INṬANNA 4 - Pathien Lekhabu Inthieng (BSI)

Kaina le Abel

¹ Chun, Adam chun a nuhmei Evi chu a pâwl a; chuongchun, ân rai a, Kaina a hung nei a, “LALPA ṭhangpuinain pasal ka nei tah,” a ta.

² Chun, a sang Abel a hung nei nâwk a. Abel chu berâm vêngtuah a um a, Kaina ruok chu hnuoi inlettuin.

³ Chun, a nakie chun hieng ang hi a na, Kaina chun LALPA kuoma inhlân dingin loa inthawkin a hung lâk a.

⁴ Abel khawm chun a berâm ruol laia a pieng hmasatakhai le a thau chu a hung lâk a. LALPA chun Abel le a thilinhlân chu a lâwm a;

⁵ Kaina le a thilinhlân ruok chu a lâwm ve nawh a. Chuongchun, Kaina chu a lunginsen êm êm a, a hmêl a hung inthim khup el tah a.

⁶ LALPA chun Kaina kuoma chun, “Iengdinga i lung a sen am? Ieng- dinga i hmêl a hung inthim am?

⁷ Thil thaw ṭha ni la chu pawm i ni naw ding am a nih? I thaw ṭha naw ruok chun suol chu kawtkhâr bulah a bawk zing a nih; a dit zâwng chu nangma thuhne che a nih a, nisienlakhawm, nangin i thuhne lem ding a nih,” a tih a.

⁸ Kaina chun a sang Abel kuomah, “Thaw ta, lo tieng va fêng ei tih,” a ta; loa an um lai chun Kaina chun a sang Abel chu a thawh a, a that ta el a.

⁹ Chuongchun, LALPA chun Kaina kuoma chun, “I sang Abel kha khâwlai am a um tah a?” a ta. Ama chun, “Ka hriet nawh, ka sang vêngtu am ka nih?” a tih a.

¹⁰ LALPA chun, “Iengam i thaw leh? I sang thisen râwl chun hnuoia inthawkin a mi ko a nih.

¹¹ Hnuoi, i kuta inthawka i sang thisen dawng dinga a bâu lo katua inthawkin ṭawngsephur i ni tah,

¹² hnuoi în let pha khawm a ṭhatna chu pe phal ta naw ni che; hnuoia hin tlânhmang le invai hung ni tâng i tih,” a ta.

¹³ Chun, Kaina chun LALPA kuomah, “I mi hremna hi a nasa bêk a, tuor zo naw ning.

¹⁴ Ngai ta, nangin vawisûn hin hnuoi chunga inthawkin i mi hnawt- hmang ta sih a; i mithmua inthawk thuphmangin ka um ding a ni tah a; hnuoia hin tlânhmang le invai ka lo ni ta ding a ni sih a, chuleiin, a mi hmu taphawtin mi that el an tih,” a ta.

¹⁵ LALPA chun a kuomah, “Chuong a ni chun tukhawm Kaina thattu chu a let sariin a chungah phuba lâk nîng a tih,” a ta. Chuongchun, mîn an hmu a, an that nawna dingin LALPAIN Kaina chu ân chik tah a.

¹⁶ Chuongchun, Kaina chu LALPA kuoma inthawk chu a suok tah a. Eden sak tienga Nod ramah a um tah a.

Kaina thlahai

¹⁷ Kaina chun a nuhmei a pâwl a, chuongchun, ân rai a, Enok a nei a; chun, khuo a siem a, a khaw hminga chun a naupa hming chawiin Enok a sak a.

¹⁸ Enok chun Irad a nei a; Irad chun Mehujael a nei a; Mehujael chun Methusael a nei a; Methusael chun Lamek a nei a.

¹⁹ Lamek chun nuhmei pahni a nei a, pakhat hming chu Ada a nih a, pakhat hming chu Zila a nih.

²⁰ Ada chun Jabal a nei a, ama chu puon ina um ran vaituhai thlatu a nih.

²¹ A sang hming chu Jubal a na, ama chu ṭingṭang le theihle mûttuhai po po thlatu a nih.

²² Zila khawm chun Tubal-kaina, dâr le thîr hriemhrei tinrêng suttu, a nei a; chun Tubal-kaina farnu chu Naama a nih.

²³ Lamek chun a nuhmeihai kuoma chun, “Ada le Zilla hai, ka rawl hre unla; Lamek nuhmeihai, ka thu hril hi ngai ro: Sukhliema ka um leiin mi ka that a, Vuok thitlinga ka um leiin tlangvâl ka that a nih:

²⁴ Kaina phuba hman a let saria lâk a ni ding chun, Lamek phuba lem chu a let sâwmsari le pasariin lâk ni ngei a tih,” a ta.

Seth thlahai

²⁵ Chun, Adam chun a nuhmei chu a pâwl nâwk a; chuongchun, ama chun naupasal a nei nâwk a, a hmingah Seth a sak a: “Pathienin Abel aiah chi thla dang a mi ruotpêk tah; Kaina chun ama a that ta sih a,” a tih a.

²⁶ Chun, ama, Seth ngei khawm chun naupasal a nei tah a; a hmingah Enos a sak a; chuong lai chun mihai chun LALPA hming chu an hung lam ṭan tah a.