INṬANNA 13 - Pathien Lekhabu Inthieng (BSI)

Abram le Lota inṭhe thu

¹ Chun, Abram chu Aiguptaa inthawk chun a suok a, ama le a nuhmei le, a nei po po, ama ruolin Lota leh, Negeb-a chun an hang fe tah a.

² Chun, Abram chu ran dâm, tang- ka dâm, rângkachak dâmin a hausa êm êm a.

³ Chun, Negeba inthawk chun Bethel tlung rakin a fe pei a, Bethel le Ai khuo inkârah, a tîrtaka a puon in umnaa khan;

⁴ a tîra a mâichâm siemna ngeia khan; chun, chutaka chun Abram chun LALPA hming a lam a.

⁵ Chun, Lota, Abram le fe ve khawm khan berâm ruol dâm, bâwng ruol dâm, puon in dâm a nei veh a.

⁶ An um rêlna dingin ramin a dai ta nawh a, an thil nei chu a nasa hle sih a; chuongchun, an um hmunkhat thei ta dêr da el a.

⁷ Chuongchun, Abram ran puhai le Lota ran puhai inkâra chun insêlna a hung suok tah a: chuong lai chun Kanaan le Periz mihai chu chu rama chun an um a.

Lotain Sodom a thlang

⁸ Chuongchun, Abramin Lota kuomah, “Lunginsiettakin, kei le nanga inkârah, ka ran puhai le i ran puhai inkâra khawm, insêlna um naw raw se; unau ei ni sih a.

⁹ Ram chu a pumin a um duoi a ni naw am a nih? Lunginsiettakin, ka kuoma inthawk hin insuktum el rawh: nang vawitieng i fe chun kei changtieng fêng ka ta, annawleh, nang changtieng i fe chun kei vawitieng fêng ka tih,” a tih a.

¹⁰ Chuongchun, Lota chu a dâk suok a, Zoar pan zâwng chun, Jordan phaizâwl po po chu LALPA huon ang, Aigupta ram ang khan ram tina tui um furna hmun a nih ti a hriet a, LALPAIN Sodom le Gomorra a suksiet hma kha a ni sih a.

¹¹ Chuongchun, Lota chun Jordan phaizâwl po po chu a thlang tah a; chun, Lota chu saktieng chun ân tâwl tah a: chuongchun, an inṭhe tah a.

¹² Abram chu Kanaana chun a um a, Lota chu phaizâwl khuohaia chun a um a, a puon in chu Sodom chenin a tâwl pei a.

¹³ Chun, Sodom mihai chu Pathien mithmuin nasataka ṭha naw le suolin an um a.

¹⁴ Chun, a kuoma inthawka Lota a tuma a um hnung chun, LALPAIN Abram kuomah, “Dâk la, i umnaa inthawk khan hmârtieng dâm, sim- tieng dâm, saktieng dâm, thlangtieng dâm en rawh:

¹⁵ i ram hmu po po hi i kuoma le i thlahai kuomah kumkhuoa dingin ka pêk ding che a nih.

¹⁶ Chun, i thlahai chu hnuoia pilvut ang elin la siem ka tih: chuongchun, miin hnuoia pilvut hi an tiem sêng chun i thlahai khawm chu tiem sêng ni bawk an tih.

¹⁷ Tho la, ram hi a dung a khangin fang suok rawh; i kuomah ka pêk ding che a nih,” a tih a.

¹⁸ Chuongchun, Abram chun a puon in chu a tâwl a, Hebrona um Mamre thingsaisuo kâwlhaia chun umhmun a va khuor a, chutaka chun LALPA ta dingin mâichâm a siem a.