁷ LALPAIN thil iengkima a mi vur ang peiin LALPA zainêmzie thuhai le LALPA inpâkna thuhai chu hril ka tih; a lunginsietnahai ang pei le a zainêmna nasatzie ang peia Israel sûnghai chunga a ṭhatna nasataka an chunga a vur thu khawm kha hril bawk ka tih.

⁸ Ama chun, “Ka mihai, nau a tehlêma thaw lo dinghai an ni ngei el,” a ti sih a; chuongchun, anni san- damtuah a hung um tah a.

⁹ An lunginzîngna po poa chun ama chu a lunginzîng ve hlak a, vân- tirko, a hmaa um mi chun, anni chu a sanhim bawk hlak a; a hmangaina le a lunginsietnain ân tlan tâwl tah a; tienlai ni po poa chun anni chu a puokin anni chu a pawm hlak a.

¹⁰ Nisienlakhawm, an hel a, a thlarau inthieng chu an suklungngai a; chuleiin, anni do dingin ân let a, ama ngei chun anni chu a thaw tah a.

¹¹ Chuong lai chun a mihai chun, Mosie tienlai nihai chu an hriet zing a, hieng ang hin an tih, “Tuisuorieta inthawka a berâm ruol vêngtuhai leh anni hang ṭhuoitu kha khâwlai am? A thlarau inthieng anni laia sietu kha khâw lai am?

¹² A bân ropuitak Mosie chang- tienga infetirtu kha khâw lai am? Kumkhaw hming insiemna dinga an hmaa tui sukṭhetu kha khâwlai am?

¹³ An insui nawna dinga tui in- thûktaka thlalêra sakawr ṭhuoi anga anni ṭhuoi kaitu kha khâw lai am?

¹⁴ Ruoma ran zu fehai angin LALPA thlarau chun anni chu ân châwltir a, chuong ang chun, hming ropuitak în siemna dingin, i mihai chu i ṭhuoi kha,” tiin.

Zângaina le ṭhangpuina ngênna

¹⁵ Vâna inthawk khan zuk thlîr la, i în thiengna le i ropuina umnaa inthawk khan hung en ta: i ṭhahnem- ngaina le i thilthaw ropuitakhai kha khâw lai am? I lungrila i ngaina le i lainatnahai kha keia inthawk hin sukboin a um tah.

¹⁶ Abraham chun mi hre loin, Israel khawm chun mi ngaisak naw sien khawm, nang chu ka pa i ni sih a; nang chu, aw LALPA, kan pa i na, i hming chu chatuona inthawka keini mîn tlantu a nih.

¹⁷ Aw LALPA, nangin iengleiin am i lampuia inthawk dâm hin i mîn vâkhmangtir hlak a, nangma chu ṭi lo dinga kan lungril hi i mi sukngarpêk hlak am a na? I siehlaw, i rohluo hnamhai lei hin, hung kîr nâwk rawh.

¹⁸ I mi inthienghai chun sâwt nawtê chau an nei a, a mi dotuhai chun i hmun inthieng chu an sir siet tah.

¹⁹ An chunga ro i rêl ngai nawna, i hming put ngailohai ang chu kan hung ni ta hi.