ISAI 47 - Pathien Lekhabu Inthieng (BSI)

Babulon chunga rorêlna

¹ Aw Babulon nau nunghâk, ṭum la, pilvutah ṭhung rawh; aw Kaldai naunu, lalṭhungpha boin hnuoiah ṭhung rawh; inno le ṭha an ti ta naw ding che a nih.

² Bu râwtnawina lunghai la la, beiphit siem rawh: în khumna puon kha sie la, i fenfuol kha hlîp la, i ke kha hâwk la, vadunghai pal kai rawh.

³ I saruokna chu inkhum loin um a ta, anih, i zamaw chu inlang a tih; phuba lâng ka ta, mi tukhawm in- rempui naw ningah.

⁴ A mîn tlantu chu a hming sipai- hai LALPA a na, Israelhai Mi Inthieng chu.

⁵ Aw Kaldai naunu, to zingin ṭhung la, inthim hnuoiah lût ta, “Ram tin lalnu,” an ti ta naw ding che a nih.

⁶ Ka mihai chungah ka lunginsen a, ka rochan chu ka sukpawrcheh a, i kutah pêng ka ti cheh a, nang chun an chungah lunginsietna hrim hrim în langtir naw a, tarhai chung chena khawm i rîngkawl riktak chu în nghat a.

⁷ Chun, “Kei hi kumkhuoin lal- nuah um ka tih,” i tih a; chuongchun, chuong thilhai chu i lungrilin i ngaituo nawh a, a tâwpna ding hlak chu i hriet zing bawk nawh a.

⁸ Chuongchun, nang nunkhuo phâm a, ngaisamtaka um a, mâni lungrila, “Keima ka nih, keima naw chu mi dang hrim hrim an um nawh, hmeithaiah ṭhung naw ning a, nauhai chân thu khawm hre bawk naw ning,” titu, hi hi hre rawh;

⁹ hieng thil pahni: nauhai chânna le hmeithaina hin, ni khat thil thuah, mitkhapkâr loah, a hung nang lem ding che a nih; i dâwi hmangna chu tam hlein i invêngna chu tam rei rui sienla khawm, chuong chu nasatakin i chungah a hung tlung ding a nih.

¹⁰ I rîtlona chu i ring a, “Tu- khawma an mi hmu nawh,” i ti vei sih a, i varna le i hrietna chun a suk- khawhlo cheh a, “Keima ka nih, keima naw chu mi dang hrim an um nawh,” i lungrilin i ti bawk a.

¹¹ Chuleiin, thil ṭha naw i chung- ah hung tlung a ta; invêng dân khawm thiem naw ti ni; vângduoina khawmin hung vur a ti cheh a, chu chu sukbo thei naw ti nih: rausanna khawm kârloin i chungah hung tlung thut a ta, chu chu hre lâwk naw ti nih.

¹² În vêngna le i dâwi hmangna, i naupangtea inthawka în suksâwl hlak- nahai chu ngîrpui ta la; i ṭhathnem- pui thei ding phawt a, i hnepui thei ding phawt chun.

¹³ I remruot a tam êm leiin i sâwl ta a ni hi: tuhin chu vân semtuhai, arasi thlîrtuhai, thlakipa thu hril- lâwktuhai chu ngîr sienla, i chunga thil hung tlung dinghaia inthawk chun sanhim raw se che.

¹⁴ Ngai ta, bupâwl ang el nîng an ta; meiin kâng a tih; meichawk thil- thawtheinaa inthawk chun insanhim naw ni hai a; insuklumna ding mei- hawl ang khawm ni naw nih a, awi ding mei ang khawm ni bawk naw ni.

¹⁵ Chuongchun, în suksâwlna hlak thilhai chu a um ding a nih: i nau- pangtea inthawka i kuoma sum- dâwng hlaktuhai chu mâni lampui sengah invâk hmang an ta; sanhimtu ding che tukhawm um naw ni hai.