HOSEA 12 - Pathien Lekhabu Inthieng (BSI)

¹ Ephraim chun thli a ring a, Khaw sakthli chu a zui hlak a; Khêl thu le inṭhedarna thu a sukpung tiel tiel a, Assuria leh thu an thlung a, Aigupta tieng chun hriek a phur lût a.

² LALPA chun Juda chunga khawm hêkna ding a nei bawk a, Jakob chu a um dân angzie peiin hrem a tih; A thilthaw angzie peia thungin.

³ Sula khawm khan a unaupa chu a kekhawngah a hung man a, A hung puitling khan Pathien chu a thawh a,

⁴ Anih, vântirko a thawh a, a hne tah, A ṭap a, ditsakna a ngên a, Bethel hmuna chun ama a hmu tah a, Chutaka chun a kuomah thu a hril a;

⁵ LALPA ngei, Sipaihai Pathien chun; LALPA ti chu a hming a nih.

⁶ Chuongchun, nang chun i Pathien tieng ngha la, Lunginsietna le rorêlna hmang la; I Pathiena chun innghat rawp rawh.

⁷ Sumdâwngtu a na, a kutah bûkna indik naw a um a, Hlêm ngawt a châk hlak a nih.

⁸ Ephraim chun, “Ka hausa takzet el tah a, Kân sukmuk takmeu el ta a nih; Ka sinthaw po poahai hlak chun Keimaa thil suol an hmu ding hlak um dêr lo,” a tih a.

⁹ Nisienlakhawm, kei hi Aigupta rama inthawk ta khan, LALPA i Pathien chu ka na; Ruoiṭhe hun lai ang khan puon inah lân chêngtir nâwk ka ti che.

¹⁰ Zâwlneihai kuoma khawm thu ka hril hlak a, Inlârnahai ka sukpung a; Zâwlneihai hmangin tekhina ka siem hlak;

¹¹ Gilead chu rîtlona a ni naw am a nih? Teplo el an nih annâwm; Gilgala chun bâwngchal an inhlân hlak a. Anih, an mâichâmhai chu leilet changkuonga Lung dêng khâwm ang el an nih.

¹² Jakob chu Aram rama chun a tlân hmang a, Israel chun nuhmei man a tuok tah a; Nuhmei man ding chun berâm a vêng a nih.

¹³ Zâwlnei hmangin Israel chu Aiguptaa inthawkin LALPAIN a ṭhuoi suok a; Zâwlnei bawk hmang chun a hum bawk a.

¹⁴ Ephraim hlak chun a suklungsen nasa êm êm el a, Chuleiin, a thisen insuo chu ama chungah a tla a, A hrilsietna chu ama chungah LALPAIN intlâktir a tih.