INṬANNA 27 - Pathien Lekhabu Inthieng (BSI)

Isakin Jakob mal a sâwm

¹ Isak chu a hung tar a, khaw hmu thei lo khawpa a mit a hung inthim chun, a naupa upa lem Esau chu a ko a, a kuomah, “Ka naupa,” a tih a: ama chun, “Hitaka hi ka um,” a tih a.

² Chun, amân a kuomah, “Ngai ta, ka tar ta bêk a, ka thi ni ding ka hriet si nawh a.

³ Chuleiin, tuhin, lunginsiettakin, i hriemhrei thal bâwm le i thal ngul kha chawi la, phûlah va suok la, sakhi mi va kâppêk rawh.

⁴ Chun, ka thi hmaa mal ka sâwm theina ding chein, ka du zâwng takin hme inhniktakah mi siempêk la, ka fâk dingin ka kuomah hung la rawh,” a tih a.

⁵ Chun, Isakin a naupa Esau a biek lai chu Rebekain a lo hriet a. Chuonga Esau chu sakhi kâpa hung hâwn dinga phûla a fe laiin,

⁶ Rebeka chun a naupa Jakob kuomah, “Ngai ta,i pa chun i u Esau kuomah hieng hin a ti ka hriet a,

⁷ ‘Sakhi mi hung kâppêk la, ka fâk a ka thi hmaa LALPA hmaa mal ka sâwmna ding chein, hme inhniktakin mi hung siempêk rawh,’ tiin.

⁸ Chuleiin, tuhin, ka naupa, thu ka pêk ang pei che chu zâwm rawh.

⁹ Ran ruol lai va fe la, chutaka inthawk chu kêlte ṭha deu deu pahni mi va lapêk rawh: chu chu a duzâwng takin i pa ta dingin hme inhniktakah lo siem ka tih;

¹⁰ chun, a thi hmaa mal a sâwm theina ding chein a fâk dingin i pa kuomah i va fepui ding a nih,” a tih a.

¹¹ Jakob chun a nu Rebeka kuoma chun, “Ngai ta, ka u Esau chu mi inhmultak a nih a, kei ruok chu mi innâmtak ka ni sih a.

¹² Ka pa chun a mi lo them vêl el khawm a ni thei a, ama ngaiin hlêmtu ang hung ni ding ka nih a, malsâwm nêk hmanin ṭawngsie inphur ni lem el ka tih a,” a tih a.

¹³ A nu chun a kuomah, “Ka naupa, i ṭawngse phur ding chu keia chungah um raw se: ka thu zâwm la mi va lapêk el rawh,” a tih a.

¹⁴ Chuongchun, a va feh a, a va lâk a, a nu kuomah a hungpui a; chun, a nu chun a pa du zâwngin hme inhniktakin a lo siem tah a.

¹⁵ Chun, Rebeka chun a naupa upa lem, Esau silfên ṭhatak, ina a kuoma um chu a lâk a, a naupa naupang lem Jakob chu ân hâktir a;

¹⁶ kêlte vun chun a kut nâmna lai le a rîng nâmna lai chu a tuom a:

¹⁷ chun, hme inhniktak le bei a siemhai chu a naupa Jakob kutah a pêk bawk a.

¹⁸ Chun, ama chu a pa kuomah a feh a, “Pa,” a tih a; ama chun, “Hitaka hi ka um, ka naupa a tu lem am i nih a?” a tih a.

¹⁹ Jakob chun a pa kuomah, “I naupa upa lem Esau ka nih, i mi tir ang khan ka thaw zo tah, lunginsiettakin tho la, mal mi sâwm dingin ṭhung la, ka sakhi sa hi fa raw le,” a tih a.

²⁰ Isak chun a naupa kuomah, “Ka naupa, iengtizie am a na i hung inhma ngei de?” a tih a. Ama chun, “LALPA i Pathienin a mîn hlâw- tlingtir lei a nih,” a tih a.

²¹ Chun, Isak chun Jakob kuomah, “Ka naupa, lunginsiettakin hung hnai raw khai, lo them vêl ka ti che, ka naupa Esau i ni takzet am,” a tih a.

²² Chun, Jakob chun a pa Isak chu a va hnai a; ama chun a lo them vêl a, “A rawl chu Jakob rawl a ni sih a, a kuthai chu Esau kut a ni sih a,” a tih a.

²³ Chuongchun, a kut chu Esau kut anga ân hmul leiin ama chu a hriet nawh a; mal a sâwm tah a.

²⁴ “Ka naupa Esau ngei i ni de maw?” a tih a. Ama chun, “Nih e,” a tih a.

²⁵ Chun, ama chun, “Mi hung chawi hnai pêk rawh, chuongchun, mal ka sâwm theina ding chein ka naupa sakhi sa chu lo fâng ka tih,” a tih a. Chuongchun, a hung chawi hnai pêk a, a fâk tah a; uoin khawm a lâkpêk a, a dâwn bawk a.

²⁶ Chun, a pa Isak chun a kuomah, “Ka naupa, hung hnai la mi fâwp rawh,” a tih a.

