HLAHAI HLA 5 - Pathien Lekhabu Inthieng (BSI)

¹ Ka farnu, ka huona chun ka hung ie, ka mo, Ka riminhnik leh ka murra chu ka lâk khâwm a; Ka khuoizu le ka khuoithlâr chu ka fâk a; Ka bâwng nênetui leh ka uoin chu ka dâwn tah. Nunghâk Aw ruolhai, fa ta u, Dâwn unla, dâwn ṭeu ro aw hmangaitak.

Inṭhe rinumzie Nunghâk

² Ka lo in a, ka lung ruok chu a har a, Chu! ka hmangaitak chu a hung nâwk ie, Tlangvâl “Mi hung hawngpêk rawh, ka farnu, ka hmangai, ka vaṭhu, ka ṭha famkim; Ka lu chu daidâwin a sukhu a, Ka sam chu zân hnâwngin,” tiin. Nunghâk

³ Ka zakawchung chu ka hlîp tah a, iengtin am hâk nâwk ka ta? Ka kehai chu ka sâwp tah a, iengtin am sukbal nâwk ka ta?

⁴ Ka hmangaitak chun kawtkhâr âwnga chun a kut a hung pur a, Chun, ama ta dingin ka lungril chu a hung châng tah a.

⁵ Ka hmangaitak chu hawngpêk dingin ka tho tah a, Ka kuthai chu murrain a far a, ka kutpârhai chu murra tuiin, Kawtkalna bâwk chunga chun.

⁶ Ka hmangaitak chu ka hawngpêk a; Nisienlakhawm, ka hmangai- tak chu a lo intâwlhmang a, a lo fe hmang tah a, Thu a hung hril lai khan ka thlain a mîn âwimâwtir a; Ama chu ka zawng a, anachu ka hmu nawh a; Ama chu ka ko a, anachu a mi dawn nawh.

⁷ Vêngtuhai khawpuia fe vêlhai chun an mi hmuh a, An mi vuok a, an mi sukhliem a; Kul vêngtuhai chun ka puon lukhum an mi lâkpêk a.

⁸ Aw Jerusalem naunuhai, ka ngên cheu, ka hmangaitak kha in hmu chun, Hmangainain ka na a nih, ti ama chu hril ro.

Moin moneitu ân pâk Nunghâkhai

⁹ I hmangaitak chu mi danghai hmangaitakhai leh a chuong a liemna, Aw nang nuhmeihai laia hmêlṭhatak, ieng am a um bîk a? I hmangaitak chu mi danghai hmangaitak le a chuong a liemna ieng am a um bîk a, Chuong ang lâwma i mi ngên chu? Nunghâk

¹⁰ Ka hmangaitak chu a ngo sen sier a, Sâng sâwm laia chun a ṭha tak a nih.

¹¹ A lu chu rângkachak inthiengtak ang a na, A samtawm chu ân bukin, vaâk angin a dum a.

¹² A mithai chu vadungtê tui kâwla vaṭhu mithai ang a na, Nênetuia sâwp, inremtaka inbûk.

¹³ A bienghai chu riminhnik bil, rim inhnik insuo hlak ang a na, A hmûrhai chu lili, murra tui infartir ang chu a nih.

¹⁴ A kuthai chu rângkachak tluon, berul lung phûm ang chu an na, A taksa chu saihaa siem, Sapphir lunga tuom ang a nih.

¹⁵ A kehai chu sailungvâr banhai, rângkachak inbûkna kuoa inbûk ang a na. A hmêl inlang dân chu Lebanon, sidar thinga ṭha bîk rieu ang chu a nih.

¹⁶ A bausuok chu a thlum a, anih, dit a um pumhlûm el a nih; Hi hi ka hmangaitak chu a na, hi hi ka ruol chu a nih, Aw nangni Jerusalem naunuhai. Nunghâkhai