INṬANNA 21 - Pathien Lekhabu Inthieng (BSI)

Isak pieng thu

¹ LALPA chun a hril ta angin Sara chu a zu kan a, LALPA chun a tiem ta angin Sara chungah a thawpêk bawk a.

² Chuongchun, Sara chu ân rai a, Pathienin a kuoma a hril hun ruot taka chun Abraham chu a tar hnungin naupasal a neipêk tah a.

³ Abraham chun a naupasal nei, Sarain a neipêk chu a hmingah Isak a sak a.

⁴ Chun, Abrahamin Pathienin a kuoma thu a pêk ang khan, a naupa Isak chu ni riet a tlingin a ser a tanpêk a.

⁵ Abraham chu a naupa Isak a nei lai chun kum za mi a nih.

⁶ Chun, Sara chun, “Pathienin a mi suknui tah; mi tin a hre taphawt chun mîn nuipui an tih,” a tih a.

⁷ Ama bawk chun, “Sara hin nautehai a la pawm ding a nih ti tuin am Abraham kuomah hril ngaina hrieng an ta? a tar hnung hin naupasal ka neipêk ta hi,” a tih a.

Hagar le Ismael tirhmangna

⁸ Chun, naute chu a hung inṭhang a, nene nêk an inbântir tah a, Isak chu nene nêk an inbântir ni chun Abrahamin ruoi ropuitak a ṭheh a.

⁹ Chun, Aigupta mi, Hagar naupa, Abraham ta dinga a neipêk chun a nuisan lai Sara chun a hmuh a.

¹⁰ Chuleichun, Abraham kuoma chun, “Hi suoknu le a naupa hi hnawt suok rawh; hi suoknu naupa hi ka naupa Isak ro hluopuitu ding ni thei naw nih,” a tih a.

¹¹ Chu thu chu a naupa Ismael lei chun Abraham ta ding chun lung- ngaithlâk tak a nih.

¹² Nisienlakhawm, Pathienin Abraham kuoma chun, “Naupang le i suoknu chungchâng thu lei hin beidawng naw rawh: Sarain i kuoma thu a hril po po chu zâwm rawh, Isaka hin i thlahai an la ti ding a ni sih a.

¹³ Chun, suoknu naupaa khawm hin i thla a ni leiin chi ti khawp zet la siem ka tih,” a tih a.

¹⁴ Chuongchun, Abraham chu zîngkâr inhmatakin a tho a, bei le tuiûm a lâk a, Hagar kuomah a pêk a, a liengkoah ân chuonpêk a, naupang le chun ân fetir tah a; chuongchun, a feh a, Beer-seba thlalêra chun ân vâk ân vâk tah a.

¹⁵ Chun, tuiûma tui chu a hung bo tah a, chuongchun, naupang chu chîmbuk pakhat hnuoiah a sie el tah a.

¹⁶ Chun, “Naupang thi ding chu ka en ngam nawh,” a ti leiin a feh a, hla fe thal kâp phâk ding chena hin, a hma zâwna chun a va ṭhung ta chawt a. Chuonga a hma zâwna a ṭhung lai chun inringtakin a ṭap tah a.

¹⁷ Chun, Pathienin naupang râwl chu a hriet a, chun Pathien vântir- koin vâna inthawkin Hagar chu a zuk ko a, a kuomah, “Hagar, iengin am a sukbuoi che leh? ṭi naw; a umnaa naupang râwl kha Pathienin a hriet a nih.

¹⁸ Tho la, naupang kha keitho la, i kutin chel rawh, ama chu chi ropuitakah ka siem ding a nih,” a ta.

¹⁹ Chun, Pathienin a mit a sukvarpêk a, tuisunsuo a hmu tah a: chuongchun, a va feh a, tuiûma chun tui chu a thun sip a, naupang chu ân dâwntir tah a.

²⁰ Chun, Pathien chu naupang kuoma chun a um hlak a, a hung inṭhang lien pei a; thlalêrah a um hlak a, thal kâp thiem mi a hung ni tah a.

²¹ Paran thlalêra chun a um a; chun, a nuin Aigupta rama inthawk nuhmei a neipêk tah a.

Abraham le Abimelek inkâra Thuthlung

²² Chuong lai chun Abimelek le a sipai pâwl hotu Phikol chun Abraham kuomah, “I thilthaw taphawtah Pathien i kuomah a um pei hlak a:

²³ chuleiin, ka lo lunginsiet ta che ang khan kei le hi i khuolchâmna ram hi lunginsiet ve thunga, kei le ka nau- pa le ka naupa naupa khawm hlêm lo dingin Pathien hming sâlin tuhin ka kuomah inkhâm rawh,” a tih a.

²⁴ Abraham chun, “Inkhâm ta naw ning am,” a tih a.

²⁵ Chun, Abimelek siehlawhaiin tuisunsuo an lâkpêk lei chun Abimelek chu Abraham chun a lo kâwk a.

²⁶ Abimelek chun, “Chu thil thawtu chu tu am a nih ka hriet dêr nawh a; nang hlakin i mi hril si nawh a, vawisûn chau naw chu ka la hriet dêr nawh,” a ta.

²⁷ Chuongchun, Abraham chun berâmhai le bâwngchalhai a ṭhuoi a, Abimelek kuomah a pêk a: chun, an pahni chun thu an thlung tah a.

²⁸ Abraham chun a berâm ruol laia mi berâmte a la pasari a sie tum a.

²⁹ Abimelek chun Abraham kuomah, “Berâmte a la pasari a tuma i sie hi ieng tina am a na?” a ta.

³⁰ Ama chun, “Hi tuisunsuo hi keiin ka icho a nih ti i mi hrietpuina dingin hi berâmte a la pasari hi ka kuta inthawkin i lâk ding a nih,” a tih a.

³¹ Chuleichun, chu hmun chu Beer-seba ân bûk a: chutaka chun an pahniha ṭawng an inkhâm rêl leiin.

³² Chuongchun, Beer-sebaa chun thu an thlung tah a: chun, Abimelek chu a tho a, a sipai pâwl hotu Phikol leh Philistinhai rama chun an kîr nâwk tah a.

³³ Abraham chun Beer-sebaa chun tamarisk thing a phun a, chutaka chun LALPA Chatuon Pathien hming chu a lam a.

³⁴ Chuongchun, Abraham chu Philistin mihai rama chun sâwttak a um a.