INṬANNA 25 - Pathien Lekhabu Inthieng (BSI)

Keturaa inthawka Abraham thlahai

¹ Abraham chun nuhmei dang a nei a, a hming chu Ketura a nih.

² Ama chun Zimran, Joksan, Medan, Midian, Ishbak le Suah a neipêk a.

³ Joksan chun naupasal Sheba le Dedan a nei a. Dedan naupasalhai chu Assurim, Letusim le Leummim an nih.

⁴ Midian naupasalhai chu Epha, Epher, Hanok, Abida le Eldaa an nih. Chuong po po chu Ketura nauhai an nih.

⁵ Abraham chun a nei po po Isak kuomah a pêk a.

⁶ A thaikêm naupasalhai kuoma ruok chun lâwmmanhai a pêk a; chun, ama la dam lai ngei chun a naupa Isak kuoma inthawk chun, saktieng, khawsak ramah, ân fe hmangtir tâwl tah a.

Abraham thina le phûma a um thu

⁷ Abraham dam sûng chu kum za khat le sâwmsari le panga a nih.

⁸ Abraham chun a thlarau ân thla tah a, a lua kêlsam ṭo hiela tartakin, tarkûna damin a thi tah a, a chipuihai kuoma ṭhuoiin a um ve tah a.

⁹ A naupasalhai Isak le Ismael chun Hit mi Zohar naupa Ephron loa, Mamre zâwna Makpelaa pûka chun an vui tah a;

¹⁰ chu lo chu Abrahamin Heth thlahaia inthawka ân châwk kha a nih. Chutaka chun Abraham chu an phûm a, a nuhmei Sara le khan.

¹¹ Abraham thi hnung chun Pathienin a naupa Isak chu mal a sâwm a; chu Isak chu Beer-lahai-roi kâwla chun a um a.

Ismael thlahai

¹² Hieng hi Abraham naupa Ismael, Sara suoknu Aigupta mi Hagarin Abraham a neipêk thlahai chu an nih.

¹³ Hieng hi an pieng dân indawt ang peia Ismael naupasalhai hming chu a nih: Ismael nau lutîr chu Nebaioth a nih, chu dawta chun Kedar, Adbeel, Mibsam,

¹⁴ Misma, Duma, Massa,

¹⁵ Hadad, Tema, Jetur, Naphis le Kedema an nih.

¹⁶ Chuong chu Ismael naupasal- hai an nih, an khuo ang pei le an riebûk ang peia an hming ziek a nih: an chi ang pei chun lal sâwm le pahni an nih.

¹⁷ Chun, Ismael dam sûng kum chu hi hi a nih, kum za le sâwmthum pasari hi: chun, a thlarau ân thlah a, a thi tah a, a chipuihai kuoma ṭhuoiin a um ve tah a.

¹⁸ Chun, a thlahai chu Havilaa inthawkin Assuria pan zâwngin Aigupta zâwn Sur chenin an um a, a unau po po epa chun a um a.

Esau le Jakob pieng thu

¹⁹ Chun, hieng hi Abraham naupa Isak thlahai chu an nih:

²⁰ Abraham chun naupasal Isak a nei a, Isak chu Paddan-aram rama Suria mi Bethuel naunu, Suria mi Laban farnu Rebeka chu nuhmeia a nei lai chun kum sâwmli mi a nih a.

²¹ Chun, a nuhmei chu a ching leiin, Isak chun LALPA kuomah a ngênpêk a, LALPAIN a hnina chu a lo ngaipêk a; chuongchun, a nuhmei Rebeka chu ân rai tah a.

²² A nau vawnhai chu phîng sûnga chun an insuol a; ama chun, “Hieng ang hi a ni si chun iengdinga ka dam zing am a na?” tiin LALPA indawn dingin a fe tah a.

²³ Chun, LALPAIN a kuomah, “I sula chun chi hni an um a, I phîng sûnga inthawk ngei chun hnam hni inṭhêng an ta, Hnam pakhat chu hnam pakhat nêk chun hrât lem a ta; A upa lemin a naupang lem rawng chu bâwl a tih,” a tih a.

²⁴ Chun, a nau nei a hun chun, ngai ta, a sula chun inphîr an lo um a,

²⁵ a hmasa lem chu sentakin, puon inhmul anga inhmul thuopin a hung suok a; chuongchun, a hmingah Esau an sak tah a.

²⁶ Chu zoa chun a unaupa chu a hung suok a, a kutin Esau kekhawng chu a chel zing a; chuongchun, a hmingah Jakob an sak a: Rebekain anni a nei lai chun Isak chu kum sâwmruk mi a nih.

Esauin a upa nina a zawr

²⁷ Chun, naupanghai chu an hung inṭhang lien a, Esau chu sapêl thiemtak, ramsuok mi tak a nih; Jakob ruok chu mi totak, puon in dâma um mi a nih.

²⁸ Isak chun a sakhi sa a fâk hlak leiin Esau chu a ngaina hle a; Rebeka ruok chun Jakob chu a ngaina lem a.

²⁹ Vawikhat chu Jakob chun ieng- khat a lo suonghruoi a, Esau chu rama inthawkin a hung a, a châu hleh a.

³⁰ Esau chun Jakob kuomah, “Lunginsiettakin i iengkhat sen suong hruoi kha, kha ngei kha mîn fâktir raw khai, ka ṭâm êm el,” a ta (chuleiin, a hming chu Edom an ti a nih).

³¹ Jakob chun, “I nau lutîr nina mîn châwktir zet la tie,” a ta.

³² Chun, Esau chun, “Nih e, ka thi vâng vâng a ni sih a, nau lutir nina el hi ka ta dingin ieng am ṭhahnem chuong a ta?” a ta.

³³ Jakob chun, “Ka kuomah inkhâm zet raw le,” a tih a: chun, a kuoma chun ân khâm tah a, a nau lutîr nina chu Jakob kuoma chun a zawr tah a.

³⁴ Chun, Jakob chun Esau chu bei le havai suong hruoi chu a pêk a; chuongchun, a fâkin a dâwn a, a tho a, a fe tah a. Chuong ang chun Esau chun a nau lutîr nina chu a ngainêp a nih.