²⁷ Chuongchun, a va hnai a, a fâwp a: ama chun a silfên rim chu a hriet a, mal a sâwm tah a, “En ta, ka naupa rim hi LALPA malsâwm ram rim ang a nih

²⁸ Chuongchun, Pathienin vân daidaw, Le hnuoi ṭhatna hmun, Le bu le uoin tamtak pe raw se che.

²⁹ Mi chi tum tumin i rawng bâwl hai sienla, Hnam tum tumin chibai bûk raw hai se che. I unauhai lai lalah um la, I nu nauhaiin chibai bûk raw hai se che. Ṭawngsie inphurtu che taphawt chu ṭawngsephurin um sienla, Malsâwmtu che chu malsâwmin um raw se,” a tih a.

³⁰ Chun, Isakin Jakob mal a sâwm zo a Jakob chu a pa kuoma inthawka a suok hman chauin, a u Esau chu a ramsuok a hung a.

³¹ Ama khawm chun hme in- hniktakin a siem a, a pa kuoma chun a hung chawi veh a, a pa kuoma chun, “Pa, tho la, mal i mi sâwmna dingin i naupa sakhi sa hi fa raw le,” a tih a.

³² A pa Isak chun a kuomah, “Tu am i nih a?” a tih a. Ama chun, “I naupa, i naupa upa lem Esau ka nih,” a tih a.

³³ Chuongchun, Isak chu nasatak- in ân thin a, “Sakhi kâp a, ka kuoma a sa hung la a, i hung tlung hmaa ka ifâk zo ta a, mal ka isâwm ta kha tu am a nih a? Anih, ama chu malsâwmin um tho tho tâng a tih,” a tih a.

³⁴ Esau chun a pa thu hril a hrietin, nasatak le thlasetakin a ṭap tah a, a pa kuoma chun, “Aw pa, kei hi, kei khawm hi mal mi sâwm ve lul raw a tih a.

³⁵ Ama chun, ‘I sangin a mi hung hlêm a, i malsâwmna chu a lâkpêk ta che a nih,’ a tih a.

³⁶ Esau chun a hminga Jakob an ti hi an ti dik hle ni lo am a nih? hi vawi hni a mi lân tah a nih a: ka nau lutir nina a mi lâkpêk a; chun, ngai ta, tuhin ka malsâwmna chu a mi lâkpêk nâwk ta hi,” a tih a. Chun, ama bawkin, “Malsâwmna i mi la hlapêk naw am a nih?” a tih a.

³⁷ Isak chun a dawn a, Esau kuomah, “Ngai ta, ama chu i lalah ka siem a, a unauhai po po khawm a siehlaw dingin ka pêk vawng a; bu le uoinin ka châwm ta bawk a; ka naupa, nanga ta dingin iengam thawpêk ka ti cheh a?” a tih a.

³⁸ Esau chun a pa kuomah, “Pa, malsâwmna pakhat bak amani i nei? Aw pa, kei hi, kei khawm hi mal mi sâwm ve lul rawh,” a tih a.

³⁹ Chun, Esau chu inringtakin a ṭap tah a. Chun, a pa Isak chun a dawn a, a kuomah, “Ngai ta, i umna hmun ding chu hnuoi ṭhatna hlata le, Chungtienga inthawka vân daidaw hlatah a nih a um ding chu.

⁴⁰ I kâwlhnâmin a nih i hring ding chu, i sang rawng khawm i bâwl ding a nih; În tleng suok pha ruok chun, A rîngkawl chu i rînga inthawk thinthla tâng i tih,” a tih a.

Jakob Haran tienga tir hmang a nih

⁴¹ Chun, a pain mal a sâwmna lei chun Esau chun Jakob chu a theida tah a. Esau chun a lungrilin, “Ka pa sûn ni ding chu a hnai tah a, chu pha chun ka sang Jakob chu that el ka tih,” a tih a.

⁴² A naupa upa lem Esau thu hril chu Rebeka an hril a; chuongchun, mi a tir a, a naupa naupang lem Jakob chu a ko a, a kuomah, “Ngai ta, i u Esau chun i chungthuah nang sukhlum tum chein ân hnêm a nih.

⁴³ Chuleichun, ka naupa, tuhin ka thu hi awi rawh: tho la, Harana ka ṭapa Laban inah tlânhmang rawh.

⁴⁴ I u lungsen hi a bo hmakhat chu ni iengzât lai amanih a kuomah va um phawt rawh,

⁴⁵ i u lungsenna hi a bo a, a chunga i thilthaw hi a theinghil pha chun mi tir ka ta, chutaka inthawk chu hung inṭhuoitir ka ti che, iengdingin am ni khatah in pahni hni chun chân el ka ti cheu a?” a tih a.

⁴⁶ Chun, Rebeka chun Isak kuomah, “Heth naunuhai lei hin nun hi ka nghawk a nih. Jakob hin hi ram nunghâk, hieng Heth naunuhai laia mi hi nuhmeiin a nei ve nâwk lem chun, ka ta dingin hring hi ieng am ṭhahnem a ta?” a tih a.