ISAI 2 - Pathien Lekhabu Inthieng (BSI)

Khawvêl pumpui chunga inremna dinga LALPA rorêlna

¹ Amoz naupa Isaiin Judahai le Jerusalem chungchâng thu a hmu chu.

² Ni nuhnungahai chun LALPA in umna tlâng chu tlâng lien chungahai chun sukdetin um a ta, tlâng chînhai chunga chun dawm sângin um bawk a ta, chutaka chun hnam tinrênghai chu fe nguoi nguoi an tih.

³ Chun, chi tamtakhai chu fêng an ta, “Hung unla, LALPA tlângah, Jakob Pathien ina chun, hang fêng ei tiu; chuongchun, ama chun a lampui chanchinhai chu mîn chûktir a ta, a lampuiahai chun fêng ei tih,” tîng an tih. Ziona inthawk chun dân thu chu a hung suok ding a ni sih a. LALPA thu chu Jerusalema inthawkin a hung suok ding a nih.

⁴ Ama chun hnam tin kârah ro rêl a ta, chi tamtak khawm kâwk bawk a tih; chun, an kâwlhnâmhai chu hnuoi inletna hmawr zumahai sut an ta, an feihai chu thei kûng âtbawngna chem inkuoiahai sut an ta, hnam dangin hnam dang chungah kâwlhnâm inlet ta naw nih a, indo dân khawm inchûk ta bawk naw ni hai.

Mi chapohai chunga LALPA rorêlna

⁵ Aw Jakob sûnghai, hung unla, LALPA vara hin lêng ei tiu khai.

⁶ Khawsak tienga dân hung suokhaiin an hung sip a, Philistin mihai anga aisânthiemhai an nih a, ram dang mi nauhai leh kut le kut an inben leiin, i mi Jakob sûnghai chu i mâksan ta sih a.

⁷ An ram chu tangka le râng- kachakin a sip a, an sumhai chu tiem sêng ruol a ni bawk nawh; an ram chu sakawrin a sip a, an tawlailîr- hai chu tiem sêng ruol an ni bawk nawh.

⁸ An ram chu milimin a sip a, anni kuta thaw suok, anni kutpârhaia siem chu an biek hlak.

⁹ Mi chînhai chu sukhnuoiin an um a, mi lienhai chu suktlâwmin an um bawk a, chuleiin, anni chu ngaidam naw rawh.

¹⁰ LALPA ṭiumnaa inthawk le a mawina ropuinaa inthawk chun lung- puia chun lût unla, pilvutah inbi- hmang ro.

¹¹ Mihriem inditnahai chu suk- tlâwmin um a ta, mihai chapona chu sukhnuoiin um a tih; chu nia chun LALPA chau chu chawisângin um a tih.

¹² Sipaihai LALPA ni chu inngai- sâng le, chapo po po chunga le chawisânga um po pohai chunga chun a la um ding a ni sih a; chuongchun, suktlâwmin um a tih;

¹³ Lebanon tlânga sidar thing insângtak le chawisânga umhai po po chunga dâm, Basan rama thingsaisuo po po chunga dâm;

¹⁴ tlâng lien insângtak chunga dâm, tlâng chîn dawm sânga um po po chunga dâm;

¹⁵ in insâng insângtak tak chunga dâm, kul tlângpui bang nei po po chunga dâm;

¹⁶ Tarsis lawng lien po po chunga dâm, thil tehlêm ditum po po chunga dâm khawm la um a tih.

¹⁷ Mihriem inditnahai chu suk- hnuoiin um a ta, mihai chapona chu suktlâwmin um bawk a tih; chu nia chun LALPA chau chu chawisângin um a tih.

¹⁸ Chun, milimhai chu bohmang dai an tih.

¹⁹ Chun, hnuoi hi nasatak taka sukhnîng dinga a tho pha chun, LALPA ṭiumnaa inthawk le a mawina ropuinaa inthawk chun mihai chu lungpui pûkahai le hnuoi kuoahai chun lût an tih.

²⁰ Chuong niahai chun mihai chun an tangka milimhai le an rângkachak milimhai, biek dinga an insiem- pêkhai chu, buikelet kuoma le bâk kuoma chun pei an ta,

²¹ hnuoi hi nasatak taka sukhnîng dinga a tho pha, LALPA ṭiumnaa in- thawk le, a mawina ropuinaa inthawk chun, lungpui pûkahai le râwl lungpui kakahai chun lût an tih.

²² An hnâr chaua thuok um, mihriem ring hi bânsan ta ro, ieng kawng âm ring tlâk an ni hrim leh?