ISAI 24 - Pathien Lekhabu Inthieng (BSI)

Hnuoi chunga Lalpa rorêlna

¹ Ngai ta, LALPA chun hnuoi hi sukruokin, a sukram ding a na, a letkhupin, a umhai chu a sukdar ding a nih.

² Chun, vântlâng chunga a um angin, thiempu chunga khawm um a ta, suokpa chunga a um angin a pu chunga khawm um a tih; suoknu chunga a um angin a pi chungah um a ta; inchawtu chunga a um angin a zawrtu chunga khawm um a tih; inpûktirtu chunga a um angin a pûktu chunga khawm um a tih; a pung hnawta inpûktirtu chunga a um angin a kuoma a pung petu chunga khawm um a tih.

³ Hnuoi hi sukruok fai dêr le, suksiet fai dêrin um a tih; chu thu chu LALPAIN a hril ta sih a.

⁴ Hnuoi hi a ṭapin a ṭuoi a, khawvêl hi a ṭuoiin a châu a, hnuoia mi chunghnunghai chu an châu ie.

⁵ Hnuoi hi a umhai hnuoia chun a pawrche zo tah a; dânhai chu an bawsiet a, thuruot chu an sukdang- lam a, kumkhaw thuthlung chu an bawsiet leiin.

⁶ Chuleiin, ṭawngsie inphurnain hnuoi a fâk zo a, a umhai chu thiem- naw inchangtirin an um tah; chuleiin, hnuoia umhai chu an kâng hlum a, mi tlâwmte chau an um tah.

⁷ Uoin thar chu a ṭap a, grêphrui chu a châu ie, lungrila hlim po pohai chu an inrûm ie.

⁸ Khuongtêhai hlimna chu a reh a, lâwmtaka umhai ri chu a dei ie, ṭing- ṭang hlim ri chu a re ie.

⁹ Hla sak pumin uoin dâwn naw ni hai, zu chu a dâwntuhai ta dingin khatak nîng a tih.

¹⁰ Buoina khawpui chu sukchimin a um tah; tukhawm an lût nawna dingin in tin chu khârin a um tah.

¹¹ Uoin leiin kawtthlêrahai chun ṭap ri a um a, hlimna po po sukthimin a um a, hi ram hlimna hi a bo tah.

¹² Khawpuia chun rausanna mâk- sanin a um a, a kul kawtkhâr chu vuok sietin a um tah.

¹³ Hnuoi lailia mi tin lai chun hieng ang hin a la um ding a ni sih a, oliv thing vuok hnunga a ra la um hlak ang le, grêp lo hnunga grêp hmu ṭhel lo ding a la um hlak ang el hin.

¹⁴ Chuonghai chun an râwl in- suong an ta, khêk an tih; LALPA ropuina leiin tuisuorieta inthawkin inringtakin an khêk ie.

¹⁵ Chu chu lei chun LALPA chu khawsaktieng chun chawimawi ro, LALPA Israelhai Pathien hming ngei chu tuisuoriet thlierkârahai chun chawimawi ro.

¹⁶ Kâwlkawdawnga hla sakhai kan hriet a, “Mi felhai kuomah ro- puina um raw se,” ti hla hi. Nisien- lakhawm, kei chun, “Ka chêr deu deu a, ka chêr deu deu a, ka chung a rik ie! vervêktaka thawtuhai chun vervêk- takin an thawh a, anih, vervêktaka thawtuhai chun vervêktakin an thaw,” ka tih a.

¹⁷ Aw hnuoia um, ṭitumna dâm, khur dâm, châng dâm chu i chungah a um a.

¹⁸ Chuongchun, ṭitum ria in- thawka tlânhmang chu khura chun tlâng a ta; khur sûnga inthawka hung suok chu chângah âwk a tih; chung- tienga tukverhai chu hawngin a um sih a; leihnuoi innghatsan chu ân hnîng bawk a nih.

¹⁹ Hnuoi hi a kawi se vawng a, hnuoi hi sukboin a um tah, hnuoi hi nasatakin ân hnîng a.

²⁰ Hnuoi hi zu inrui ang elin pêm thlawk thlawk a ta, bûktê insâwi angin insâwi dar dar a tih; a baw- sietna chu a chungah riktakin um a ta, chuongchun, tlûng a ta, tho nâwk ta naw nih.

²¹ Chun, chu nia chun LALPA chun chungtienga mi achunghnung- hai pâwl lientak chu hrem a tih, hnuoia hnuoi lalhai leh.

²² Chun, mi intânghai khursûnga ṭhuoi khâwma an um angin chuong- hai chu ṭhuoi khâwmin um an ta, intângna ina khumin um an ta, ni sâwttak hnunga chun hremin um an tih.

²³ Chu hnunga chun thla khi inzaktakin um a ta, nisa khi muol- photakin um a tih; sipaihai LALPA chu Zion tlâng le, Jerusalem khuoa le, a upahai hmaa chun, ropuitakin lalah a um ding a ni sih a.