ISAI 55 - Pathien Lekhabu Inthieng (BSI)

Mi po po kuoma zângaina a thlâwna pêk chu

¹ Hung ta u, dangchâr taphawthai, tuiahai hin hung ro, tangka nei nawhai khawm hung unla, inchaw unla, fa ro; anih, hung unla, uoin le nênetui tangka pe loin, a man khawm pe loin inchaw ro.

² Bu ni si loah ieng dinga tangka in sêng am a na? Khawp le tlaina ni si loah ieng dinga in tha in sêng am a na? Ka thu nguntakin ngai unla, thil ṭha chu fa ro, in hringna chu thil thau chun hlim raw se.

³ In na hung sit unla, ka kuomah hung ro; ngai unla, chuongchun, in hringna chu hring a tih; chun, in kuomah kumkhaw thu thlung ka tih; David kuoma lunginsietna tiem tlat tahai chu.

⁴ Ngai ta, ama chu mi tin ta dinga hretuah ka ruot a, mi tin ta dingin hotua le ṭhuoituah ka ruot a nih.

⁵ Ngai ta, i hriet naw hnam chu ko i ta, nangma hre ngailo hnam chu i kuomah hung tlân an ta; LALPA i Pathien lei le, Israelhai Mi Inthieng lei chun; ama chun a chawimawi si cheh a.

⁶ Hmu awla a um lai hin LALPA chu zawng unla, a hnâi lai hin ko ro;

⁷ mi rilo chun a um dân chu bânsan sienla, mi fel naw chun a ngai- tuonahai chu bânsan bawk raw se; LALPA kuomah kîr nâwk raw se; chuongchun, ama chun lo lunginsiet a ta; ei Pathien kuomah kîr nâwk raw se, ama chun a lo ngaidam nasa khawp âwm sih a.

⁸ Ka ngaituohai hi i ngaituohai a ni si nawh a, i um dânhai chu ka um dân a ni bawk nawh, LALPAIN a tih.

⁹ Vân khi hnuoi nêka ân sâng lem angin, ka um dânhai hi i um dânhai nêkin ân sâng lem sih a, ka ngai- tuohai khawm hi i ngaituohai nêkin ân sâng lem a nih.

¹⁰ Ruo le vûr chu vâna inthawkin a sûr hlak a, khitienga khin a kîr nâwk ngai nawh a, hnuoi hi a châwm lem a, thil ân mâwngtirin ân dertir a, bu chi thetu kuoma chun bu chi a pêk a, fatu kuoma chun fâk ding a pêk hlak a.

¹¹ chuong ang bawkin ka baua inthawka ka thu suok chu um a tih: iengkhawm thaw nei loin ka kuomah hung kîr nâwk naw nih a, ka dit ang chu thaw lem a ta, thil thaw dinga ka tirnaa chun hlawtling bawk a tih.

¹² Hlimtaka suokin, lungmuong- taka ṭhuoi suokin in um ding a ni sih a, tlâng lienhai le tlâng chînhai chun in hmaah hla sak suok phut an tih, phûl thing po pohai chun an kut ben bawk an tih.

¹³ Hlohlingnei nêk chun fâr mâwng lem a ta, buor nêk chun inhmui mâwng lem a tih; chu chu LALPA ta dinga hmingṭhatna ding le, kum- khawtluonga inchikna sukbohmanga um lo ding nîng a tih.