INPÂKNA HLABU 91 - Pathien Lekhabu Inthieng (BSI)

Iengkimthawthei thlazâr hnuoia um zing thu

¹ Achunghnungtak inbîkna hmuna um chu, Iengkimthawthei hlima chun um zing a tih.

² LALPA chungthua chun, “Ama chu ka inhumhimna le ka kulpui, Ka Pathien, ka iring chu a nih,” tîng ka tih.

³ Ama chun châng kamtu chânga inthawk le, Hri ṭha nawtaka inthawk chun a sanhim ding che a nih.

⁴ A thla chun inkhum a ti cheh a, A thla hnuoia chun himtakin um i ta, A thutak chu phaw chîn le phaw lien a nih.

⁵ Zâna thil râpthlâk chu ṭî naw ti nih a, Sûna thal hung inlêng hlak chu ṭî bawk naw ti nih.

⁶ Inthim hnuoia hri inlêng hlak chu ṭî naw ti nih a, Sûn laia thil sukse hlak sietna chu ṭî bawk naw ti nih.

⁷ I sîrah sâng tlûng an ta, I changtieng chun sîng tlu bawk an tih; Nisienlakhawm, nang chu hnai naw ni che.

⁸ I mitin en i ta, Mi rilohai thungna chu a hmu hin hmu chau i tih.

⁹ Aw LALPA, nang chu ka înhumhimna i ni sih a! Achunghnungtak chu i umnain i hmang a.

¹⁰ Thil ṭha naw hrim hrimin tuok naw ni cheh a,. Hri hrim hrim khawmin i puon in hung hnai bawk naw nih.

¹¹ I kawng tinrênga humhim ding chein, I chungthua chu a vântirkohai chu thu a pêk ding a ni sih a.

¹² An kutin dawm an ti cheh a, Chuong naw chun, i kein lung sui rawi i tih.

¹³ Sakeibaknei le rûl chu sir dêng i ta, Sakeibaknei vânglai le rûlriel chu sir hriel neng i tih.

¹⁴ Ka chungah a hmangaina ân nghat tlat leiin sanhim ka ta, Ka hming a hriet leiin hmun insângah dawm kai ka tih.

¹⁵ A mi ko pha chun, dawn ka ta, A lunginzîng lai chun a kuomah um ka ta, Ama chu sanhimin chawimawi ka tih.

¹⁶ Dam sâwtnain suklungawi ka ta, Ka sandamna chu inhmutir bawk ka tih.